ព័ត៌មានអន្ដរជាតិ
[វិចារណកថា] ល្បិចថៃខ្ចីដៃសារព័ត៌មានបស្ចឹមប្រទេស ត្រូវបកអាក្រាត
រដ្ឋាភិបាលថៃរបស់លោក អានុទីន ចានវីរៈគុល (Anutin Charnvirakul) ដែលទើបចូលអង្គុយកៅអីនាយករដ្ឋមន្ត្រីមិនទាំងក្តៅគូថបានប៉ុន្មានថ្ងៃផង បានបង្កកំហុសការទូតដ៏ធំមួយ ដោយការបោះព័ត៌មានមិនប្រឌិត ទៅឲ្យសារព័ត៌មាន New York Times មានមូលដ្ឋាននៅសហរដ្ឋអាមេរិក វាយប្រហារបង្ខូចកិត្តិយសរដ្ឋាភិបាលចិន និងចេតនាទាញកម្ពុជាឲ្យចូលក្នុងក្រសែភ្នែកបស្ចឹមប្រទេសក្នុងផ្លូវអវិជ្ជមាន។
ការបង្កកំហុសដោយរដ្ឋាភិបាលថៃដោយឲ្យភ្នាក់ងារចារកម្មយោធាថៃជាអ្នកផ្តល់ព័ត៌មានទៅសារព័ត៌មានអាមេរិក ជុំវិញរឿងចោទប្រកាន់ថា «ចិនផ្គត់ផ្គង់អាវុធឲ្យកម្ពុជាសម្រាប់ការប្រយុទ្ធជាមួយថៃ» គឺជាបង្កើតនូវភាពល្អក់កករផ្នែកការទូតដ៏អាប់អួជាមួយប្រទេសចិនដ៏មានឥទ្ធិពលនាពេលបច្ចុប្បន្ន។ ព័ត៌មានដែលផ្សាយនៅ New York Times បានលើកឡើងថា ចិនបានដឹកអាវុធនិងសម្ភារយោធាជាច្រើនប្រភេទ និងច្រើនយន្តហោះទៅកាន់ព្រលានយន្តហោះខេត្តព្រះសីហនុ ឲ្យកម្ពុជាសម្រាប់ជម្លោះជាមួយថៃនោះ។
ដោយទ្រាំការប្រឌិតព័ត៌មាននោះមិនបាន ស្ថានទូតចិននៅទីក្រុងបាងកក បានចេញប្រតិកម្មបដិសេធ ចំពោះព័ត៌មាននោះ ក្រោយការផ្ទុះត្រឹមតែ២ថ្ងៃ គឺនៅបន្ទាប់ពីការចេញផ្សាយរបស់សារព័ត៌មាន New York Times របស់សហរដ្ឋអាមេរិកដែលអះអាងថា «បានទទួលឯកសារចារកម្មយោធាថៃ» ដែលថា «ចិនបានផ្គត់ផ្គង់សព្វាវុធ» ដល់កម្ពុជាសម្រាប់ជម្លោះជាមួយថៃ។
បន្ទាប់ពីការចេញផ្សាយរបស់សារព័ត៌មានដ៏ល្បីរបស់សហរដ្ឋអាមេរិកនេះ សារព័ត៌មានក្នុងស្រុករបស់ប្រទេសថៃដែលត្រូវបានគេមើលឃើញថា បានបាត់បង់មូលដ្ឋានគ្រឹះនៃការផ្សាយព័ត៌មានមិនពិតក្នុងជម្លោះព្រំដែនរវាងថៃនិងកម្ពុជាស្រាប់ទៅហើយនោះ បានផ្សព្វផ្សាយព័ត៌មានមិនពិតនោះ ដោយបន្ទរការចោទប្រកាន់រដ្ឋាភិបាលចិន តាមការចេញផ្សាយបន្តនូវព័ត៌មានដែលស្រង់ពី New York Times។
នៅមុនស្ថានទូតចិនប្រចាំទីក្រុងបាងកកបានចេញសេចក្តីឆ្លើយបំភ្លឺនៅលើទំព័របណ្តាញសង្គម រដ្ឋមន្ត្រីក្រសួងការពារជាតិថៃ លោក Natthapol Nakpanich បាននិយាយសម្រាលស្ថានការវិញ ដោយអះអាងថា ព័ត៌មានដែលមានការផ្សព្វផ្សាយនោះ គឺជាព័ត៌មានចាស់។
លោក Natthapol Nakpanich ត្រូវបានស្រង់សម្តីដោយសារព័តមានថៃ Khaosod English ដូចបាននិយាយថា៖«ផ្អែកតាមការត្រួតពិនិត្យជាមួយអង្គភាពចារកម្ម បញ្ហានេះគឺជាព័ត៌មានចាស់ និងជាកំហុសនៃកំណត់ត្រាក្នុងវិស័យសាធារណ»។
សំណួរនៅត្រង់ថា ហេតុដូចម្តេចបានជាអង្គភាពចារកម្មតែមួយរបស់ថៃផលិតរបាយការណ៍ខុសគ្នា សម្រាប់សារព័ត៌មាន New York Times និងទៅរដ្ឋមន្ត្រីក្រសួងការពារជាតិ? តើសារព័ត៌មាន New York Times ផ្សាយខុស ឬក៏រដ្ឋមន្ត្រីក្រសួងការពារជាតិថៃនិយាយដើម្បីលាងកំហុស?
ក្នុងការនិយាយសម្រួលស្ថានការណ៍នៅមុនទូតចិនចេញប្រតិកម្ម រដ្ឋមន្ត្រីការពារជាតិថៃ បានបញ្ជាក់ថា៖«ខ្ញុំសូមអះអាងថា ខ្ញុំបានឆ្លើយបញ្ជាក់រួចរាល់ហើយ ទៅកាន់ប្រព័ន្ធផ្សព្វផ្សាយនៅដើមឆ្នាំ២០២៥ ដែលថា ចិនបានគាំទ្រអាវុធដល់កម្ពុជា ដែលនោះជារឿងទំនាក់ទំនងទ្វេភាគី ហើយ នៅពេលនោះ ថៃនិងកម្ពុជាមិនទាន់មានជម្លោះទេ»។
ក្រោយការអះអាងរបស់រដ្ឋមន្ត្រីការពារជាតិថៃដែលផ្សព្វផ្សាយដោយសារព័ត៌មានថៃនៅរសៀលថ្ងៃទី២ខែតុលា នៅយប់ថ្ងៃដដែល ស្ថានទូតចិនប្រចាំក្រុងបាងកក បានចេញមកបដិសេធជាផ្លូវការដែលធ្វើឲ្យការបញ្ចេញព័ត៌មានរបស់ចារកម្មយោធាថៃ ក្លាយជា រឿងមិនពិត ខណៈសារព័ត៌មានថៃព្យាយាមផ្សព្វផ្សាយដដែលៗថា «យោធាកម្ពុជាមិនបដិសេធ» ព័ត៌មានដែលផ្សព្វផ្សាយនៅតាមបណ្តាញសារព័ត៌មានរបស់ New York Times នោះទេ។
សារពីស្ថានទូតនៃសាធារណរដ្ឋប្រជាមានិតចិនប្រចាំទីក្រុងបាងកក បានគូសបញ្ជាក់ច្បាស់ៗថា ចិនមិនបានបញ្ជូនឧបករណ៍យោធាណាមួយទៅកាន់់កម្ពុជាសម្រាប់ការប្រើប្រាស់ក្នុងការប៉ះទង្គិចព្រំដែនថៃ-កម្ពុជានោះទេ។ សារឆ្លើយតបភ្លាមៗនេះហាក់បានរំងាប់នូវមហិច្ឆតាញុះញង់ឲ្យមានអរិភាពកាន់តែកើនឡើងរវាងប្រទេសកម្ពុជានិងថៃដែលកំពុងអនុវត្តបទឈប់បាញ់ដ៏ផុសស្រួយ តាមឃ្លាំងមើលដោយក្រុមអង្កេតការណ៍បណ្តោះអាសន្ន (IOT) ដឹកនាំដោយម៉ាឡេស៊ីនោះ។
លើសពីនេះ ការបញ្ចេញព័ត៌មានមិនពិតទៅឲ្យសារព័ត៌មានបស្ចឹមប្រទេសនេះ គឺច្បាស់ណាស់ថៃមានចេតនាឲ្យបស្ចឹមលោកមើលទៅរដ្ឋាភិបាលក្រុងប៉េកាំងក្នុងផ្លូវអវិជ្ជមាន ដែលងាយស្រួលឲ្យសហរដ្ឋអាមេរិកពិចារណាឡើងវិញក្នុងការដកការសម្រេចចិត្តគាំទ្រឲ្យមានការអនុវត្តបទឈប់បាញ់ពេញលេញ ដែលបទឈប់បាញ់នេះសម្រេចបានក្រោមកិច្ចខិតខំរបស់ប្រធានាធិបតីសហរដ្ឋអាមេរិកលោក ដូណាល់ ត្រាំ តាមរយៈវិធានការគម្រាមគាបសង្កត់ដោយវិធានការពន្ធគយដែលភាគីថៃនិងកម្ពុជាស្ថិតនៅក្នុងដំណាក់កាលចរចាដ៏សំខាន់។
សារស្ថានទូតចិន បញ្ជាក់យ៉ាងច្បាស់ថា ប្រទេសចិនមិនមានផលប្រយោជន៍ផ្ទាល់ខ្លួនក្នុងជម្លោះព្រំដែនថៃកម្ពុជា និង គាំទ្រអាស៊ានក្នុងការលើកកម្ពស់ដំណោះស្រាយនយោបាយតាមរយៈ «មធ្យោបាយអាស៊ាន»។ លើសពីនោះទៀត សារនោះអះអាងថា ចិនស្ម័គ្រចិត្តធ្វើទំនាក់ទំនងយ៉ាងជិតស្និទ្ធជាមួយថៃ កម្ពុជា ម៉ាឡេស៊ីនិងប្រទេសដទៃទៀតក្នុងតំបន់ និង ដើរតួនាទីស្ថាបនាក្នុងការពង្រឹងបទឈប់បាញ់យូរអង្វែង និងស្តារសន្តិភាពទៅកាន់តំបន់ព្រំដែន។
ការបង្កភាពថ្នាំងថ្នាក់របស់រដ្ឋបាលរបស់នាយករដ្ឋមន្ត្រី អានុទីន ចានវីរៈគុល នាពេលនេះ គឺនៅក្រោយពេលប្រហែល១សប្តាហ៍ប៉ុណ្ណោះ ដែលយោធាទ័ពអាកាសថៃបានបញ្ចប់លំហាត់សមយុទ្ធរួមគ្នាជាមួយកងទ័ពកាសចិនកាលថ្ងៃទី២៥កញ្ញា ដែលលំហាត់ហ្វឹកហ្វឺនរួមគ្នានេះកើតឡើងតែជាង១ខែប៉ុណ្ណោះ ក្រោយទ័ពអាកាសថៃប្រើប្រាស់យន្តហោះចម្បាំងសេរីទំនើប F-16 របស់អាមេរិក និង Gripen C/D ទិញពីស៊ុយអែត យកមកវាយប្រហារឈ្លានពានកម្ពុជា ដែលកម្ពុជាមិនបានត្អូញត្អែរតវ៉ាសូម្បីមួយម៉ាត់រហូតដល់ពេលនេះ។
ការប្រឌិតព័ត៌មាន និងបញ្ចេញព័ត៌មានទៅឲ្យសារព័ត៌មានបរទេសបែបនេះ គឺច្បាស់ជាមានចេតនាញុះញុងឲ្យមហាអំណាចបស្ចឹមប្រទេសមើលមកទំនាក់ទំនងចិននិងកម្ពុជា ខណៈពេលដែលចិនហាក់ត្រូវបានមហាអំណាចបច្ចឹមប្រទេសមើលឃើញថា ជាមហាអំណាចដែលកាន់តែមានសក្តានុពលទាំងយោធា សេដ្ឋកិច្ច បច្ចេកវិទ្យា និងទំនាក់ទំនងការទូតល្អនៅគ្រប់តំបន់។
ក្នុងកាលៈទេសៈដែលថៃគ្មានភាពរឹងមាំក្នុងនយោបាយផ្ទៃក្នុងជាតិបែបនេះ យោធាថៃងាយណាស់ប្រើប្រាស់យុទ្ធសាស្រ្តចាក់បំបែកបែប ញុះញង់ ដើម្បីឲ្យអន្តរជាតិមើលឃើញកម្ពុជាជាអ្នកបង្កហេតុ ហើយចិនដែលប្រជែងនឹងបស្ចឹមលោកស្រាប់នោះ ក៏ធ្វើឲ្យមហាអំណាចលោកខាងលិចដកការគាំទ្រដល់បទឈប់បាញ់ និងលែងខ្វល់ពីប្រទេសកម្ពុជា។
ពេលបស្ចឹមប្រទេសលែងខ្វល់ពីកម្ពុជានោះ យោធាថៃដែលមានឥទ្ធិពលស្រាប់នោះនឹងបង្កើនការវាយប្រហារភ្លាមៗលើកម្ពុជាជាក់ជាមិនខាន ហើយការវាយប្រហារនឹងកាន់តែសាហាវលើសកាលការវាយហារលើកមុនទៀត ដើម្បីលុបបំបាត់ក្តីអាម៉ាស់ដែលថៃបានធ្វើមកលើកម្ពុជា។
មិនត្រឹមតែបដិសេធប៉ុណ្ណោះទេ សាររបស់ស្ថានទូតចិនបញ្ជាក់ពីជំហរបស់ចិនក្នុងការធ្វើការដើម្បីបន្ថយភាពតានតឹងតាមមធ្យោបាយរបស់ខ្លួនផ្ទាល់។ លើសពីនេះ ចិនបញ្ជាក់យ៉ាងម៉ឹងម៉ាត់ថា៖«យើងជំរុញឲ្យអ្នកដែលពាក់ព័ន្ធចាត់ទុកសន្តិភាពនិងស្ថិរភាពនៃតំបន់និងសុខុមាលភាពប្រជាជន និងធ្វើរឿងវិជ្ជាមាននិងស្ថាបនាបន្ថែមទៀតដើម្បីបន្ធូរបន្ថយស្ថានភាពតានតឹងរវាងថ្ងៃនិងកម្ពុជា ជំនួសឲ្យព័ត៌មានមិនពិតដែលកំពុងរីកសាយភាយនិងភាពចលាចលបែបអុជអាលប្រកបដោយចេតនានេះ»៕
រ៉ាន់ រើយ
-
ព័ត៌មានអន្ដរជាតិ១២ ម៉ោង agoអស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ
-
សេដ្ឋកិច្ច២ ថ្ងៃ agoធនាគារ ARDB ចាក់បញ្ចូលទុនលើស្វាយចន្ទី និងដំឡូងមី
-
ព័ត៌មានជាតិ១ សប្តាហ៍ agoរដ្ឋបាលខណ្ឌកំបូល សហការជាមួយក្រុមហ៊ុនមីនេបៀ ប្រើប្រាស់កម្លាំងជាង ៨០០នាក់ សម្អាតអនាម័យនៅតាមដងផ្លូវ
-
កីឡា៣ ថ្ងៃ agoមូលហេតុកីឡាករអាមេរិ Penrose ធ្វើមិនបានល្អជាមួយក្រុមស្នងការខេត្តស្វាយរៀង
-
ព័ត៌មានអន្ដរជាតិ៦ ថ្ងៃ agoអ៊ីរ៉ង់ បើកច្រកចូលរូងភ្នំ ផ្ទុកមីស៊ីលសម្ងាត់របស់ខ្លួនឡើងវិញ ទោះរងការវាយប្រហារយ៉ាងដំណំ
-
ព័ត៌មានអន្ដរជាតិ១ សប្តាហ៍ agoរដ្ឋមន្ត្រីការពារជាតិជប៉ុន បដិសេធការចោទប្រកាន់របស់ចិន អំពីការវិលទៅរកយោធានិយម
-
សេចក្ដីជូនដំណឹង២ ថ្ងៃ agoក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា
-
សេដ្ឋកិច្ច៥ ថ្ងៃ agoតម្លៃប្រេងលក់រាយធ្លាក់ចុះក្រោម ៥០០០ រៀល មួយលីត្រ