អាជ្ញាធរខេត្ត​បាត់ដំបង​កំពុង​កែសម្រួល​ផ្ទៃដីជាង​ ២ ពាន់​ហិកតា​ជូនពលរដ្ឋ

រដ្ឋបាលខេត្តបាត់ដំបង​ កំពុងកែសម្រួលព្រំប្រទល់ដីតំបន់៣ ស្ថិតក្នុងស្រុកឯកភ្នំ និងស្រុកមោង​ឬស្សី​​នៅបឹងទន្លេសាប ដើម្បីកាត់ឆ្វៀលជូនប្រជាពលរដ្ឋ។

ប្រធានមន្ទីររៀបចំដែនដីខេត្តបាត់ដំបងលោក អ៊ូ ដារី ប្រាប់កម្ពុជាថ្មីនៅថ្ងៃទី ៨ ខែមិថុនា ឆ្នាំ​២០២២នេះថា អាជ្ញាធរកំពុងអនុវត្តជំហានទី១ ដោយសម្រួលបានប្រមាណ ១ ពាន់ហិកតា នៅស្រុក​ឯកភ្នំ ហើយនឹងអនុវត្តបន្ត​កាត់ឆ្វៀល​នៅ​ស្រុក​មោង​ឬស្សីប្រមាណ ១ ហិកតាបន្ថែមទៀត​នៅ​ជំហាន​បន្ទាប់។

​សម្ដេចតេជោ ហ៊ុន សែន ​នាយករដ្ឋមន្ត្រីកម្ពុជា​កាលពីថ្ងៃទី ២៧ ខែឧសភា ឆ្នាំ ២០២២ បាន​បញ្ជាឱ្យអាជ្ញាធរចុះធ្វើការពិនិត្យកែសម្រួលកាត់ឆ្វៀលដីបឹងទន្លេសាបតំបន់ ២ និងតំបន់ ៣ ជូនប្រជាពលរដ្ឋទៅតាម​ស្ថានភាព​ជាក់ស្តែង​នៃ​ការ​អាស្រ័យផល​របស់​ប្រជាពលរដ្ឋ​។

​ថ្មីៗនេះ រាជរដ្ឋាភិបាលបាន​សម្រេចកែសម្រួលព្រំប្រទល់តំបន់ដីបឹង​ទន្លេសាបនៅខេត្ត​ជាប់បឹង​ទន្លេ​សាប​មួយចំនួនរួចហើយរួមមាន ខេត្តកំពង់ធំ​ សម្រួលផ្ទៃដីទំហំ ​១០ ​០១៤​ហិកតា ចេញពីតំបន់២ បញ្ចូលមកក្នុងតំបន់១នៅបឹងទន្លេសាប ជូនពលរដ្ឋ៩ ១៤៤គ្រួសារ។

ខេត្តពោធិ៍សាត់កែសម្រួលផ្ទៃដីទំហំ ៣ ៤៤៨ ហិកតា ៧៧ អា ចេញពីតំបន់៣ បញ្ចូលមកតំបន់២ ប្រគល់ជូនពលរដ្ឋ ១ ៦៥៨ គ្រួសារសម្រាប់អាស្រ័យផល។ ខេត្តបន្ទាយមានជ័យ ៥៨ ហិកតា ១៦ អា ស្ថិតនៅស្រុកព្រះនេត្រព្រះ។

ចំណែកឯខេត្តកំពង់ឆ្នាំង និងសៀមរាបអាជ្ញាធរមិនទាន់កំណត់ទំហំដីជាក់លាក់នៅឡើយទេ ដោយកំពុងចុះធ្វើការវ៉ាស់វែង ខណៈអភិបាលខេត្តកំពង់ឆ្នាំងលោក ស៊ុន សុវណ្ណារិទ្ធបង្ហើបថា ទំហំដីខ្ទង់ម៉ឺនហិកតា និងពលរដ្ឋរាប់ម៉ឺនគ្រួសារ​នឹងទទួលបានដីដែលរាជរដ្ឋាភិបាល​កាត់ឆ្វៀលជូនប្រជាពល​រដ្ឋដើម្បីបានអាស្រ័យផល៕

អត្ថបទ៖ ឡេង ដេត