មនុស្ស ១២៣នាក់ បានស្លាប់ និង ២៤១នាក់ បានរងរបួស ដោយសារគ្រោះថ្នាក់ ចរាចរណ៍ ក្នុងខែសីហា

យ៉ាងហោចណាស់ មានមនុស្ស ៣៦៤នាក់បានស្លាប់ និងរងរបួស ដោយសារគ្រោះថ្នាក់ចរាចរណ៍ នៅក្របខណ្ឌ ទូទាំងប្រទេស នៅក្នុងខែសីហា ឆ្នាំ២០២១នេះ។

យោងតាមទំព័រហ្វេសប៊ុកផ្លូវកា ររបស់សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហា ផ្ទៃ នៅថ្ងៃទី១ ខែកញ្ញានេះ បានឲ្យដឹងថា នៅក្នុងខែសីហា ឆ្នាំ២០២១នេះ មានគ្រោះថ្នាក់ចរាចរណ៍ បានកើតឡើង ចំនួន១៩៩ករណី បណ្តាលឲ្យមនុស្ស ចំនួន១២៣នាក់ បានស្លាប់ និងបង្កឲ្យមានរងរបួសធ្ងន់-ស្រាល ចំនួន២៤១នាក់ បើធៀបទៅនឹងខែកក្ដដា ឆ្នាំ២០២១កន្លងនេះ ចំនួនករណីគ្រោះថ្នាក់ចរាចរណ៍ ថយចុះចំនួន៩លើក និងអ្នករងរបួស ថយចុះ៤១នាក់។ ប៉ុន្តែចំនួនអ្នកស្លាប់ កើនឡើង១៦នាក់។

សម្ដេចក្រឡាហោម ស ខេង បានសរសេរទៀតថា កំណើនអ្នកស្លាប់ ដោយសារគ្រោះថ្នាក់ចរា​ចរណ៍ក្នុងខែសីហានេះ គឺការធ្វើដំណើរ នៅក្នុងឱកាស នៃពិធីសែនក្បាលទឹក ដែលមានជនរងគ្រោះស្លាប់ចំនួន១៥នាក់ របួស៣២នាក់ និងការធ្វើដំណើរនៅ រៀងរាល់ថ្ងៃចុងសប្ដាហ៍ផងដែរ បន្ទាប់ពីស្ថានភាពជំងឺកូវីដ-១៩ បានថមថយ ហើយការធ្វើចរា ចរណ៍មានកំណើនឡើងវិញ។

សម្ដេចក្រឡាហោម ស ខេង អំពាវនាវដោយទទូច ដល់ជនរួមជាតិទាំងអស់ សូមមានស្មារតីគោរព និងអនុវ ត្តច្បាប់ ស្ដីពី ចរាចរណ៍ផ្លូវគោក ឲ្យបានគ្រប់ពេលវេលា នៃការធ្វើដំណើរលើដងផ្លូវ និងសូមមានស្មារតីប្រុងប្រយ័ត្ន បើកបរមានការយោគយល់ អធ្យាស្រ័យឲ្យគ្នា ដើម្បីការពារសេចក្ដីសុខខ្លួនយើង អ្នកដំណើរផ្សេងទៀតលើដងផ្លូវ ដើម្បីចៀសផុតពីគ្រោះថ្នាក់។

ទន្ទឹមនិងនេះ សម្ដេចក្រឡាហោម ក៏បានក្រើនរំលឹក ដល់មន្ត្រីមានសមត្ថកិច្ចដឹកនាំ និងប្រតិបត្តិការអនុវត្តច្បាប់ ស្ដីពី ចរាចរណ៍ផ្លូវគោកទាំងអស់ សូមបន្តរឹតបន្តឹងការអនុវត្ត ឲ្យបានសកម្ម គ្មានការលើកលែង ឬ យោគយល់អ្វីទាំងអស់ ពីព្រោះនេះជាភារកិច្ចការពារសេចក្ដីសុខ សុវត្ថិភាព និងអាយុជីវិតប្រជាពលរដ្ឋ។

លើសពីនេះទៀត សម្តេចក្រឡាហោមសខេង បានណែនាំ ឲ្យប្រជាពលរដ្ឋទាំងអស់គ្នា ចូលរួមគោរ​ពច្បាប់ចរាចរណ៍ ដើម្បីសុវត្ថិភាពរបស់យើង តាមពាក្យស្លោកដូចជា ថ្ងៃនេះ ថ្ងៃស្អែកកុំឲ្យមានគ្រោះថ្នាក់ចរាចរណ៍។ គោរពច្បាប់ចរាចរណ៍ផ្លូវគោក ជាកាតព្វកិច្ច របស់អ្នកប្រើប្រាស់ផ្លូវគ្រប់រូប។ បើកបរលើសល្បឿន ដែលច្បាប់កំណត់ ងាយប្រឈមនឹងគ្រោះថ្នាក់។ បើស្រវឹង សូមកុំបើកបរ។ គោរពច្បាប់ ស្តីពី ចរាចរណ៍ផ្លូវគោក គឺគោរ ពជីវិតខ្លួនឯង និងអ្នកដទៃ។ គោរពច្បាប់ ស្តីពី ចរាចរណ៍ផ្លូវគោក គឺលើកកម្ពស់ កិត្យានុភាពជាតិ និងការ ពារជីវិតអ្នក ត្រូវពាក់មួកសុវត្ថិភាព៕

អត្ថបទ៖ សំអឿន