ឆេះរោងចក្រកាត់ដេរមួយកន្លែងនៅស្រុកសំរោង ខូចខាតសម្ភារៈអស់មួយចំនួនធំ

អាគាររោងចក្រកាត់ដេរមួយត្រូវបានភ្លេីងឆេះខូចខាតធ្ងន់ធ្ងរទម្រាំសមត្ថកិច្ចជួយអន្តរាគមន៍ទាន់។ ហេតុការអគ្គីភ័យនេះកេីតឡេីងនៅព្រលប់ថ្ងៃទី២៨ ខែឧសភា ឆ្នាំ២០២១  វេលាម៉ោង១៨និង២០នាទីនៅក្នុងរោងចក្រ     Liefeng Outdoor Cambodia Co.LTD  ស្ថិតនៅផ្លូវជាតិលេខ៣ ត្រង់ចំណុចផ្សារថ្នល់បត់ ភូមិពេជចង្វា ឃុំបឹងត្រាញ់ខាងជើង ស្រុកសំរោង ខេត្តតាកែវ ។

ក្រោយទទួលបានព័ត៌មានលោកឧត្តមសេនីយ៍ទោ សុខ សំណាង ស្នងការនៃស្នងការដ្ឋាននគរបាលខេត្តតាកែវ បានដឹកនាំកម្លាំងនគរបាលការិយាល័យជំនាញបង្ការពន្លត់អគ្គិភ័យ និងសង្រ្គោះ របស់ស្នងការដ្ឋាននគរបាលខេត្ត សហការជាមួយកម្លាំងអធិការដ្ឋាននគរបាលស្រុកសំរោង និងកម្លាំងពាក់ព័ន្ធចុះជួយពន្លត់អគ្គិភ័យដែលឆាបឆេះភ្លាមៗផងដែរ។ 

ក្នុងនោះបានបាញ់ទឹកបន្លត់អស់ចំនួន៦រថយន្តទេីបគ្រប់គ្រងស្ថានការណ៍បានទាំងស្រុង។ ចំពោះមូលហេតុត្រូវបានសមត្ថកិច្ចបញ្ជាក់ថា មកពីទុស្សេខ្សែចរន្តអគ្គិសនីក្នុងអាគារោងចក្រទេីបបង្កេីតបានជាអគ្គីភ័យឆាបឆេះរាលដាលតែម្តង៕ 

អត្ថបទ៖ មាស វីរៈ