ព័ត៌មានអន្ដរជាតិ

ហ្សេលេនស្គី ផ្ដាំរុស្ស៊ីឲ្យត្រៀមរកកន្លែងពាំងគ្រាប់ ក្រោយត្រាំបើកដៃឲ្យវាយប្រហាររយៈចម្ងាយឆ្ងាយ

បានផុស

៩ ខែ មុន

នៅ

ថ្ងៃសុក្រ ២៦ កញ្ញា ២០២៥

ដោយ

Chheang

ប្រធានាធិបតីអ៊ុយក្រែនលោក វ៉ូឡូឌីមៀរ ហ្សេលេនស្គី បានព្រមានមន្ត្រីវិមានក្រឹមឡាំងថា ពួកគេគួរតែរៀបចំទប់ទល់នឹងការវាយប្រហារ ប្រសិនបើទីក្រុងមូស្គូមិនព្រមបញ្ចប់សង្គ្រាម ដោយប្រាប់ថា កងកម្លាំងរបស់លោកបានត្រៀមខ្លួនជាស្រេចដើម្បីកំណត់គោលដៅហេដ្ឋារចនាសម្ព័ន្ធថាមពល និងរោងចក្រសព្វាវុធ ក្រោយមានការគាំទ្រយ៉ាងច្បាស់លាស់ពីប្រធានាធិបតីសហរដ្ឋអាមេរិកលោក ដូណាល់ ត្រាំ។

លោក ហ្សេលេនស្គី និងលោក ត្រាំ (រូបថត៖ AP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចុះផ្សាយរបស់ New York Sun កាលពីថ្ងៃទី២៥ខែកញ្ញាឆ្នាំ២០២៥ លោក ហ្សេលេនស្គី បាននិយាយបន្ទាប់ពីថ្លែងសុន្ទរកថានៅក្នុងមហាសន្និបាតអង្គការសហប្រជាជាតិថា ទីក្រុងកៀវនឹងមិនផ្តោតលើជនស៊ីវិលនោះទេ ប៉ុន្តែអាសនៈអំណាចរបស់រុស្ស៊ី រួមទាំងវិមានក្រឹមឡាំង នៅតែជាគោលដៅដ៏មានសក្តានុពល។ លោក ហ្សេលេនស្គី បានបន្ថែមថា អ៊ុយក្រែនមានយន្តហោះគ្មានមនុស្សបើក ដែលអាចចូលទៅជ្រៅក្នុងទឹកដីរុស្ស៊ី ប៉ុន្តែលោកកំពុងស្វែងរកអាវុធរយៈចម្ងាយឆ្ងាយបន្ថែមពីទីក្រុងវ៉ាស៊ីនតោន ដើម្បីបង្កើនសម្ពាធលើទីក្រុងមូស្គូ។

លោក ហ្សេលេនស្គី បានកត់សម្គាល់ថា លោកបានលើកឡើងអំពីសំណើនេះដោយផ្ទាល់ជាមួយលោក ត្រាំ ក្នុងអំឡុងពេលកិច្ចប្រជុំរបស់ពួកគេ ហើយលោកប្រធានាធិបតីអាមេរិកក៏បានយល់ព្រមលើរឿងនេះដែរ។ លោកបានបន្ថែមថា ការទទួលបានប្រព័ន្ធអាវុធចម្ងាយឆ្ងាយបន្ថែមទៀតអាចរុញប្រធានាធិបតីរុស្ស៊ី វ្ល៉ាឌីមៀរ ពូទីន ឲ្យចូលទៅកាន់តុចរចា។

លោក ត្រាំ ដែលបានផ្លាស់ប្តូរជំហររបស់ខ្លួនចំពោះអ៊ុយក្រែនក្នុងរយៈពេលប៉ុន្មានថ្ងៃថ្មីៗនេះ បានសរសេរនៅលើ Truth Social ថា ទីក្រុងកៀវដោយមានការគាំទ្រពីអឺរ៉ុប និងអង្គការណាតូ អាចប្រយុទ្ធ និងដណ្ដើមទឹកដីរបស់ខ្លួនទាំងអស់មកវិញពីរុស្ស៊ី។ លោកថែមទាំងហៅប្រទេសរុស្ស៊ីថាជា «ខ្លាក្រដាស» ដែលកំពុងធ្លាក់ចុះខាងផ្នែកសេដ្ឋកិច្ច និងយោធា៕

ដោយ៖ ឈាង