ព័ត៌មានអន្ដរជាតិ

អ្នកជំនាញថាមពល៖ អឺរ៉ុបមានប្រេងឥន្ទនៈយន្តហោះត្រឹម៦សប្តាហ៍ទៀតប៉ុណ្ណោះ

បានផុស

៣ ខែ មុន

នៅ

ថ្ងៃសុក្រ ១៧ មេសា ២០២៦

ដោយ

ប្រធានទីភ្នាក់ងារថាមពលអន្តរជាតិ (IEA) បានលើកឡើងកាលពីថ្ងៃព្រហស្បតិ៍ក្នុងបទសម្ភាសន៍ជាមួយភ្នាក់ងារសារព័ត៌មាន AP ថា អឺរ៉ុបនៅសល់ប្រេងឥន្ធនៈសម្រាប់យន្តហោះប្រហែល៦សប្តាហ៍ទៀតប៉ុណ្ណោះ ដោយព្រមានពីការលុបចោលជើងហោះហើរដែលអាចកើតមានក្នុងពេលឆាប់ៗនេះ ប្រសិនបើការផ្គត់ផ្គង់ប្រេងនៅតែរារាំងដោយសង្គ្រាមអ៊ីរ៉ង់។ នេះបើយោងតាមសារព័ត៌មាន ABC News ផ្សាយថ្ងៃទី១៦ ខែមេសា ឆ្នាំ២០២៦ ។

លោក Fatih Birol នាយកប្រតិបត្តិ IEA បានគូររូបភាពដ៏គួរឱ្យព្រួយបារម្ភពីផលវិបាកសកលដែលលោកហៅថា «វិបត្តិថាមពលដ៏ធំបំផុតដែលយើងមិនធ្លាប់ជួបប្រទះ» បណ្តាលមកពីការដាច់ការផ្គត់ផ្គង់ប្រេង ឧស្ម័ន ថាមពល តាមរយៈច្រកសមុទ្រ Hormuz ។

លោក Fatih Birol នាយកប្រតិបត្តិ IEA ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកលើកឡើងថា៖ « កាលពីអតីតកាល មានក្រុមមួយ បានហៅ«ច្រកសមុទ្រដ៏ពិបាកធ្ងន់ធ្ងរ»។ ឥឡូវនេះ វាក៏ជាច្រកសមុទ្រដ៏លំបាកលំបិនមួយដែរ ហើយវានឹងមានផលប៉ះពាល់យ៉ាងធ្ងន់ធ្ងរចំពោះសេដ្ឋកិច្ចពិភពលោក។ ហើយបើវាចំណាយពេលកាន់តែយូរទៅ វានឹងកាន់តែអាក្រក់ទៅៗសម្រាប់កំណើនសេដ្ឋកិច្ច និងអតិផរណានៅជុំវិញពិភពលោក»។

លោក Birol ប្រាប់ AP ក្នុងការិយាល័យរបស់លោកនៅទីក្រុងប៉ារីសថា៖ « ផលប៉ះពាល់នឹងកើនឡើង ចំពោះតម្លៃប្រេងសាំង ឧស្ម័ន និងអគ្គិសនី»។

អ្នកសេដ្ឋកិច្ច និងអ្នកជំនាញថាមពលជនជាតិតួកគីដឹកនាំ IEA តាំងពីឆ្នាំ២០១៥ រូបនេះបន្តថា៖ « ការឈឺចាប់ផ្នែកសេដ្ឋកិច្ចនឹងមានអារម្មណ៍មិនស្មើគ្នាទេ ហើយប្រទេសរងទុក្ខវេទនាច្រើនជាងគេនឹងមិនមែនជាប្រទេសមានសំឡេងដែលគេស្តាប់ឮនោះទេ។ វានឹងជាប្រទេសកំពុងអភិវឌ្ឍន៍ជាចម្បង។ ប្រទេសក្រីក្រនៅអាស៊ី នៅអាហ្វ្រិក និងនៅអាមេរិកឡាទីន»។

លោកបន្ថែមថា៖ « ប៉ុន្តែបើគ្មានការដោះស្រាយសង្គ្រាមអ៊ីរ៉ង់ បើកច្រកសមុទ្រ Hormuz ឡើងវិញជាអចិន្ត្រៃយ៍ទេ មនុស្សគ្រប់គ្នានឹងរងទុក្ខវេទនា។ ប្រទេសមួយចំនួនអាចមានជាងប្រទេសដទៃទៀត។ ប្រទេសមួយចំនួនអាចមានថាមពលច្រើនជាងប្រទេសដទៃ ប៉ុន្តែគ្មានប្រទេសណាមួយដែលមានភាពស៊ាំនឹងវិបត្តិនេះទេ»។

លោកព្រមានថា បើគ្មានការបើកផ្លូវទឹកនេះ(Hormuz)ឡើងវិញទេ ផលិតផលដែលប្រើប្រាស់ប្រេងមួយចំនួនអាចនឹងរីងស្ងួត។ លោកថា៖ « នៅអឺរ៉ុបខ្ញុំអាចប្រាប់អ្នកឆាប់ៗនេះ! យើងនឹងឮដំណឹងថា ជើងហោះហើរមួយចំនួនពីទីក្រុង A ទៅទីក្រុង B អាចត្រូវបានលុបចោល ដោយសារតែខ្វះប្រេងឥន្ធនៈយន្តហោះ»៕

ប្រែសម្រួល៖ ណឺ មិនា