មានជំងឺខ្សោយតម្រងនោម បរិភោគអាហារទាំងនេះ អាចបណ្តាលឲ្យមានបញ្ហាធ្ងន់ធ្ងរ

ជំងឺតម្រងនោមភាគច្រើន គឺកើតឡើងបណ្តាលមកពីអ្នកដែលមានជំងឺលើសសម្ពាធឈាមដ៏រ៉ាំរ៉ៃ និងអ្នកដែលមានជំងឺទឹកនោមផ្អែម ហើយជំងឺមួយនេះ អាចវិវត្តរហូតឈានទៅដល់ការលាងឈាម ប្រសិនបើមិនបានគ្រប់គ្រងស្ថានភាពជំងឺឲ្យបានត្រឹមត្រូវ។​​   ​

លោកវេជ្ជបណ្ឌិត នីវ រត្នវីរៈ ឯកទេសតម្រងនោម និងលាងឈាម បម្រើការងារនៅមន្ទីរពេទ្យកាល់ម៉ែត នៅក្នុងកិច្ចសម្ភាសពិសេសជាមួយសារព័ត៌មានកម្ពុជាថ្មី បានឲ្យដឹងថា ប៉ូតាស្យូម អាចបណ្តាលអ្នកជំងឺខ្សោយតម្រងនោមមានគ្រោះថ្នាក់ដល់បេះដូង ឧទាហណ៍ដូចជា ជំងឺគាំងបេះដូងជាដើម។ ដូច្នេះហើយ អ្វីដែលអ្នកជំងឺខ្សោយតម្រងនោមត្រូវប្រយ័ត្នបំផុត គឺអាហារដែលសម្បូរទៅដោយជាតិប៉ូតាស្យូម​ ដែលអាចបណ្តាលឲ្យជំងឺមានការវិវត្តទៅជាជំងឺផ្សេងៗទៀត។

លោកវេជ្ជបណ្ឌិតដដែលរូបនេះ បានបន្ថែមទៀតថា ជាទូទៅនៅក្នុងប្រទេសកម្ពុជា ជាតិប៉ូតាស្យូម ភាគចច្រើន គឺសម្បូរនៅក្នុងបន្លែ និងផ្លែឈើ (ចេក ទឹកដូងជាដើម) ។ល។ ប៉ូតាស្យូម គឺជាតិរ៉ែដែលមាននៅក្នុងរបបអាហារមួយចំនួន វាក៏ផ្តល់ផលប្រយោជន៍សម្រាប់អ្នកដែលមានសុខភាពធម្មតា​ ប៉ុន្តែ សម្រាប់អ្នកដែលមានបញ្ហាខ្សោយតម្រងនោម គឺត្រូវជៀសវាងប្រភេទអាហាដែលមានជាតិប៉ូតាស្យូម មានដូចជា ចេក ប័រ ដំឡូងបារាំង​ ផ្លែឈើជូរៗ និងគ្រាប់ធញ្ញជាតិជាដើម។

ក្នុងករណីដែលអ្នកមានបញ្ហាខ្សោយតម្រងនោមធ្ងន់ធ្ងរ គួរជៀសវាងនូវការបរិភោគប្រភេទអាហារដែលសម្បូរទៅដោយជាតិប៉ូតាស្យូម ដែលធ្វើឲ្យមានការកើនឡើងនូវកម្រិតប៉ូតាស្យូមក្នុងឈាម​​ និងអាចឈានទៅដល់ការលាងឈាមជាប្រចាំ ហើយអាចប្រឈមគ្រោះថ្នាក់ដល់អាយុជីវិត៕