អ្នកវិទ្យាសាស្រ្តព្រមាន ជំងឺមួយនឹងចាប់ផ្តើមឆ្លងរាលដាល បន្ទាប់ពី កូវីដ១៩ (មានវីដេអូ)

ជំងឺឆ្លងកាលពីអតីតកាល អាចនឹងកើនឡើងវិញ បន្ទាប់ពីរោគរាតត្បាតកូវីដ-១៩ ប៉ុន្តែអ្នកជំនាញមិនទាន់ដឹងថាតើ វានឹងរីករាលដាលក្នុងកម្រិតណានោះទេ។

អ្នកជំនាញបានព្រមានថា ការឆ្លងជំងឺរបេងនៅជុំវិញពិភពលោក អាចកើនឡើង ដោយសារអ្នកជំងឺមួយចំនួនមិនបានធ្វើរោគវិនិច្ឆ័យ អំឡុងពេលមានវិបត្តិ។

លោកស្រីវេជ្ជបណ្ឌិត Laura Cleghorn មកពីសាកលវិទ្យាល័យ Dundee ក្នុងប្រទេសស្កុតឡែន បាននិយាយថា មានតម្រូវការជាបន្ទាន់ដើម្បីបង្កើតការព្យាបាលថ្មីៗសម្រាប់ជំងឺនេះ។

លោកស្រី Cleghorn អ្នកគ្រប់គ្រងផ្នែកស្រាវជ្រាវថ្នាំរបេងនៅសាកលវិទ្យាល័យ Dundee បាននិយាយថា កិច្ចខិតខំប្រឹងប្រែងយ៉ាងស្វាហាប់ក្នុងរយៈពេលជាច្រើនឆ្នាំមកនេះ បានចាប់ផ្តើមធ្វើឲ្យមានវឌ្ឍនភាពលើការកាត់បន្ថយបន្ទុកនៃជំងឺរបេងនៅជុំវិញពិភពលោក ប៉ុន្តែជំងឺរាតត្បាតកូវីដ១៩ ទំនងជាជះផលអវិជ្ជមានលើវឌ្ឍនភាពនេះ។

លោកស្រីបន្តថា “រឿងនេះត្រូវបានគេគិតថា ជាចម្បងដោយសារតែការកាត់បន្ថយលទ្ធភាពចូលទៅមជ្ឈមណ្ឌលពិនិត្យរោគរបេងនិងទទួលបានការព្យាបាល ដែលនឹងនាំឲ្យអ្នកជំងឺកាន់តែច្រើនមិនត្រូវបានគេធ្វើរោគវិនិច្ឆ័យ ហើយក្រោយមកមានការចម្លងជំងឺនេះនៅក្នុងសហគមន៍របស់ពួកគេ”។

ការផ្តោតសំខាន់លើការងារដែលនឹងប្រព្រឹត្តទៅក្នុងរយៈពេល៣ឆ្នាំទៀត នឹងយកចិត្តទុកដាក់លើជំងឺរបេង។ ទោះបីជាយ៉ាងណាក៏ដោយ ក្រុមអ្នកស្រាវជ្រាវក៏នឹងធ្វើការលើការបង្កើតវិធីព្យាបាលសម្រាប់ជំងឺគ្រុនចាញ់ និងរោគរាតត្បាតនាពេលអនាគតផងដែរ។

សាកលវិទ្យាល័យនេះបាននិយាយថា មុនពេលមានជំងឺរាតត្បាតកូវីដ១៩ ជំងឺរបេងគឺជាឃាតក ជំងឺឆ្លងឈានមុខគេរបស់ពិភពលោក ដែលទទួលខុសត្រូវចំពោះការស្លាប់មនុស្សចំនួន ១.៥ លាននាក់ក្នុងឆ្នាំ២០២០ខណៈមនុស្សប្រមាណ១០លាននាក់ បានឆ្លងជារៀងរាល់ឆ្នាំ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Daily Star

ចុចអាន៖ កូវីដបំប្លែងខ្លួនកូនកាត់ កំពុងរាលដាលនៅ ថៃ