លោក លី ធុជ​៖ បោះឆ្នោត​មួយសន្លឹក​ជូន​គណបក្សប្រជាជនកម្ពុជា​ គឺដើម្បីសន្តិភាព​ និងការអភិវឌ្ឍ

លោក លី ធុជ សមាជិកគណៈកម្មាធិការកណ្តាល និងជាប្រធានក្រុម​ការងារ​គណ​បក្សចុះមូលដ្ឋាន​ក្រុងបាវិតបានថ្លែងថា ការបោះឆ្នោតមួយសន្លឹកជូនគណបក្សប្រជាជនកម្ពុជា គឺដើម្បីសន្តិភាព និងការអភិវឌ្ឍ ប៉ុន្តែដើម្បី​បាន​សន្លឹកឆ្នោតមួយនេះ សមាជិកគណបក្សទាំងអស់ ត្រូវបន្តកែលម្អ​ទម្លាប់ធ្វើការ លើកកម្ពស់​សេវា​​មូលដ្ឋាន និងលើកកម្ពស់សមត្ថភាពគ្រប់គ្រង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកបែបនេះរបស់ លោក លី ធុជ សមាជិកគណៈកម្មាធិការកណ្តាល និងជាប្រធានក្រុម​ការងារ​គណ​បក្សចុះមូលដ្ឋានក្រុងបាវិត នាថ្ងៃទី១៣ ខែមីនា ឆ្នាំ២០២២ ក្នុងនាមលោកស្រី ម៉ែន សំអន អនុប្រធានគណបក្សប្រជាជនកម្ពុជា និងជាប្រធានក្រុមការងារគណបក្សចុះមូលដ្ឋាន​ខេត្តស្វាយរៀង​ ក្នុងពិធីសំណេះសំណាលជាមួយក្រុមការងារគណបក្សសង្កាត់ព្រៃអង្គុញ គណបក្សសង្កាត់ សាខាបក្សភូមិ អនុសាខាបក្សភូមិ និងក្រុមបក្សសរុបចំនួន ៣៥៧ នាក់។

លោក លី ធុជ បានវាយតម្លៃខ្ពស់ និងថ្លែងអំណរគុណជូនចំពោះថ្នាក់ដឹកនាំសង្កាត់គ្រប់ជាន់ថ្នាក់ ដែលបានគាំទ្រ លើកទឹកចិត្ត និងពលីខ្ពស់ បង្កើតអោយមានសមិទ្ធផលយ៉ាងធំធេងជូនដល់ប្រជាពលរដ្ឋមូលដ្ឋាន និងសម្រាប់ភាពសុខដុមរមនារបស់​ប្រជាពលរដ្ឋ ព្រមទាំងបានណែនាំឲ្យសមាជិកគណបក្ស ត្រូវបន្តកែលម្អទម្លាប់ធ្វើការ លើកកម្ពស់សេវាមូលដ្ឋាន និងលើកកម្ពស់សមត្ថភាពគ្រប់គ្រង ដើម្បីចូលរួមបម្រើប្រជាពលរដ្ឋ និងលើកកម្ពស់ជីវភាពរស់នៅរបស់ប្រជាពលរដ្ឋឱ្យ​កាន់តែប្រសើរ​ឡើង។

លោកបន្តទៀតថា សមិទ្ធផលទាំងនេះ បានកើតចេញពីការឆ្នោតមួយសន្លឹក​របស់ប្រជា​ពលរដ្ឋជូនគណបក្សប្រជាជនកម្ពុជា ដែលសន្លឹកឆ្នោតនេះ បានក្លាយជាសន្លឹកឆ្នោតសន្តិភាព និងការអភិវឌ្ឍ។

លោក លី ធុជ បានបញ្ជាក់បន្ថែមថា បេក្ខជនឈរឈ្មោះរបស់គណបក្សប្រជាជន ដល់ពេលត្រូវ​ចូលប្រលងហើយ ហើយលទ្ធផលជាប់ ឬធ្លាក់ គឺអាស្រ័យទៅលើទង្វើររបស់ខ្លួននៅមូលដ្ឋាន និងត្រូវការសម្លេងគាំទ្រពីប្រជាពលរដ្ឋ ដែលជាអ្នកឲ្យពិន្ទុ និងជាម្ចាស់ឆ្នោត។

ចាប់ពីពេលនេះតទៅ បេក្ខជនទាំងអស់ ត្រូវបន្តកាន់ទង់គណបក្សប្រជាជន ដើម្បីចូលរួមការប្រកួតប្រជែងជាមួយគណបក្សដទៃ និងឆ្ពោះទៅមុខអោយដល់គោលដៅ។

លោក លី ធុជ បន្តលើកឡើងទៀតថា ការងារបោះឆ្នោត មានឥទ្ធិពល និងមានសារសំខាន់ណាស់ សម្រាប់ការកំណត់ជោគវាសនារបស់បេក្ខជន ប្រសិនបើយើងទាំងអស់គ្នា មានគំនិត និងឧត្តមគិត នោះវាដូចជាកាំបិតដ៏មុតស្រួច ដែលអាចកាត់ផ្ដាច់អ្វីគ្រប់យ៉ាង និងឈានទៅទទួលជោគជ័យគ្រប់ភារកិច្ចហើយឧត្តមគតិ និងការមានជំនឿទុកចិត្តលើអនាគតគណបក្ស និងប្រទេសជាតិយើង ជាកាល់ស្យូម និងឆ្អឹងខ្នងនៃគណបក្សប្រជាជន៕