អាជ្ញាធរខណ្ឌច្បារអំពៅ សំណូម ពរពលរដ្ឋ បញ្ឈប់ការយកសំរាម បោះចូលប្រឡាយទឹក

អាជ្ញាធរខណ្ឌច្បារអំពៅ បានសំណូមពរ និងអំពាវនាវដោយទទូច សុំឲ្យប្រជាពលរដ្ឋរស់នៅ ក្បែវិទ្យាល័យច្បារអំពៅ ស្ថិតក្នុងសង្កាត់និរោធ បញ្ឈប់ការយកសំរាម ទៅបោះចូលប្រឡាយបង្ហូទឹក ដែលបង្កឲ្យការកកស្ទះ ទឹកហូរចូលប្រ​ឡាយលូ។

សំណូមពរនេះ គឺធ្វើឡើងដោយលោក ចេង មុនីរ៉ា អភិបាល នៃគណៈអភិបាលខណ្ឌច្បារអំពៅ ខណៈពេលដែលលោកដឹកនាំក្រុមការងារថ្នាក់ខណ្ឌ និងសង្កាត់និរោធ ចុះពិនិត្យមើលការស្តារប្រឡាយ តភ្ជាប់ពីប្រឡាយព្រែកបារាំងដល់ខាងកើតវិទ្យាល័យច្បារអំពៅ ប្រវែងជាង៥០០ម៉ែត្រ។

ក្នុងពេលចុះពិនិត្យ ការស្តារប្រឡាយខាងលើនេះ គឺពោពេញទៅដោយសំរាម ដែលសំរាមទាំងនេះ គឺពុំមែនមកទីឆ្ងាយនោះទេ ជាសំរាមដែលប្រជាពលរដ្ឋ រស់នៅខាងកើត វិទ្យាល័យច្បារអំពៅតែម្តង ដែល​យកមកបោះចូលប្រឡាយបែបនេះ។

លោកអភិបាលខណ្ឌច្បារអំពៅ បានសំណូមពរដល់ប្រជាពលរដ្ឋ ត្រូវចូលរួមថែរក្សាបរិស្ថានទាំងអស់គ្នា ជាពិសេសត្រូវចេះទុកដាក់សំរាមឲ្យត្រឹមត្រូវ ដោយរង់ចាំឲ្យរថយន្តប្រមូលសំរាម មកដឹកតាមការកំណត់ មិនត្រូវយកសំរាមមកបោះចូលប្រឡាយទឹកបែបនេះនោះទេ។ សូមជម្រាបថា ទីតាំងដែលត្រូវស្តារប្រឡាយនេះ គឺស្ថិតក្នុងសង្កាត់និរោធខណ្ឌច្បារអំពៅ រាជធានីភ្នំពេញ៕ (ដោយ)៖នរា