ករណីជំរិតទារប្រាក់ស្លាប់ក្មេងស្រីអាយុ៥ឆ្នាំនៅខេត្តកណ្ដាល មន្ត្រីជំនាញឃាត់ខ្លួនម្ដាយមីងបង្កើតជនរងគ្រោះម្នាក់ទៀត

ករណីចាប់់ជំរិតទារប្រាក់លើក្មេងស្រីអាយុ៥ឆ្នាំ នៅស្រុកស្អាង ខេត្តកណ្ដាល ដែលបណ្ដាលឲ្យក្មេងស្រីរងគ្រោះបាត់បង់ជីវិតកាលពីកន្លងទៅ មកពេលនេះកម្លាំងជំនាញបានស្រាវជ្រាវឃាត់ខ្លួនស្ត្រីវ័យ២៧ឆ្នាំម្នាក់ទៀត ដែលត្រូវជាម្ដាយមីងបង្កើតរបស់ជនរងគ្រោះ ហើយក៏ត្រូវជាប្រពន្ធរបស់ជនសង្ស័យដែលត្រូវបានកម្លាំងសមត្ថកិច្ចឃាត់ខ្លួនពេលកើតហេតុភ្លាមៗផងដែរ។​ ស្ត្រីសង្ស័យរូបនេះ ត្រូវបានកម្លាំងជំនាញឃាត់ខ្លួនកាលពីថ្ងៃទី១៤ ខែឧសភា ឆ្នាំ២០២៦ បន្ទាប់ពីកិច្ចប្រតិបត្តិការយ៉ាងសកម្ម និងហ្មត់ចត់របស់ស្នងការដ្ឋាននគរបាលខេត្តកណ្តាល សហការជាមួយអង្គភាពជំនាញពាក់ព័ន្ធ ពិនិត្យ និងវិភាគយ៉ាងល្អិតល្អន់ទៅលើភស្តុតាង និងអង្គហេតុជុំវិញការស្លាប់របស់ជនរងគ្រោះ។

ជនសង្ស័យជាស្ត្រីរូបនេះ នឹងត្រូវបាណបញ្ជូនទៅកាន់សាលាដំបូងខេត្តកណ្តាលនៅថ្ងៃសុក្រ ទី១៥ឧសភា នេះ ដើម្បីអនុវត្តនីតិវិធីចោទប្រកាន់ជាផ្លូវការពីបទ «ចាប់ជំរិត និងឃាតកម្មលើកុមារ»។ ទោះបីមានការឃាត់ជនសង្ស័យទី២ក៏ពិតមែន សមត្ថកិច្ចជំនាញក៏កំពុងបន្តកិច្ចប្រតិបត្តិការស៊ើបអង្កេតយ៉ាងសកម្មបន្ថែមទៀត ដើម្បីធានាថា គ្រប់បុគ្គលដែលពាក់ព័ន្ធទាំងអស់ត្រូវតែទទួលខុសត្រូវចំពោះមុខច្បាប់ជាដាច់ខាត។

សូមជម្រានថា ករណីចាប់ជំរិតទារប្រាក់លើក្មេងស្រីអាយុ៥ឆ្នាំបណ្ដាលឲ្យជនរងគ្រោះស្លាប់នេះ បានកើតឡើងនៅវេលាម៉ោង០៨និង៣០នាទី ថ្ងៃទី១០ ខែឧសភា ឆ្នាំ២០២៦ នៅចំណុចផ្ទះជនដៃដល់ឈ្មោះ គីម វណ្ណា ស្ថិតនៅភូមិកូនជ្រែ ឃុំព្រែកអំបិល ស្រុកស្អាង ខេត្តកណ្ដាល។ របាយការណ៍ជនដៃដល់ត្រូវជាពូសាច់ថ្លៃរបស់ជនរងគ្រោះ។

នៅចំពោះមុខសមត្ថកិច្ច ជនដៃដល់បានឆ្លើយសារភាពថា ខ្លួនពិតជាបានធ្វើសកម្មភាពតែម្នាក់ឯង ចាប់ឃុំឃាំង និងចាប់ជំរិតទារប្រាក់បណ្តាលឱ្យជនរងគ្រោះស្លាប់ ពិតប្រាកដមែន ដោយសារខឹងម្តាយជនរងគ្រោះមើលងាយក្រុមគ្រួសារខ្លួន និងខ្ចីលុយពីម្តាយជនរងគ្រោះមិនបាន។

តាមរយៈសាររប​ស់ជនដៃដល់ដែលបានផ្ញើទៅឪពុកម្តាយកុមារីរងគ្រោះ ជនដៃដល់បានបង្ខំឲ្យពួកគេផ្ញើលុយចំនួន ១ម៉ឺនដុល្លារតាមវីងឲ្យខ្លួន ដោយទុកពេលត្រឹម១ម៉ោងប៉ុណ្ណោះ បើលើសម៉ោងកំណត់សូមរង់ចាំសពកូនស្រីចុះ ហើយជនដៃដល់ក៏បានគំរាមកុំប្រាប់រឿងនេះដល់នគរបាល និងអ្នកជិតខាងដែរ៕