ខេត្តចំនួន ៣​ ប្រកាស​រក​ឃើញអ្នក​ឆ្លងកូវីដ​​ខ្ទង់​រយ​នាក់​ក្នុង​មួយ​ថ្ងៃ

ខេត្ត​ចំនួន ៣ បាន​រាយការណ៍​ករណីឆ្លង​ខ្ទង់​រយ​នាក់ក្នុង​មួយ​ថ្ងៃ យោង​តាម​អាជ្ញាធរ​ប្រកាស​កាល​ពីម្សិលមិញនេះ។

បើ​យោងតាម​សេចក្ដីប្រកាសព័ត៌មាន​របស់​រដ្ឋបាល​ខេត្ត​ត្បូងឃ្មុំ កាលពីម្សិលមិញ​នេះ បាន​រកឃើញករណី​វិជ្ជមានជំងឺកូវីដ-១៩ថ្មី ចំនួន ១០៥នាក់។ ករណី​ឆ្លងថ្មី​នៅខេត្ត​ដែល​បំបែក​ចេញពីខេត្តកំពង់ចាមនេះ ពាក់ព័ន្ធ​ស្រុក​ចំំនួន ៥ មាន​ស្រុក​មេមត់ ស្រុក​​ក្រូចឆ្មារ ស្រុក​ពញាក្រែក ស្រុកអូររាំងឪ ស្រុក​ត្បូងឃ្មុំ និងក្រុង​សួង។

ខេត្តកំពត​កាលពី​ម្សិលមិញ អាជ្ញាធរ​បានប្រកាស​រកឃើញ​អ្នកឆ្លង ១៣៣ នាក់។ អត្តសញ្ញាណអ្នក​ឆ្លង​ជាង ៩០% ​ពាក់ព័ន្ធ​កម្មករ​កម្មការិនីនៅ​រោងចក្រ​នៅ​ស្រុក​កំពង់ត្រាច ស្រុក​ដងទង់ និង​ស្រុក​បន្ទាយមាស។

ដោយឡែក​នៅខេត្ត​សៀមរាប​ក៏រាយការណ៍​ករណី​ឆ្លងឆ្លង​ធ្ងន់ធ្ងរ​ផង​ដែរ​កាល​ពី​ម្សិលមិញនេះ។ អាជ្ញាធរ​ខេត្តសៀមរាប រកឃើញអ្នកវិជ្ជមានជំងឺកូវីដ-១៩ ថ្មី ១២៣នាក់​ក្នុង​រយៈពេល ២៤ ម៉ោង​នេះ។

ក្រៅ​ពី​តួលេខ​ឆ្លង​ដ៏​ខ្ពស់ ខេត្ត​មានប្រជាជនរស់នៅជាង ១ លាន​នាក់នេះ ​ក៏​រាយការណ៍​ករណី​ស្លាប់ ២ នាក់បន្ថែម​ទៀត។ មកទល់ពេលនេះ ខេត្តសៀមរាប មានអ្នកវិជ្ជមានជំងឺកូវីដ-១៩ ចំនួន១២៦៩នាក់ ខណៈ​​មាន​​អ្នក​ស្លាប់​១៣​នាក់ ដោយសារ​ជំងឺ​កូវីដ១៩៕

អត្ថបទ៖ ប៊ុណ្ណារ៉ា