ដោយមានកំណើនជំងឺទឹកនោមផ្អែម សម្ដេចធិបតី ឱ្យពិចារណាលើវិធីបង្ការ ប្រសើរជាងព្យាបាល

ខណៈជំងឺទឹកនោមផ្អែមកើនឡើង​គួរឱ្យ​ព្រួយបារម្ភ សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានណែនាំឱ្យក្រសួងសុខាភិបាល រួមសហការជាមួយភាគីពាក់ព័ន្ធ ពិចារណាទៅលើវិធីសាស្ត្របង្ការ ជាជាងការឈានទៅដល់ការព្យាបាល។

ក្នុងឱកាសអញ្ជើញជាអធិបតីបើកការដ្ឋានសាងសង់មន្ទីរពេទ្យសាកលវិទ្យាល័យវិទ្យាសាស្ត្រសុខាភិបាល នាព្រឹកថ្ងៃទី១០ ខែធ្នូ ឆ្នាំ២០២៤ សម្ដេចធិបតី ហ៊ុន ម៉ាណែត បានបង្ហាញក្ដីបារម្ភនៃការកើនឡើងជំងឺទឹកនោមផ្អែម ជាពិសេសដែលបាននិងកំពុងវាយលុកទៅលើកុមារកម្ពុជា តាមរយៈការបរិភោគភេសជ្ជៈមានជាតិផ្អែមខ្លាំងជាប្រចាំថ្ងៃ។ ក្នុងន័យនេះ សម្ដេចធិបតី បានណែនាំឱ្យក្រសួងសុខាភិបាល និងក្រសួងអប់រំ គិតគូរពីការលក់ដូរចំណីអាហារនៅតាមសាលារៀនសម្រាប់ក្មេងតូចៗ ដើម្បីបង្ការជំងឺទឹកនោមផ្អែម ព្រោះក្មេងៗខ្លះ បានបរិភោគភេសជ្ជៈប៉ូវកម្លាំងដែលមានជាតិផ្អែមរហូត ៣កំប៉ុងក្នុងមួយថ្ងៃ។

សម្ដេចធិបតី នាយករដ្ឋមន្ត្រី បានថ្លែងថា រឿងសុខភាព កត្តាសំខាន់ចំនួន២ ដែលត្រូវយកចិត្តទុកដាក់នោះ គឺការបង្ការ និងព្យាបាលជំងឺ ដែលក្នុងន័យនេះ គ្រូពេទ្យ មិនត្រឹមតែមានតួនាទីជាអ្នកព្យាបាលដល់អ្នកជំងឺប៉ុណ្ណោះទេ ក៏ប៉ុន្តែ ពេទ្យ ក៏ជាអ្នកដើរតួនាទីក្នុងការបង្ការទប់ស្កាប់ជំងឺផងដែរ តាមរយៈការអប់រំ និងបណ្ដុះបណ្ដាលការយល់ដឹងដល់ប្រជាពលរដ្ឋ។ សម្ដេចធិបតី បានចាត់ទុកការវិនិយោគលើវិធីសាស្ត្របង្ការ ពិតជាមានសំខាន់ជាងការព្យាបាល ព្រោះថា បើឈានដល់ដំណាក់កាលព្យាបាល គឺលំបាកហើយ។  

ដូច្នេះ សម្ដេចធិបតី ហ៊ុន ម៉ាណែត បានណែនាំគ្រប់ផ្នែកពាក់ព័ន្ធ ពិសេសក្រសួងសុខាភិបាល បន្តយកចិត្តទុកដាក់ក្នុងការបង្កើន​ការផ្សព្វផ្សាយ​ទៅលើ​បណ្ដុំ​មនុស្ស សាលារៀន សហគមន៍ ​ឱ្យប្រុងប្រយ័ត្ន​ចំពោះ​ជំងឺ​ទឹកនោមផ្អែម ក៏ដូចជាអំពី​វិធីបង្ការ និងការពារ​ជំងឺ​ទឹកនោមផ្អែម​។

តាមការសិក្សាមួយ ​រក​ឃើញ​ថា​ ភាគរយនៃមនុស្សពេញវ័យដែលកើត​ជំងឺទឹកនោមផ្អែមនៅទូទាំងពិភពលោក បានកើនឡើងទ្វេដងក្នុងរយៈពេល ៣ទសវត្សរ៍ចុងក្រោយនេះ ហើយ​ភាគ​ច្រើន​កើត​ឡើង​នៅ​ក្នុង​ប្រទេស​កំពុងអភិវឌ្ឍន៍។ សម្រាប់នៅកម្ពុជា ក៏កំពុងមានការកើនឡើងខ្លាំងផងដែរ។ បើតាមក្រសួងសុខាភិបាល ជំងឺទឹកនោមផ្អែម ដែលជាជំងឺមិនឆ្លងមួយប្រភេទ គឺជាឃាតករលាក់មុខនៅកម្ពុជា ដោយកាលពីមុន មនុស្សស្លាប់ដោយសារជំងឺឆ្លងច្រើនជាងស្លាប់ដោយសារជំងឺមិនឆ្លង ប៉ុន្តែបច្ចុប្បន្ននេះ ការស្លាប់ពីជំងឺមិនឆ្លងមានលើសពីពាក់កណ្ដាលហើយ៕

អត្ថបទ៖ ធឿន វ៉ាន់សុង