យន្តការ​ចំនួន ៤ ​ជំហានឆ្ពោះ​​ដោះស្រាយបញ្ហា​​រវាង​អតិថិជន​ជាមួយ​គ្រឹះស្ថាន​​ហិរញ្ញវត្ថុ

នៅក្នុងវេទិកាពិភាក្សារវាងស្ថាប័នអ្នក​សារព័ត៌មាន និងអ្នកជំនាញក្នុងវិស័យហិរញ្ញវត្ថុ ដែលធ្វើឡើងក្រោមប្រធានបទ «ការលើកកម្ពស់ការប្រើប្រាស់ឥណទាន ប្រកបដោយសុវត្ថិភាព» លោក ហេង កូយ នាយកមជ្ឈមណ្ឌលការពារអ្នកប្រើប្រាស់សេវាហិរញ្ញវត្ថុបានគូសបញ្ជាក់ថា ស្របពេលដែលវិស័យធនាគារមានការរីក​ចម្រើនលឿន ប៉ុន្តែ​កង្វះ​យន្តការការពារអ្នកប្រើប្រាស់ អាច​បណ្តាល​ឱ្យមានបញ្ហានាំ​ផលប៉ះពាល់ដល់សង្គម។

ដើម្បីទប់ស្កាត់ និងកាត់បន្ថយបញ្ហាផ្សេងៗពីការប្រើប្រាស់កម្ចី លោកបានលើកពី​យន្តការ​ដែលអតិថិជន​អាច​ស្វែងរក​នៅពេលជួប​បញ្ហា តាមរយៈ​ការ​សម្របសម្រួលឱ្យ​មាន​ដំណោះស្រាយរួមមួយ ដែលអាច​ទទួលយកបាន​។

លោក​លើកពី​ជំហាន​​ការ​​ផ្តល់សេវាដោះស្រាយបញ្ហាក្រៅប្រព័ន្ធតុលាការចំនួន ៤ ដើម្បីទប់ស្កាត់ និងកាត់បន្ថយបញ្ហាផ្សេងៗពីការប្រើប្រាស់កម្ចី​របស់​អតិថិជនរួមមាន៖

១. កម្រិតគ្រឹះស្ថាន គឺអតិថិជនអាច​​ព្យាយាមទាក់ទងនិងដោះស្រាយជាមួយគ្រឹះស្ថានធនាគារ ឬហិរញ្ញវត្ថុផ្ទាល់

២. ប្រសិន​បើ​មិនពេញចិត្ត​នឹង​ដំណោះស្រាយ​នៅ​កម្រិត​ទី១ ឬ​ខ្លាច​ការគាបសង្កត់ អតិថិជន​អាច​ទាក់ទង​មក​មជ្ឈមណ្ឌល​តាម​រយៈលេខទូរសព្ទ (Hotline) ដែល​មាន​ភ្ជាប់​នៅក្នុងកុងត្រា​ប្រាក់កម្ចី

៣. ប្រសិន​បើ​ដំណោះស្រាយ​នៅកម្រិតទី ២ នៅតែ​មិន​អាច​ទទួល​យក​បាន អតិថិជន​អាច​បន្តដាក់​ពាក្យបណ្តឹង​ទៅកាន់​ធនាគារ​ជាតិ​នៃ​កម្ពុជា ឬ​អាជ្ញាធរ​ពាក់​ព័ន្ធ

៤. ជាជម្រើស​ចុងក្រោយ អតិថិជន​មាន​សិទ្ធិ​ស្ម័គ្រចិត្ត​ប្តឹង​ទៅ​តុលាការ​នៅ​ដំ​ណាក់​កាល​ណា​ក៏​បាន។

លោក ហេង កូយ បាន​បញ្ជាក់​​ថា ចំពោះដំណើរការដោះស្រាយរបស់មជ្ឈមណ្ឌលគឺមានភាពសាមញ្ញ ដោយអតិថិជនអាចទាក់ទងតាមរយៈទូរស័ព្ទ (Hotline) ដែលមានដាក់នៅលើកិច្ចសន្យាប្រាក់កម្ចី។ មជ្ឈមណ្ឌលអាចជួយ​ដោះស្រាយដោយធ្វើជាភ្នាក់ងារកណ្តាលដោយមិនបាច់ឱ្យភាគីជួបគ្នាឬអាចហៅភាគីទាំងពីរមកជួបប្រជុំទល់មុខគ្នា។

លោកអះអាងថា ក្នុងរយៈពេលមួយឆ្នាំកន្លងទៅ មជ្ឈមណ្ឌលទទួលបានការទាក់ទងពីប្រជាពលរដ្ឋជាង ២០០០នាក់ ហើយមជ្ឈមណ្ឌលអាចជួយដោះស្រាយបញ្ហាបានជោគជ័យជាង ៨០% នៃករណីសរុបទាំងអស់។

លោក ហេង កូយ បាន​លើកឡើងពីសិទ្ធិរបស់អតិថិជន ក្នុងការទទួលបានសេវាហិរញ្ញវត្ថុដោយកិត្តិយស និងសេចក្តីថ្លៃថ្នូរ ដោយ​មិនរងការប្រមាថ ប៉ុន្តែលោកក៏​ក្រើនរំលឹកអំពីទំនួលខុសត្រូវ​របស់អតិថិជនលើការ​ប្រើប្រាស់ប្រាក់កម្ចីឱ្យចំគោលដៅ។

លោកណែនាំឲ្យអតិថិជនត្រូវអាន និងស្វែងយល់លក្ខខណ្ឌកុងត្រាឱ្យច្បាស់មុននឹងចុះហត្ថលេខា។ ចំណែកឯគ្រឹះស្ថានវិញ ក៏មានកាតព្វកិច្ចពន្យល់លម្អិតអំពីហានិភ័យ និងផលប្រយោជន៍នានាឱ្យអតិថិជនយល់ច្បាស់ជាមុនផងដែរ។

ពាក់ព័ន្ធការជ្រើសរើសគ្រឹះស្ថានហិរញ្ញវត្ថុសម្រាប់ប្រើប្រាស់សេវាហិរញ្ញវត្ថុ លោកលើកទឹកចិត្តអតិថិជនត្រូវប្រើប្រាស់សេវាកម្មតែជាមួយគ្រឹះស្ថានស្របច្បាប់ ដែលមានអាជ្ញាប័ណ្ណពីធនាគារជាតិប៉ុណ្ណោះ។

បើតាមលោក ហេង កូយ គ្រឹះស្ថានស្របច្បាប់មានស្តង់ដារត្រឹមត្រូវ មានយន្តការ​វាយតម្លៃប្រវត្តិឥណទានអតិថិជនច្បាស់លាស់ តាមរយៈក្រុមហ៊ុនព័ត៌មានឥណទានកម្ពុជា (CBC) និងមានគោលនយោបាយជួយសម្រួលដល់អតិថិជននៅពេលជួបបញ្ហាលំបាក។ ផ្ទុយទៅវិញ ភ្នាក់ងារផ្តល់កម្ចីក្រៅប្រព័ន្ធតែងតែមិនខ្វល់ពីលទ្ធភាពសងរបស់អតិថិជនឡើយ ដោយគិតតែពីការបញ្ចេញលុយឱ្យបាន​លឿន ដើម្បីចាប់បង្ខំអតិថិជនបង់សងតាមរយៈកុងត្រា។

មជ្ឈមណ្ឌលការពារអ្នកប្រើប្រាស់សេវាហិរញ្ញវត្ថុ គឺជាស្ថាប័ន​ឯករាជ្យមួយដែលបង្កើតឡើងដើម្បីបម្រើប្រយោជន៍សាធារណៈជន ដោយមិនស្វែងរកប្រាក់ចំណេញ។ ការបង្កើតមជ្ឈមណ្ឌលនេះធ្វើឡើងស្របពេលដែលវិស័យធនាគារមានការរីកចម្រើនលឿន ប៉ុន្តែយន្តការការពារអ្នកប្រើប្រាស់មិនទាន់អាចដើរទាន់ ដែលបណ្តាលឱ្យមានបញ្ហានិងផលប៉ះពាល់ដល់សង្គមដូចជាការបាត់បង់ផ្ទះសម្បែង និងដីធ្លីជា​ដើម៕