បុរសវ័យចំណាស់ម្នាក់លួចឈើធ្វើផ្ទះត្រូវសមត្ថកិច្ចឃាត់ខ្លួន

បុរសម្នាក់ ត្រូវនគរបាលស្រុកវើនសៃ ខេត្តរតនគិរី ចាប់ខ្លួនពាក់ព័ន្ធករណីលួចឈើ ចំនូន៨ដុំ ដែលគេបម្រុងទុកធ្វើផ្ទះ ។ការឃាត់ខ្លួនបានធ្វើឡើងនៅវេលាម៉ោង១ និង៣០នាទីរសៀល កាលពីថ្ងៃទី៩ ខែធ្នូ ឆ្នាំ២០២០ ស្ថិតនៅភូមិកងណក ឃុំវើនសៃ ស្រុកវើនសៃ ខេត្តរតនគិរី។

នគរបាលស្រុកវើនសៃ បានឲ្យដឹងថា រងគ្រោះមានឈ្មោះ សិប នេន ភេទប្រុស អាយុ៣៧ឆ្នាំ ជនជាតិកាវែត មុខរបរកសិករ បានរាយការណ៍មកសមត្ថកិច្ចថា មានគេចូលលួចយកទ្រព្យសម្បត្តិ ដូចជា ឈើដាក់ជើងតាង ចំនួន៤ដុំ និងឈើមេជណ្តើរចំនួន៤ដុំ ជាប្រភេទឈើធ្នង់សម្រាប់ធ្វើផ្ទះ។

បន្ទាប់ពីទទួលបានព័ត៌មានភ្លាមកម្លាំងសមត្ថកិច្ច បានចាត់កម្លាំងប្រចាំបញ្ជារបស់អធិការសហការជាមួយកម្លាំងប៉ុស្តិ៍រដ្ឋបាលឃុំវើនសៃ ចុះស្រាវជ្រាវដល់ទីកន្លែងកើតហេតុ លុះដល់វេលាម៉ោង៤ និង២០នាទីល្ងាច ថ្ងៃ-ខែ-ឆ្នាំដដែល ទើបឈានទៅឃាត់ខ្លួនជនសង្ស័យឈ្មោះ សុង ស៊ូ អាយុ៤៩ឆ្នាំជនជាតិខ្មែរ មុខរបរកសិករ មានទីលំនៅភូមិវើនសៃ ឃុំវើនសៃស្រុកវើនសៃ ខេត្តរតនគិរី។

បច្ចុប្បន្នជនសង្ស័យបានឃាត់ខ្លួនបណ្តោះអាសន្ននៅអធិការស្រុកវើនសៃ ដើម្បីកសាងសំណុំរឿងបញ្ជូនទៅតុលាការចាត់ការទៅតាមនីតិវិធីច្បាប់៕

អត្ថបទ ៖ អ៊ុច សាវុទ្ធ