KPT+

អ្នកនិពន្ធ តុន ច័ន្ទរិទ្ធ ឈ្នះពានរង្វាន់ជយលាភី ៥ លើក ផ្ទួនៗគ្នា ផ្នែកអត្ថបទរឿងខ្លី និងការប្រកួតនិយាយជាសាធារណៈ

បានផុស

២ years មុន

នៅ

ថ្ងៃចន្ទ ១១ កញ្ញា ២០២៣

ដោយ

លោក តុន ច័ន្ទរិទ្ធិ ជាអ្នកនិពន្ធមួយរូប ដែលត្រូវបានអ្នកស្នេហាវិស័យការអានទទួលស្គាល់។ ក្រៅពីនេះ លោកក៏ត្រូវបានលេចមុខតាមរយៈសារព័ត៌មានជាតិ អន្តរជាតិ ប៉ុស្តិ៍ទូរទស្សន៍ និងកម្មវិធីផ្សេងៗ ជាញឹកញាប់ផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាមួយគ្នានេះ ដំណើរនៅក្នុងវិស័យតែងនិពន្ធ លោក តុន ច័ន្ទរិទ្ធិ បានបន្សល់ទុកនូវសមិទ្ធផល និងស្នាដៃតែងនិពន្ធមួយចំនួនដូចជា ៖

១.ម្ចាស់ជយលាភីលេខ ១ របស់ពានរង្វាន់ពុទ្ធសាសនបណ្ឌិត្យក្នុងឆ្នាំ ២០២២ រឿង “សង្គមនេះ”។

២.ម្ចាស់ជយលាភីលេខ ៤ របស់ពានរង្វាន់ព្រះនាងឥន្ទ្រទេវី ឆ្នាំ ២០២២ រឿង “បាសាក់”។

៣.ម្ចាស់ជយលាភីលេខ ១ ប្រកួតសំណេរ និងនិយាយសាធារណៈរបស់ក្រសួងអប់រំ ក្នុងឆ្នាំ ២០២២ ក្រោមប្រធានបទដែលទាក់ទងនឹង“ហាមឃាត់ការផ្សាយគ្រឿងស្រវឹង”។

៤.ម្ចាស់ជយលាភីលេខ ២ ប្រកួតសំណេរ និងនិយាយសាធារណៈរបស់អង្គការសុខភាពដើម្បីកម្ពុជាឆ្នាំ ២០២១ ក្រោមប្រធានបទដែលទាក់ទងនឹង“ថ្នាំជក់ក្នុងប្រទេសកម្ពុជា”។

៥.ម្ចាស់ជយលាភីលេខ ២ ក្នុងការប្រកួតសរសេររឿងបែបល្ខោនវិទ្យុ របស់ CCIM ក្នុងឆ្នាំ ២០២១ រឿង “ខ្ញុំខុសអី?”។

លោក តុន ច័ន្ទរិទ្ធិ ជាយុវជនស្រឡាញ់ការអាន និងស្រាវជ្រាវ ហើយក៏ជាអ្នកនិពន្ធរូបដែលបានបោះពុម្ពផ្សាយស្នាដៃរបស់លោកជាច្រើនទៀតមានដូចជា ៖ អត្ថបទ “អ្នកពិតជាពិសេស តោះ! ទៅមុខទៀត” និងអត្ថបទប្រលោមលោកដ៏ពេញនិយមផ្សេងមួយទៀតដែរនោះ គឺ “និទានម៉ែ” ដែលជាអត្ថបទទទួលបានប្រជាប្រិយភាពខ្លាំង និងបានចាក់ចំបេះដូងស្រទាប់យុវវ័យ និងអ្នកអានផ្សេងៗទៀត ឲ្យជក់ចិត្តដិតអារម្មណ៍នៅពេលបានអានស្នាដៃរបស់លោករួចមក។

អ្នកនិពន្ធ តុន ច័ន្ទរិទ្ធិ កើតនៅថ្ងៃទី ១៣ ខែវិច្ឆិកា ឆ្នាំ ១៩៩៦ មានស្រុកកំណើតនៅស្រុកមោងឬស្សី ខេត្តបាត់ដំបង។ លោក តុន ច័ន្ទរិទ្ធិ កើតក្នុងត្រកូលគ្រួសារជាកសិករ។ លោកមានឪពុកឈ្មោះ ទុំ សុផល និងម្ដាយឈ្មោះ ហង្ស សាមាន។ អ្នកនិពន្ធរូបនេះ មានបងប្អូនចំនួន ២ នាក់ ហើយលោកជាកូនទី ២។

អ្នកនិពន្ធ តុន ច័ន្ទរិទ្ធិ បានបញ្ចប់ថ្នាក់វិទ្យាល័យនៅឆ្នាំ ២០១៣ នាដែនដីស្រុកកំណើតរបស់ខ្លួន គឺ វិទ្យាល័យមោងឬស្សី។ លោក តុន ច័ន្ទរិទ្ធិ ដោយសារតែមហិច្ឆតា និងក្តីស្រមៃ ដើម្បីក្លាយជាអ្នកនិពន្ធម្នាក់ លោកក៏បានចាកចេញពីស្រុកកំណើតរបស់ខ្លួន ដើម្បីបន្តការសិក្សានៅឯរាជធានីភ្នំពេញ នាសាលាវិទ្យាល័យភូមិន្ទភ្នំពេញ ដោយជ្រើសរើសទៅលើជំនាញ បរិញ្ញាបត្រ អក្សរសាស្ត្រខ្មែរ។

លោក តុន ច័ន្ទរិទ្ធិ កំឡុងពេលរៀននៅសាកលវិទ្យាល័យ លោកខិតខំក្រេបជញ្ជក់យកចំណេះដឹង និងប្រឹងប្រែងចូលរួមសកម្មភាពសង្គម ក៏ដូចជាវគ្គហ្វឹកហ្វឺននានាទាក់ទងនឹងការតែងនិពន្ធ ដើម្បីដុសខាត់សមត្ថភាពរបស់ខ្លួន។ នាឆ្នាំ ២០១៩ លោកបានសម្រេចក្តីស្រមៃ និងបោះពុម្ពផ្សាយស្នាដៃដំបូងរបស់ខ្លួនដែលមានចំណងជើងថា “អ្នកពិតជាពិសេស តោះ! ទៅមុខទៀត”៕

អត្ថបទ ៖ សួស សិត