ជំនោរ Art ចង់ពង្រីកសិល្បៈគំនូរនៅខេត្តបាត់ដំបង ជាទីផ្សារសិល្បៈក្នុងតំបន់អាស៊ី នាអនាគត

ព្រឹត្តិការណ៍ “ជំនោរ Art” មានគោលបំណង ចង់ពង្រីកសិល្បៈគំនូរនៅខេត្តបាត់ដំបង ឱ្យក្លាយទៅជាទីផ្សារសិល្បៈមួយក្នុងតំបន់អាស៊ី នាពេលអនាគត ដើម្បីទាក់ទាញភ្ញៀវទេសចរណ៍ ទាំងភ្ញៀវជាតិ និងអន្តរជាតិ មកចូលទស្សនាព្រឹត្តិការណ៍នេះ ដើម្បីទាញជាប្រយោជន៍ដល់សហគមន៍ និងអ្នកសិល្បៈ ឱ្យមានការគាំទ្រកាន់តែច្រើនជាងមុន។

លោក ឃួន ដេត សហស្ថាបនិក​នៃ​អង្គការ​ហ្វារ​ពន្លឺសិល្បៈ​ មានប្រសាសន៍ប្រាប់ “កម្ពុជាថ្មី” នៅថ្ងៃនេះបន្ថែមថា “ជំនោរ Art” ជាព្រឹត្តិការណ៍ដែលរៀបចំដោយសិល្បករអាជីព សិល្បករឯករាជ្យ នៅខេត្តបាត់ដំបង និងបណ្ដាខេត្តផ្សេងៗដែលរួមគ្នារៀបចំ ដោយការទំនុកបម្រុង និងគាំទ្រពីក្រុមហ្វាពន្លឺសិល្បៈ។

លោកបញ្ជាក់បន្ថែមថា សិល្បករអាជីពចូលរួមសហការគ្នាទាំងអស់គ្នានេះ អត់មានទទួលកម្រៃថវិកាពីខាងណាទេ ព្រោះពួកគាត់ចង់ឱ្យសិល្បៈរស់រវើកនៅខេត្តបាត់ដំបង ដែលជាខេត្តសិល្បៈ ដើម្បីចូលរួមផ្សព្វផ្សាយ និងអភិវឌ្ឍសិល្បៈ។

ព្រឹត្តិការណ៍ “ជំនោរ Art” នឹងប្រព្រឹត្តទៅក្នុងរយៈពេល ៣ថ្ងៃ នៅថ្ងៃទី ២៥-២៦-២៧ ខែវិច្ឆិកានេះ នៅក្រុងបាត់ដំបង ដោយមានការចូលរួមពី អ្នករចនាសំលៀកបំពាក់ អ្នករាំ តួសម្តែង វិចិត្រករ អ្នកថតរូប និងសិល្បករសម្តែងមកពី ហ្វារពន្លឺសិល្បៈ៕