ក្រសួងសុខាភិបាលណែនាំពលរដ្ឋអនុវត្តវិធី៤យ៉ាងដើម្បីការពារខ្លួនពីជំងឺទឹកនោមផ្អែមប្រភេទទី២

ក្រសួងសុខាភិបាលបានធ្វើការណែនាំដល់ប្រជាពលរដ្ឋត្រូវអនុវត្តវិធី៤យ៉ាងដើម្បីបង្ការការពារខ្លួនពីជំងឺទឹកនោមផ្អែមប្រភេទទី២ប្រកបដោយប្រសិទ្ធិភាព ខណៈនៅប្រទេសកម្ពុជា ជំងឺទឹកនោមផ្អែមមានអត្រាមរណភាព ២% ក្នុងចំណោមករណីស្លាប់ទាំងអស់។

បើតាមក្រសួងសុខាភិបាល វិធី៤យ៉ាងនោះរួមមាន ទី១- ហាត់ប្រាណយ៉ាងតិច៣០នាទីរៀងរាល់ថ្ងៃ ទី២- កាត់បន្ថយការទទួលទានភេសជ្ជៈផ្អែម និងអាហារផ្អែម ទី៣- ចៀសវាងការប្រើប្រាស់គ្រឿងស្រវឹង និងផលិតផលថ្នាំជក់គ្រប់ប្រភេទនិងទី៤- ទទួលទានបន្លែឱ្យបានច្រើន និងផ្លែឈើស្រស់។

លោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល មានប្រសាសន៍ថា ជំងឺទឹកនោមផ្អែម នៅកម្ពុជា គឺជាជំងឺរ៉ាំរ៉ៃមួយ និងជាបញ្ហាប្រឈមផ្នែកសុខភាពដ៏ចម្បងមួយចំពោះបុគ្គល គ្រួសារ និងប្រព័ន្ធសុខាភិបាល។ ផ្អែកតាមការអង្កេតពីកត្តាហានិភ័យនៃជំងឺមិនឆ្លងនៅប្រទេសកម្ពុជាឆ្នាំ២០១៦បានឱ្យដឹងថា នៅប្រទេសកម្ពុជា ជំងឺទឹកនោមផ្អែមមានអត្រាម​រណភាព ២% ក្នុងចំណោមករណីស្លាប់ទាំងអស់ ហើយមានអត្រាប្រេវ៉ាឡង់ ៩,៦%។ ប៉ុន្តែបើយោងតាមការប៉ាន់ប្រមាណ​របស់អង្គការសុខភាពពិភពលោក ប្រជាជនកម្ពុជាជិត ៦ម៉ឺមនាក់ បានស្លាប់ជារៀងរាល់ឆ្នាំដោយសារជំងឺទឹកនោមផ្អែម និងជំងឺមិនឆ្លងផេ្សងទៀត ដែលស្មើនឹង ៦៤% នៃការស្លាប់ទាំងអស់ក្នុង ឆ្នាំ២០១៨។ ជំងឺទឹកនោមផ្អែមគឺជាមូលហេតុផ្ទាល់នៃការស្លាប់ដែលមានចំនួន ១,៥ លាននាក់ ចំពោះអ្នកដែលមានអាយុក្រោម ៧០ឆ្នាំ ក្នុងអត្រាស្លាប់ចំនួន ៤៨% នាឆ្នាំ២០១៩ នៅទូទាំងពិភពលោក។

លោករដ្ឋមន្ត្រី បានសង្កត់ធ្ងន់ថា កត្តាហានិភ័យនៃជំងឺទឹកនោមផ្អែមចម្បង គឺបណ្តាលមកពីទម្លាប់នៃការទទួលទានអាហារមិនល្អសម្រាប់ការទ្រទ្រង់សុខភាព និងទម្លាប់មិនបានបញ្ចេញពលកម្ម ឬធ្វើលំហាត់ប្រាណគ្រប់គ្រាន់ជាប់ជាប្រចាំ។ ជំងឺទឹកនោមផ្អែមអាចបង្កផលវិបាកដូចជា ជំងឺគាំងបេះដូង គ្រោះថ្នាក់សរសៃឈាមខួរក្បាល ពិការភ្នែក ខ្សោយតម្រងនោម និងពិការអវៈយវៈ។

ការព្យាបាលជំងឺទឹកនោមផ្អែម គឺត្រូវព្យាបាលអស់មួយជីវិត ក៏ប៉ុន្តែជំងឺទឹកនោមផ្អែមអាចបង្ការបានតាមរយៈការផ្លាស់ប្តូរឥរិយាបទ នៃការរស់នៅប្រកបដោយសុខភាពដូចជា ការបរិភោគអាហារដែលមានសុខភាពល្អ(កាត់បន្ថយអាហារផ្អែម ប្រៃ និងសម្បូរកាឡូរីលើសពីតំរូវការ) ព្រមទាំងការហាត់ប្រាណត្រឹមត្រូវទៀងទាត់ រក្សាទម្ងន់ក្នុងកម្រិតល្អ ការកាត់បន្ថយការទទួលទានគ្រឿងស្រវឹងប្រកបដោយគ្រោះថ្នាក់ និងឈប់ពិសារបារី៕

អត្ថបទ៖ សំអឿន