អ្នកជំនាញព្រមានថា អ្នកត្រលប់មកពីមើល World Cup នៅកាតា អាចឆ្លងជំងឺសាហាវ “ផ្តាសាយអូដ្ឋ”

អ្នកគាំទ្របាល់ទាត់ដែលវិលត្រលប់មកពីប្រទេសកាតា ត្រូវបានគេណែនាំឲ្យប្រុងប្រយ័ត្នចំពោះសញ្ញានៃជំងឺគ្រុនផ្តាសាយអូដ្ឋ ដែលជាជំងឺផ្លូវដង្ហើមដ៏សាហាវ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រោគសញ្ញាផ្លូវដង្ហើមមជ្ឈិមបូព៌ា (Mers) អាចឆ្លងតាមរយៈ ទំនាក់ទំនងជិតស្និទ្ធជាមួយសត្វអូដ្ឋ។ នេះបើយោងតាមទីភ្នាក់ងារសន្តិសុខសុខភាពចក្រភពអង់គ្លេស។

ស្ថាប័ននេះ បានព្រមានក្រុមគ្រូពេទ្យទូទាំងចក្រភពអង់គ្លេសឲ្យមានការប្រុងប្រយ័ត្នខ្ពស់ ចំពោះអ្នកគាំទ្រការប្រកួតបាល់ទាត់ពិភពលោក ដែលវិលត្រលប់មកវិញជាមួយរោគសញ្ញាដូចជា គ្រុនក្តៅ ក្អក ពិបាកដកដង្ហើម និងក្អួត។

សេចក្តីប្រកាសមួយបានឲ្យដឹងថា ហានិភ័យនៃការឆ្លងមេរោគនេះចំពោះអ្នករស់នៅចក្រភពអង់គ្លេសគឺទាបណាស់ ប៉ុន្តែអាចខ្ពស់ ចំពោះអ្នកដែលប្រឈមនឹងកត្តាហានិភ័យជាក់លាក់នៅក្នុងតំបន់ ដូចជាការប៉ះពាល់សត្វអូដ្ឋ។

មេរោគ Mers អាចឆ្លងតាមរយៈទំនាក់ទំនងជិតស្និទ្ធជាមួយសត្វអូដ្ឋ ឬពីការទទួលទានផលិតផលសត្វអូដ្ឋ ឧទាហរណ៍ដូចជា ទឹកដោះអូដ្ឋដែលមិនបានចម្អិន ជាដើម។

ហានិភ័យផ្សេងទៀតរួមមានទំនាក់ទំនងជិតស្និទ្ធជាមួយអ្នកឆ្លង។ អ្នកគាំទ្របាល់ទាត់ជាច្រើន ត្រូវបានគេរាយការណ៍ថា រីករាយនឹងការជិះអូដ្ឋក្នុងប្រទេសកាតា ខណៈពេលទៅគាំទ្រក្រុមជម្រើសជាតិអង់គ្លេសក្នុងការប្រកួតបាល់ទាត់ពិភពលោកឆ្នាំ២០២២។

គិតត្រឹមពេលនេះ ករណីជំងឺ Mers ចំនួន៥ករណី ត្រូវបានរាយការណ៍នៅក្នុងចក្រភពអង់គ្លេស ដោយការផ្ទុះឡើងចុងក្រោយបំផុត គឺនៅក្នុងខែសីហាឆ្នាំ២០១៨។

អង្គការសុខភាពពិភពលោក បានរាយការណ៍ថា ជំងឺនេះត្រូវបានគេទទួលស្គាល់ជាលើកដំបូងនៅក្នុងឆ្នាំ២០១២ ហើយចាប់តាំងពីពេលនោះមក មានករណីចំនួន ២៦០០ នៅទូទាំងពិភពលោក ដែលភាគច្រើនគឺស្ថិតនៅក្នុងឧបទ្វីបអារ៉ាប់។ 

ជាងមួយភាគបីនៃអ្នកឆ្លង ត្រូវបានគេរាយការណ៍ថា ស្លាប់ ហើយមិនមានការព្យាបាលជាក់លាក់សម្រាប់ជំងឺនេះទេ៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ ពិតទេ អតីតបវរកញ្ញាក្រូអាត នឹងស្រាតសម្លៀកបំពាក់ បើជម្រើសជាតិរបស់ខ្លួនឈ្នះពាន World Cup?