WHO ៖ ករណីឆ្លងកូវីដលើលោកងើបឡើងវិញ ជាពិសេសអូមីក្រុងក្លាយពូជ BA.4 និង BA.5

អង្គការសុខភាពពិភពលោក (WHO) ព្រមានថា ករណីឆ្លងជំងឺកូវីដ ១៩ លើពិភពលោកកំពុងកើនឡើងសាជាថ្មី ហើយក៏អំពាវនាវឲ្យមានវិធានការទប់ស្កាត់ករណីឆ្លងជាបន្ទាន់ផងដែរ ។

នៅក្នុងសន្និសីទសារព័ត៌មានកាលពីថ្ងៃពុធ អគ្គនាយកអង្គការសុខភាពពិភពលោក Tedros Adhanom Ghebreyesus បាននិយាយថា ករណីឆ្លងដែលត្រូវបានរាយការណ៍ទូទាំងពិភពលោកបានកើនឡើងជិត ៣០ ភាគរយក្នុងរយៈពេល ២ សប្តាហ៍កន្លងមកនេះ ។

លោក​ Tedros បាន​ចង្អុល​បង្ហាញ​ថា ការកើនឡើងករណីឆ្លងកូវីដក៏មានចំណែកពីវីរុសបំប្លែងខ្លួនអូមីក្រុងក្លាយពូជប្រភេទ BA.4 និង BA.5 ដែលកំពុងគ្របដណ្ដប់​នៅ​អឺរ៉ុប និង​អាមេរិក ខណៈការធ្វើតេស្តរកមេរោគត្រូវបានកាត់បន្ថយនៅក្នុងប្រទេសជាច្រើន ដែលបិទបាំងរូបភាពពិតនៃករណីឆ្លង ។

លោក Tedros បាននិយាយថា ការការពាររបស់វ៉ាក់សាំងនឹងថយចុះ នៅពេលដែលមេរោគវិវឌ្ឍន៍ ទោះបីជាវានៅតែមានប្រសិទ្ធភាពក្នុងការការពាររោគសញ្ញាធ្ងន់ធ្ងរ និងការស្លាប់ក៏ដោយ ។

ជាចុងក្រោយប្រធាន WHO រូបនេះក៏បានអំពាវនាវឲ្យអ្នកដែលមានហានិភ័យខ្ពស់ រួមទាំងមនុស្សចាស់ និងបុគ្គលិកពេទ្យចាក់វ៉ាក់សាំងដូសជំរុញផងដែរ ហើយបានឲ្យមនុស្សបន្តពាក់ម៉ាស ប្រសិនបើពួកគេនៅកន្លែងដែលមានមនុស្សច្រើន ឬទីតាំងបិទជិតដែលគ្មានខ្យលចេញចូលជាដើម ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ អូមីក្រុងពូជថ្មី ២ ប្រភេទកំពុងគ្របដណ្ដប់ករណីឆ្លងកូវីដនៅ ថៃ