អ្នកមានជំងឺប៉ុន្មានមុខនេះ ពេលឆ្លងកូវីដ ងាយនឹងកើតដំបៅរលួយ ហើយអាចវិវត្តកាន់តែធ្ងន់ធ្ងរ

វីរុសកូវីដ-១៩ បានជំរុញឱ្យអ្នកជំងឺលេចចេញនូវរោគសញ្ញាស្មុគស្មាញជាច្រើន ដែលពេលខ្លះក៏នាំមកនូវអាការធ្ងន់ធ្ងរថែមទៀត។ ម្នាក់ក្នុងចំណោមមនុស្សជាច្រើនអាចនឹងប្រឈមហានិភ័យដំបៅរលួយ ដែលនេះជាសញ្ញានៃការឆ្លងរោគធ្ងន់ធ្ងររបស់អ្នកជំងឺកូវីដ-១៩ ជាពិសេសអ្នកជំងឺដែលកើតទឹកនោមផ្អែម។

តើដំបៅរលួយជាអ្វី?

ដំបៅរលួយកើតឡើងនៅពេលជាលិកាស្បែកងាប់ ដោយសារកង្វះការផ្គត់ផ្គង់ឈាមគ្រប់គ្រាន់។ ពេលណាជាលិកាត្រូវបានបំផ្លាញ វានឹងលេចចេញនូវសញ្ញាស្បែកដូចជា​ស្បែកស្ងួត ក្រហម រមាស់ កន្ទួល ពងបែក រួចក្លាយទៅជាដំបៅ ជាពិសេសចុងម្រាមជើង ម្រាមដៃ ជាលិកាសាច់ដុំ និងសរីរាង្គសំខាន់ៗមួយចំនួនទៀត ប្រសិនជំងឺធ្ងន់ធ្ងរខ្លាំង។

តើវីរុសកូវីដ-១៩ អាចបង្កឱ្យមានរោគដំបៅរលួយដែរឬទេ?

យោងតាមវេជ្ជបណ្ឌិតមួយរូបមកពីទីក្រុងដេលី ប្រទេសឥណ្ឌានិយាយថា ដំបៅរលួយអាចជាសញ្ញាសម្គាល់អាការធ្ងន់ធ្ងរនៃអ្នកជំងឺកូវីដ-១៩។

ដំបៅរលួយ មិនមែនគ្រាន់តែជាការឆ្លងមេរោគនៅលើស្បែកប៉ុណ្ណោះទេ តែក៏អាចចម្លងតាមការរីករាលដាលនៃវីរុសកូវីដ-១៩ផងដែរ។

ដោយសារវីរុសកូវីដ-៩ ជះឥទ្ធិពលធ្ងន់ធ្ងរដល់សរីរាង្គសំខាន់ៗ ដូច្នេះនៅពេលវីរុសនេះផ្ទុកក្នុងខ្លួន អ្នកជំងឺអាចមានបញ្ហាលើស្បែក ប៉ះពាល់ដល់ចរន្តឈាម និងបណ្តាលឱ្យរលាក ហើយក្នុងនោះក៏មានដំបៅផងដែរ។

ហេតុអ្វីបានជាដំបៅរលួយត្រូវបានគេចាត់ទុកជារោគសញ្ញាធ្ងន់ធ្ងរនៃកូវីដ-១៩?

កូវីដ-១៩ មិនដូចរោគសញ្ញាសើរស្បែកផ្សេងទេ គ្រប់គ្នាដឹងហើយថា​ វាជារោគរលាកផ្លូវដង្ហើម ឬសួតធ្ងន់ធ្ងរ។ អាការធ្ងរធ្ងរនៃជំងឺនេះក៏បង្កផលប៉ះពាល់ដល់សរសៃឈាម ដោយអាចបណ្ដាលមានជំងឺស្ទះសរសៃឈាម ឬឈាមកកផងដែរ។ ចំណែកដំបៅរលួយ ក៏ជាប់ទាក់ទិននឹងបញ្ហាឈាមដូចគ្នា ដូច្នេះការលេចឡើងនៃដំបៅ អាចបញ្ជាក់បានថា អ្នកជំងឺកូវីដមានអាការទ្រុឌទ្រោមខ្លាំងបំផុត។

តើនរណាប្រឈមហានិភ័យជាងគេ?

កត្តាហានិភ័យជាមួយដំបៅរលួយច្រើនកើតមានចំពោះ អ្នកជំងឺធាត់ ទឹកនោមផ្អែម លើសឈាម អ្នកនិយមផឹកស្រា អ្នកជក់បារី និងជំងឺសរសៃឈាមផ្សេងទៀត ដែលនេះសុទ្ធសឹងតែអាចបង្កើនការរលាកនៅក្នុងរាងកាយ ឬរំខានដល់ការផ្គត់ផ្គង់ឈាមនៅក្នុងខ្លួន៕

ប្រែសម្រួល៖ សន្យា

ប្រភព៖ timesofindia

ចុចអាន៖ អ្នកជំងឺស្រាល មានអង់ទីគ័រប្រឆាំងវីរុសបាន ១១ខែ ឬមួយជីវិតតែម្ដង ក្រោយជាសះស្បើយពីកូវីដ

ចុចអាន៖ អាហារ ៤ មុខហាមទទួលទាន ក្នុងកំលុងពេលឆ្លងនិងជាសះស្បើយពីកូវីដ