បែចិញ្ចឹមត្រី និងផ្ទះបណ្ដែតទឹកចំនួន​១៣៨១ ត្រូវរុះរើត្រឹមពេល៣ថ្ងៃ

នៅក្នុងរយៈពេល ៣ ថ្ងៃចាប់ពីថ្ងៃទី ១២ ដល់ថ្ងៃទី ១៤ ខែមិថុនា កម្លាំងនគរបាលរាជ​ធានីភ្នំពេញ​បាន​ចូលរួមអនុវត្តចុះរុះរើបែចិញ្ចឹមត្រី និងផ្ទះបណ្តែតទឹក ដែលស្ថិតនៅក្នុងភូមិសាស្ត្រខណ្ឌចំនួន ៥ នៃរាជធានីភ្នំពេញដោយរុះរើសរុបបានចំនួន ១៣៨១។

របាយការណ៍របស់ ស្នងការនគរបាលរាជ​ធានីភ្នំពេញ បញ្ជាក់ថា ការអនុវត្តវិធានការរុះរើគឺ​ចាប់ពីថ្ងៃទី​១២ ដល់ថ្ងៃទី ១៤ ខែមិថុនា មានបែ​ចិញ្ចឹម​ត្រី៧៦៣បែត្រូវបានរុះរើ ចំណែកផ្ទះបណ្តែតទឹកចំនួន ៦២៨​ខ្នង​ក៏ត្រូវបានរុះរើផងដែរ។

កម្លាំងសមត្ថកិច្ចបន្តចុះអនុវត្តវិធានការរុះរើនេះឱ្យអស់មិនឱ្យមានការតាំងលំនៅឋាន រឺការប្រកបរបរ​អាជីវកម្ម អាណាធិបតេយ្យលើផ្ទៃទឹកទន្លេនេះទៅមុខទៀតទេ។

លោកឧត្តមសេនីយ៍ទោ ចេវ ហាក់ ស្នងការរងទទួលផែនការងារនគរបាលចរាចរណ៍ឱ្យដឹងថា ចំពោះ​បែចិញ្ចឹមត្រី ដែលមានត្រីគឺតម្រូវឱ្យនាំយកមកប្រមូលផ្តុំតែមួយក្នុងខណ្ឌព្រែកព្នៅ ដោយរង់​ចាំអនុវត្តវិធានការបន្ត ដោយឡែកចំពោះបែចិញ្ចឹមត្រីដែលគ្មានត្រីចិញ្ចឹមត្រូវរុះរើចោល៕

អត្ថបទ៖ ឡេង ដេត