ពលករខ្មែរចំនួន ២១ នាក់ ត្រូវទាហានថៃចាប់ខ្លួន ក្នុងពេល លបឆ្លងដែនចូលទឹកដីថៃខុសច្បាប់

ពលករខ្មែរ​ដែលត្រូវមេខ្យល់​បោះបង់ចោល​ក្នុងព្រៃ ចំនួន ២១ នាក់  ត្រូវ​បាន​ទាហាន​ព្រំ​ដែន​ថៃចាប់​​ខ្លួន ដោយមិនអនុញ្ញាតឱ្យចូលទៅក្នុងទឹកដីថៃឡើយ  បន្ទាប់ពីពលករ​ទាំងនេះបម្រុង​ឆ្លងចូល​ទៅរក ការងារធ្វើនារដូវកូវីដ ១៩កំពុងវាយលុកខ្លាំងនៅក្នុងប្រទេសថៃ។

ការឃាត់ខ្លួននេះបានធ្វើឡើងកាលពីល្ងាចថ្ងៃទី ៦  ខែមិថុនា  ឆ្នាំ ២០២១  ត្រង់ចំណុចកូនដំរី  ក្នុងឃុំតាផាយ៉ា ស្រុក​តាផាយ៉ា  ខេត្តស្រះកែវ  ប្រទេសថៃ  ដោយពលករខ្មែរសរុបមានចំនួន ២១ នាក់  ក្នុងនោះមាន ប្រុស៧ នាក់  ស្រី ១៤ នាក់។ ពួកគេបានសារភាពថា  ការឆ្លងចូល​ទៅក្នុង​ទឹកដីថៃតាមច្រករបៀងនេះ  គឺមានមេខ្យល់ជាអ្នកនាំមុខ  ប៉ុន្តែក្រោយពីដឹងថាមាន​ទាហានថៃ​នៅខាងមុខ  មេខ្យល់ក៏បានគេខ្លួនបាត់ស្រមោល  ដោយបោះ​បង់ពួក​គេឱ្យនៅក្នុង​ព្រៃ  មិនដឹងទៅខាងណា  ទើបត្រូវថៃឃាត់ខ្លួនតែម្តង។

ទិសដៅដែលពួកគេទៅ  គឺបម្រុងទៅរកការងារធ្វើនៅក្នុងខេត្ត ឈុនបុរី  និងខេត្ត សមុទ្រប្រាកាន ។ ក្រោយពីបានត្រួតពិនិត្យកម្តៅរួចមក  ភាគីថៃសម្រេចបញ្ជូនពលករទាំង២១ នាក់  មកកម្ពុជាវិញ  តាមច្រកអូរបីជាន់
ខេត្តបន្ទាយមានជ័យវិញ៕ សោ និយមរ័ត្ន