ព័ត៌មានជាតិ

ត្រីមាសទី១ឆ្នាំនេះ ការនាំចូលប្រេងឥន្ទនៈមកកម្ពុជាធ្លាក់ចុះគួរឲ្យកត់សម្គាល់

បានផុស

៥ years មុន

នៅ

ថ្ងៃសៅរ៍ ៨ ឧសភា ២០២១

ដោយ

ការនាំចូលប្រេងឥន្ធនៈមកកាន់កម្ពុជា នៅក្នុងរយៈពេល៣ខែដំបូងឆ្នាំនេះតាមកំពង់ផែធំៗចំនួន២របស់កម្ពុជាមានប្រមាណជិត៧០ម៉ឺនតោនមានការថយចុះគួរឲ្យកត់សម្គាល់ បើធៀបនឹងរយៈពេលដូចគ្នាកាលពីឆ្នាំមុន។

យោងតាមទិន្នន័យរបស់កំពង់ផែស្វយ័តក្រុងព្រះសីហនុ បានឱ្យដឹងថា ការនាំចូលប្រេងឥន្ធនៈតាមរយៈកំពង់ផែស្វយ័តក្រុងព្រះសីហនុក្នុងត្រីមាសទី១ឆ្នាំនេះមានប្រមាណជាង៤៧ម៉ឺនតោនប៉ុណ្ណោះធ្លាក់ចុះជិត១៥% ខណៈកាលពីត្រីមាសទី១ឆ្នាំ២០២០ នាំចូលរហូតដល់ទៅជាង៥៦ម៉ឺនតោន។

ចំណែកការនាំចូលប្រេងឥន្ទនៈតាមកំពង់ផែភ្នំពេញវិញ មានចំនួនប្រមាណ២០ម៉ឺន ៣ពាន់តោន(២០៣,២០៦) ធ្លាក់ចុះ៩% បើធៀបរយៈពេលដូចគ្នាកាលពីឆ្នាំ២០២០ ដែលមានចំនួនជាង២២ម៉ឺនតោន។

បើតាមទិន្នន័យបានបញ្ជាក់ថាការធ្លាក់ចុះនៃការនាំចូលប្រេងឥន្ធនៈនេះ គឺដោយសារការរីករាលដាលនៃជំងឺកូវីដ១៩ ជាពិសេសព្រឹត្តការណ៍ការសហគមន៍២០កុម្ភៈ បានធ្វើឲ្យអាជីវកម្មមួយចំនួនបានផ្អាកបណ្តោះអាសន្ន ការធ្លាក់ចុះនៃសង្វាក់ផលិតកម្មរបស់រោងកចក្រសហគ្រាស ការធ្លាក់ចុះការដឹកជញ្ជូន និងការកាត់បន្ថយការធ្វើដំណើររបស់ពលរដ្ឋជាដើម។

គួរបញ្ជាក់ថា តម្លៃប្រេងឥន្ទនៈដែលដាក់លក់នៅកម្ពុជា ក្នុងខែមេសា និងឧសភានេះ បានរក្សាតម្លៃលក់ក្នុងរង្វង់ ៣៧០០ ទៅ៣៧៥០រៀល សម្រាប់ប្រេងសាំងធម្មតា និងប្រេងម៉ាស៊ូត ៣២៥០រៀល ទៅ៣៣០០រៀល ក្នុងមួយលីត្រ៕

ដោយ ៖ សំអឿន