លុបលក្ខខណ្ឌតឹងតែងទាំងអស់សម្រាប់ភ្ញៀវទេសចរដោយត្រឡប់ទៅដូចមុនកូវីដវិញ

ក្រសួងទេសចរណ៍ បានសម្រេចលុបចោលលក្ខខណ្ឌតម្រូវឲ្យបង្ហាញលទ្ធផល PCR តេស្តអវិជ្ជមានរយៈពេល ៧២ម៉ោងមុនពេលមកដល់ សម្រាប់ប្រតិបត្តិករទេសចរណ៍ ទេសចរជាតិ អន្តរជាតិ និងអ្នកដំណើរទាំងអស់ ចាប់ពីថ្ងៃទី ១៧ ខែមីនា នេះតទៅ។ នេះបើតាមសេចក្តីប្រកាសព័ត៌មានរបស់ក្រសួងទេសចរណ៍ នៅថ្ងៃទី ១៧ ខែ មីនា ឆ្នាំ ២០២២។

លើសពីនេះទៀត ក្រសួងក៏សម្រេចលុបលក្ខខណ្ឌតម្រូវឲ្យធ្វើតេស្តរហ័សពេលមកដល់ និងដាក់ឲ្យដំណើរការឡើងវិញ នូវការផ្តល់ទិដ្ឋាការពេលមកដល់ នៅគ្រប់ច្រកទ្វារអន្តរជាតិទាំងអស់ តាមផ្លូវគោក ផ្លូវអាកាស និងផ្លូវទឹក ដោយបំពេញលក្ខខណ្ឌនានា ដូចធ្លាប់បានអនុវត្តមុនពេលកូវីដ-១៩។

សេចក្តីប្រកាស បានសង្កត់ធ្ងន់ថា នៅពេលមកដល់ ទេសចរជាតិ អន្តរជាតិ និងអ្នកដំណើរផ្សេងៗត្រូវបង្ហាញវិញ្ញាបនបត្រ ឬឯកសារច្បាស់លាស់ បញ្ជាក់ការចាក់វ៉ាក់សាំងដូសមួលដ្ឋាន ពេញលេញចេញដោយអាជ្ញាធរមានសមត្ថកិច្ច។ សម្រាប់អ្នកធ្វើដំណើរដែលពុំទាន់ចាក់វ៉ាក់សាំងដូសមូលដ្ឋានពេញលេញ អាចទទួលបានការលើកលែង និងការសម្រួលខាងលើផងដែរ តែតម្រូវឲ្យធ្វើចត្តាឡីស័កចំនួន ១៤ថ្ងៃ នៅទាំងដែលកំណត់ដោយក្រសួងសុខាភិបាល ឬអាជ្ញាធរមានសមត្ថកិច្ច។

បើតាមក្រសួង ទេសចរជាតិ អន្តរជាតិ និងអ្នកដំណើរផ្សេងៗ ត្រូវបានលើកទឹកចិត្តឲ្យធ្វើតេស្តរហ័ស ​ដោយខ្លួនឯង មុនពេល ឬពេលមកដល់ និងអំឡុងពេលស្នាក់នៅកម្ពុជា និងតម្រូវឲ្យអនុវត្តឲ្យបានម៉ឺងម៉ាត់នូវវិធានការសុខាភិបាល ៣កុំ ៣ការពារ ៕

អត្ថបទ៖​ ទួន សុផល