Connect with us

ព័ត៌មានជាតិ

កម្មករ-និយោជិត ត្រៀមខ្លួនរួចរាល់ហើយ សម្រាប់ការចូលរួមបោះឆ្នោតក្រុមប្រឹក្សាឃុំ-សង្កាត់ នៅថ្ងៃទី ៥ មិថុនានេះ

បានផុស

នៅ

នៅថ្ងៃអាទិត្យ ទី ៥ ខែមិថុនា ឆ្នាំ ២០២២ខាងមុខនេះ ការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី ៥ នឹងឈានចូលមកដល់។ នៅក្នុងនោះ កម្មករ-និយោជិតនៅតាមរោងចក្រ-សហគ្រាស ត្រូវបានអនុញ្ញាតឲ្យឈប់ សម្រាករយៈពេល ៣ថ្ងៃ ដើម្បីទៅចូលរួមការបោះឆ្នោតនេះ ដោយរក្សាប្រាក់ឈ្នួលនៅដដែល។ ជាមួយគ្នានេះ កម្មករ-និយោជិត ក៏បានត្រៀមខ្លួនរួចរាល់ផងដែរ សម្រាប់ការចូលរួមបោះឆ្នោត ជ្រើសរើសក្រុមប្រឹក្សាឃុំ-សង្កាត់ នៅតាមមូលដ្ឋានរៀងៗខ្លួន។  

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រាប់សារព័ត៌មាន «កម្ពុជាថ្មី» នៅថ្ងៃទី ៣១ ខែឧសភា កម្មការនី តី សុខរ៉ា ធ្វើការនៅរោងចក្រ សេឌ័រណូ ស្ថិតនៅខណ្ឌដង្កោ បានឲ្យដឹងថា អ្នកនាងបានត្រៀមរួចរាល់ហើយ សម្រាប់ទៅចូលរួមការបោះឆ្នោត នៅពេលខាងមុខនេះ ។ បើតាមកម្មការនី តី សុខរ៉ា នឹងត្រូវទៅបោះឆ្នោតនៅស្រុកកំណើត គឺស្រុកក្រគរ ខេត្តពោធិ៍សាត់។

កម្មការនីរូបនេះ លើកឡើងដូច្នេះថា «ចំពោះការទៅបោះឆ្នោតនៅខេត្តឆ្ងាយនេះ ខាងរដ្ឋបាលរោងចក្រ គេប្រជុំឲ្យឈប់ទៅបោះឆ្នោត ៣ថ្ងៃ អត់កាត់លុយកម្មករទេ»។  

ជាមួយគ្នានេះ កម្មការនីដែលកំពុងបម្រើការងារនៅរោងចក្រ សេឌ័រណូ នេះដែរ គឺកម្មការនី សៀង ងិន បានប្រាប់ថា អ្នកនាងនឹងទៅបោះឆ្នោតនៅឃុំស្លា ស្រុកសំរោង ខេត្តតាកែវ ដែលជាស្រុកកំណើត។ ទោះបីនៅឆ្ងាយយ៉ាងណាក្ដី សម្រាប់ការចូលរួមបោះឆ្នោតនេះ អ្នកនាងបានត្រៀមឯកសារ បំពេញឲ្យការបោះឆ្នោតរួចរាល់ហើយ ដូចជា ប័ណ្ណព័ត៌មានបោះឆ្នោត និងអត្តសញ្ញាណប័ណ្ណសញ្ជាតិខ្មែរ ជាដើម។  

ដោយឡែកកម្មការនី ទី ស៊ីវម៉ី ធ្វើការនៅរោងចក្រ មូនតៃខេជេ នៅសង្កាត់ព្រែកហូរ បាននិយាយថា «ខ្ញុំ រស់នៅព្រែកហូរ ខេត្តកណ្តាល តែខ្ញុំបោះឆ្នោតនៅភូមិកណ្តាល សង្កាត់រលួស ខណ្ឌដង្កោ ព្រោះពីមុនខ្ញុំ រស់នៅទីនោះ ហើយអត់ទាន់បានផ្ទេរឈ្មោះមកនេះវិញ»។

បើទោះបីជាមណ្ឌលបោះឆ្នោត នៅមិនឆ្ងាយពីទីតាំងរស់នៅបច្ចុប្បន្នក៏ដោយ កម្មការនីនៃរោងចក្រ មូនតៃ ខេជេ ក៏ត្រូវបានអនុញ្ញាតឲ្យឈប់សម្រាប់រយៈពេល ៣ថ្ងៃ ដើម្បីទៅចូលរួមការបោះឆ្នោតផងដែរ គឺឈប់សម្រាកមុនថ្ងៃបោះឆ្នោត ថ្ងៃបោះឆ្នោត និងក្រោយថ្ងៃបោះឆ្នោត ដោយរក្សាប្រាក់ឈ្នួល និងអត្ថប្រយោជន៍ផ្សេងៗនៅដដែល។

ចំពោះការបោះឆ្នោតជ្រើសរើសក្រុមប្រឹក្សាឃុំ-សង្កាត់ នេះដែរ កម្មការនី ទី ស៊ីវម៉ី បញ្ជាក់ថា មានសារៈសំខាន់ណាស់សម្រាប់ការដឹកនាំនៅមូលដ្ឋាន ដូចជា ធ្វើឲ្យភូមិឃុំមានការរីកចម្រើន យកចិត្តទុកដាក់ជាមួយប្រជាជន និងស្វែងយល់ពីកង្វះខាត របស់ប្រជាជនជាដើម៕

អត្ថបទ៖ ធឿន វ៉ាន់សុង

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម