ច្បាប់កាតព្វកិច្ចយោធា នឹងត្រូវប្រកាសជាប្រញាប់ តម្រូវឱ្យពលរដ្ឋខ្មែរអាយុ១៨-២៥ឆ្នាំបំពេញកាតព្វកិច្ច ចំពោះស្ត្រីតាមការស្ម័គ្រចិត្ត

ច្បាប់ស្តីពីកាតព្វកិច្ចយោធា នឹងត្រូវបានប្រកាសជាការប្រញាប់ ដោយតម្រូវឱ្យពលរដ្ឋខ្មែរមានអាយុចាប់ពី១៨ឆ្នាំដល់ទៅ២៥ឆ្នាំ ត្រូវបំពេញកាតព្វកិច្ចចូលហ្វឹកហាត់ ក្នុងនោះស្ត្រីត្រូវផ្អែកតាមគោលការណ៍ស្ម័គ្រចិត្ត។ នេះបើតាមសេចក្ដីប្រកាសព័ត៌មានរបស់អង្គភាពអ្នកនាំពាក្យរាជរដ្ឋាភិបាលកម្ពុជា ស្ដីពីលទ្ធផលនៃកិច្ចប្រជុំក្រោយកិច្ចប្រជុំពេញអង្គរគណៈរដ្ឋមន្ត្រីបានពិនិត្យ និងអនុម័តក្នុងកិច្ចប្រជុំនៃព្រឹកថ្ងៃទី២៣ ខែមេសា ឆ្នាំ២០២៦ នេះ។

បើតាមអង្គភាពអ្នកនាំពាក្យរាជរដ្ឋាភិបាលកម្ពុជា សេចក្តីព្រាងច្បាប់នេះ មាន ៨ជំពូក និង ២០មាត្រា ត្រូវបានរៀបចំឡើងក្នុងគោលបំណងដើម្បីអនុវត្ត មាត្រា៤៩ថ្មី នៃរដ្ឋធម្មនុញ្ញនៃព្រះរាជាណាចក្រកម្ពុជា ដោយកំណត់អំពីវិធាននៃការអនុវត្ត កាតព្វកិច្ចយោធា ដើម្បីរួមចំណែកកសាងប្រទេសជាតិ និងការពារមាតុភូមិ ដែលជាកាតព្វកិច្ចចាំបាច់និងជាកិត្តិយស ដ៏ឧត្តុង្គឧត្តមរបស់ប្រជាពលរដ្ឋខ្មែរ និងជាមូលដ្ឋានគ្រឹះនៃប្រភពកសាងកម្លាំងសម្រាប់វិស័យការពារជាតិ និង ការអភិវឌ្ឍកាយសម្បទា ព្រមទាំងការបណ្តុះស្មារតីស្នេហាជាតិ ការអប់រំផ្នត់គំនិត និងវិន័យ ដែលជាតម្រូវការរបស់ ប្រទេសជាតិ។

អង្គភាពអ្នកនាំពាក្យរាជរដ្ឋាភិបាលកម្ពុជាសង្កត់ធ្ងន់ដូច្នេះ ៖« សេចក្តីព្រាងច្បាប់នេះ មានវិសាលភាពអនុវត្តចំពោះប្រជាពលរដ្ឋខ្មែរគ្រប់រូបមានអាយុ ចាប់ពី១៨ (ដប់ប្រាំបី) ឆ្នាំ ដល់ ២៥ (ម្ភៃប្រាំ)ឆ្នាំ ដែលត្រូវបំពេញកាតព្វកិច្ចយោធា តាមការកំណត់នៃច្បាប់នេះ។ ដោយឡែក ការបំពេញកាតព្វកិច្ចយោធារបស់ប្រជាពលរដ្ឋខ្មែរជាស្ត្រី ត្រូវផ្អែកតាមគោលការណ៍ស្ម័គ្រចិត្ត។ ច្បាប់នេះត្រូវបានប្រកាសជាការប្រញាប់។ »។

អង្គភាពអ្នកនាំពាក្យរាជរដ្ឋាភិបាលកម្ពុជារំលឹកថា កន្លងមកព្រះរាជាណាចក្រកម្ពុជា មានច្បាប់ស្តីពីកាតព្វកិច្ចយោធា ដែលត្រូវបានប្រកាសឱ្យប្រើកាលពីថ្ងៃទី២២ ខែធ្នូ ឆ្នាំ២០០៦ និងលិខិតបទដ្ឋានគតិយុត្តពាក់ព័ន្ធ ផ្សេងទៀត។ ប៉ុន្តែច្បាប់ស្តីពីកាតព្វកិច្ចយោធាឆ្នាំ២០០៦ ពុំទាន់គ្របដណ្តប់គ្រប់ជ្រុងជ្រោយក្នុងពេលបច្ចុប្បន្ន និងអនាគត ដែលតម្រូវឱ្យមានការរៀបចំច្បាប់នេះជាថ្មី។

«កងយោធពលខេមរភូមិន្ទ បាន និងកំពុងអនុវត្តភារកិច្ចការពារជាតិ ចូលរួមក្នុងការអភិវឌ្ឍនសង្គម និងជួយសង្គ្រោះគ្រប់រូបភាព និងអនុវត្តរាល់បទបញ្ជារបស់រាជរដ្ឋាភិបាលទាន់ពេលវេលានិងមានប្រសិទ្ធភាព។»។ អង្គភាពអ្នកនាំពាក្យរាជរដ្ឋាភិបាលបន្តអះអាងដូច្នេះ។

គួររម្លឹកថា ក្នុង​ពិធីអបអរខួប​ទី​៣២​ទិវា​កង​រាជអាវុធហត្ថកាលពី​ថ្ងៃទី​១៤ ខែ​កក្កដា ឆ្នាំ២០២៥​ នាយករដ្ឋមន្ត្រី​កម្ពុជា សម្ដេច​ធិបតី ហ៊ុន ម៉ាណែត បានប្រកាសថា​ចាប់​ពី​ឆ្នាំ២០២៦​តទៅកម្ពុជា​នឹង​ចាប់​អនុវត្តច្បាប់​កាតព្វកិច្ច​យោធាដែល​នឹង​ជួយ​ដល់​ការ​បង្កើន​បរិមាណ​ និងប្រសិទ្ធភាព​កង​ទ័ព​នៅ​កម្ពុជា​។ កាលណោះសម្ដេច​បាន​ណែនាំឱ្យ​​ធ្វើ​វិសោធនកម្មច្បាប់​ឱ្យបន្ថែមរយៈពេល​បំពេញ​កាតព្វកិច្ចដល់​២ឆ្នាំ​។

​សម្ដេច ​ ហ៊ុន ម៉ាណែត បានចាត់ទុកថា ច្បាប់ស្ដីពីកាតព្វកិច្ចយោធា គឺ​ជា​ផ្នែក​មួយ​នៃ​ការ​កសាង​កម្លាំង​ទ័ព​នៅ​កម្ពុជា​ ដែល​នឹង​ជួយឱ្យមាន​យោធិន​គ្រប់​គ្រាន់​សម្រាប់​បំពេញ​ការងារ និងជួយ​កសាង​កម្លាំង​ធនធាន​ដែល​មាន​វិន័យ​ចូល​ក្នុង​សង្គម​ផងដែរ៕