អគ្គស្នងការរងនគរបាលជាតិកម្ពុជា ជួបប្រជុំជាមួយ​ជំនួយ​ការ​ប្រធាន​សេនាធិការ នៃ​អគ្គបញ្ជាការ​កងទ័ព​ជាន់ខ្ពស់​ថៃ នៅ​ទី​ក្រុង​កូឡាឡាំពួរ

ម៉ាឡេស៊ី ៖ ដោយ​ទទួល​បាន​ការ​អនុញ្ញាតដ៏ខ្ពង់ខ្ពស់ពី លោក នាយឧត្តមសេនីយ៍ ស ថេត អគ្គស្នងការនគរបាលជាតិ ចាប់ពីថ្ងៃទី២០-២៣ ខែតុលា ឆ្នាំ២០២៥ លោកឧត្តមសេនីយ៍ឯក ស៊ាង ធារិទ្ធ អគ្គស្នងការរងនគរបាលជាតិកម្ពុជា អញ្ជើញចូលរួមកិច្ច​ប្រជុំ​ពាក់ព័ន្ធ​នឹង​បញ្ហា​បទ​ល្មើស​ឆ្លងដែន របស់ក្រុមលេខាធិការដ្ឋាននៃ គណៈកម្មាធិការព្រំដែនទូទៅកម្ពុជា-ថៃ (GBC) នៅទី​ក្រុងកូឡាឡាំពួរ ប្រទេសម៉ាឡេស៊ី។

នៅថ្ងៃទី២១ ខែតុលា ឆ្នាំ២០២៥នេះ គឺ​ជា​ថ្ងៃទីពីរ នៃកិច្ចប្រជុំក្រុមលេខាធិការគណៈកម្មាធិការព្រំដែន​ទូទៅ​កម្ពុជា-ថៃ (GBC) ដែលលោកឧត្តមសេនីយ៍ឯក ស៊ាង ធារិទ្ធ បានអញ្ជើញជួបប្រជុំដោយឡែក ជាមួយភាគីថៃ ដើម្បីពិនិត្យលើសេចក្តីព្រាងផែនការ​សកម្មភាពសម្រាប់កិច្ច​សហប្រតិបត្តិការលើកការទប់ស្កាត់ និងបង្ក្រាបបទល្មើសឆ្លងដែន រួមទាំងការឆបោកតាមប្រព័ន្ធបច្ចេកវិទ្យា និងការជួញដូរមនុស្ស។

គួរ​បញ្ជាក់ដែរ​ថា ការ​ពិភាក្សា​លើសេចក្តីព្រាងផែនការ​សកម្មភាពសម្រាប់កិច្ច​សហប្រតិបត្តិការលើការទប់ស្កាត់ និងបង្ក្រាបបទល្មើសឆ្លងដែន រួម​ទាំងការ​ឆបោកតាមប្រព័ន្ធបច្ចេកវិទ្យា និងការជួញដូរមនុស្ស អនុលោមតាមស្មារតី កិច្ចប្រជុំពិសេសលើកទី១ របស់គណៈកម្មាធិការព្រំដែនទូទៅ GBC កាលពីថ្ងៃទី១០ ខែកញ្ញា ឆ្នាំ២០២៥ និងអនុលោមតាមកិច្ចប្រជុំលើកទី១ កម្ពុជា-ថៃ កាលពីថ្ងៃទី១៦ ខែកញ្ញា ឆ្នាំ២០២៥ ដើម្បី​បង្កើត​ផែនការសកម្មភាពសម្រាប់កិច្ចសហប្រតិបត្តិការទប់ស្កាត់ និងបង្រ្កាបបទល្មើសឆ្លងដែន រួមទាំងបទល្មើសឆបោកតាមប្រព័ន្ធបច្ចេកវិទ្យា និង​បទល្មើស​ជួញដូរមនុស្ស។

សូមជម្រាបជូនថា រាជរដ្ឋាភិបាលកម្ពុជា បានប្តេជ្ញាប្រយុទ្ធប្រឆាំងរាល់បទល្មើសឧក្រិដ្ឋកម្មឆ្លងដែន រួមទាំងការឆបោកតាមប្រព័ន្ធបច្ចេកវិទ្យា។ ជាមួយគ្នានេះ កម្ពុជាសង្ឃឹមថា រដ្ឋាភិបាលថៃនឹងធ្វើការប្តេជ្ញាចិត្តដូចកម្ពុជាផង​ដែរ ដើម្បី​ធានា​សុខសុវត្ថិភាពដល់ប្រជាពលរដ្ឋរៀងៗ​ខ្លួន ខណៈ​ពេល​ដែល​ការ​ឆបោកតាមប្រព័ន្ធបច្ចេកវិទ្យា បាន​នឹងកំពុងកើនឡើង​គួរឱ្យព្រួយបារម្ភនៅក្នុងតំបន់ ក៏​ដូច​ជា​សកល​លោក​ទាំងមូល៕