សម្តេចតេជោ ហ៊ុន សែន ស្នើប៉ាគីស្ថានពិនិត្យសក្តានុពល លើវិស័យសេដ្ឋកិច្ច ពាណិជ្ជកម្ម និងវិនិយោគ

សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានលើកទឹកចិត្តឲ្យឯកអគ្គរដ្ឋទូតសាធារណរដ្ឋអ៊ីស្លាមប៉ាគីស្ថាន ពិនិត្យមើលសក្ដានុពលទាំងឡាយ ដែលប្រទេសទាំងពីរមាន និងអាចធ្វើបានលើវិស័យសេដ្ឋកិច្ច ពាណិជ្ជកម្ម និងវិនិយោគ ព្រោះវិស័យទាំងអស់នេះមានសារៈសំខាន់ សម្រាប់ការបំពេញឲ្យគ្នាទៅវិញទៅមក និងចូលរួមចំណែកពង្រឹងពង្រីកកិច្ចសហប្រតិបត្តិការ រវាងប្រទេសទាំងពីរ ផងដែរ ។

សម្តេចតេជោនាយករដ្ឋមន្រ្តី បានស្នើបែបនេះនៅក្នុងឱកាសអនុញ្ញាតឲ្យលោក​ Zaheerudin Badar Thaheem (ហ្សាហ៊ីរូឌីន បាបារ ថាហ៊ីម) ឯកអគ្គរដ្ឋទូតសាធារណរដ្ឋ​អ៊ីស្លាមប៉ាគីស្ថានប្រចាំព្រះរាជាណាចក្រកម្ពុជា ចូលជួបសម្ដែងការគួរសម នាព្រឹកថ្ងៃទី ២២ ខែមីនា ឆ្នាំ ២០២២នេះ នៅវិមានសន្តិភាពទីស្ដីការនាយករដ្ឋមន្ត្រី។

លោក អ៊ាង សុផល្លែត ជំនួយការផ្ទាល់សម្តេចតេជោ ហ៊ុន សែន បានថ្លែងឲ្យដឹងបន្ទាប់ពីជំនួបនោះថាលោក​ Zaheerudin Badar Thaheem បានគោរពថ្លែងអំណរគុណសម្ដេចតេជោ ដែលបានចំណាយពេលវេលាអនុញ្ញាតឲ្យលោក បានចូលជួបសម្ដែងការគួរសម។ លោកឯកអគ្គរដ្ឋទូត បានជម្រាបជូនសម្ដេចថា លោកពិតជាមានកិត្តិយសណាស់ ដែលបានមកបំពេញបេសកកម្មការទូត នៅក្នុងព្រះរាជាណាចក្រកម្ពុជា ដែលក្នុងរយៈពេលជាងមួយខែមកនេះ លោកសង្កេតឃើញថា កម្ពុជាមានការអភិវឌ្ឍស្រស់ស្អាត ជាមួយនឹងប្រជាពលរដ្ឋ ដែលមានភាពរាក់ទាក់ និងមន្ត្រីរាជការបានផ្តល់កិច្ចការសហការដ៏ល្អ។

លោក​ Zaheerudin Badar Thaheem បានជម្រាបជូនសម្ដេចតេជោផងដែរថា ប៉ាគីស្ថានចាត់ទុកកម្ពុជាគឺជាដៃគូសំខាន់។ ដូចនេះក្នុងបេសកកម្មរបស់លោកនៅកម្ពុជា គឺបន្តបេសកកម្មដែលមានស្រាប់ផងនឹងធ្វើអ្វីៗគ្រប់បែបយ៉ាង ដើម្បីជំរុញទំនាក់ទំនងលើគ្រប់វិស័យ ក្នុងទិសដៅពង្រឹងនិងពង្រីកទំនាក់ទំនង និងកិច្ចសហប្រតិបត្តិការ រវាងប្រទេសទាំងពីរ ឲ្យឈានដល់កម្រិតថ្មីមួយទៀត។

ជាការឆ្លើយតបសម្ដេចតេជោ ហ៊ុន សែន បានអបអរសាទរចំពោះលោក​ Zaheerudin Badar Thaheem ដែលត្រូវបានតែងតាំងជាអគ្គរដ្ឋទូតប្រចាំ នៅព្រះរាជាណាចក្រកម្ពុជា។ សម្ដេចបានស្វាគមន៍ផងដែរ នូវការលើកឡើងរបស់លោក​ Zaheerudin Badar Thaheem និងបានលើកទឹកចិត្តឲ្យលោកពិនិត្យមើលសក្ដានុពលទាំងឡាយ ដែលប្រទេសទាំងពីរអាចធ្វើបាន លើវិស័យសេដ្ឋកិច្ចពាណិជ្ជកម្ម និងវិនិយោគ ព្រោះវិស័យទាំងនេះមានសារៈសំខាន់ សម្រាប់ការបំពេញឲ្យគ្នាទៅវិញទៅមក និងចូលរួម​ចំណែកពង្រីកពង្រឹងកិច្ចសហប្រតិបត្តិការ រវាងប្រទេសទាំងពីរ​ ដែលមានទំនាក់ទំនងនឹងវ័យចំណាស់រហូតដល់ ៧០ ឆ្នាំ​នៅក្នុងឆ្នាំនេះ។

សម្ដេចតេជោនាយករដ្ឋមន្រ្តី ក៏បានជម្រាបជូនលោក​ Zaheerudin Badar Thaheem​ ផងដែរថា ឆ្នាំនេះកម្ពុជាធ្វើជាប្រធានអាស៊ាន ហើយក្នុងក្របខ័ណ្ឌអាស៊ានអ្វីដែលកម្ពុជាចង់ បានគឺការបើកដំណើរការសេដ្ឋកិច្ចអាស៊ានឡើងវិញ ក្នុងគ្រាដែលយើងកំពុងរស់នៅក្នុងដំណាក់ការកូវីដ។ ឆ្លៀតឱកាសនោះ សម្តេចតេជោ ក៏បានថ្លែងអំណរគុណ ចំពោះរដ្ឋាភិបាលប៉ាគីស្ថាន ដែលបានផ្ដល់អាហារូបករណ៍ដល់និស្សិតកម្ពុជា និងបានស្នើឲ្យរដ្ឋាភិបាលប៉ាគីស្ថាន បន្តផ្ដល់អាហារូបករណ៍ថែមទៀត ដល់និស្សិតកម្ពុជា៕

អត្ថបទ៖ ណារី