ព័ត៌មានជាតិ
មេសហជីពមួយរំពឹងថា ប្រាក់ឈ្នួលកម្មករឆ្នាំ២០២៣ នឹងបន្តកើនឡើង ជាងឆ្នាំ២០២២
នៅព្រឹកថ្ងៃទី២៤ ខែមិថុនានេះ លោក អាត់ ធន់ ប្រធានសហភាពការងារកម្ពុជា រំពឹងថា ប្រាក់ឈ្នួលអប្បបរមាកម្មករនិយោជិតផ្នែកវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរ និងកាបូប សម្រាប់ឆ្នាំ២០២៣ ខាងមុខនេះ នឹងបន្តកើនឡើងជាងឆ្នាំ២០២២នេះ ដែលមានចំនួន ១៩៤ ដុល្លារអាមេរិកក្នុង ១ខែ។
កម្ពុជាបានបន្តតំឡើងប្រាក់ឈ្នួលអប្បបរមាពីរឆ្នាំជាប់គ្នា នៅក្នុងឆ្នាំ២០២០ និងឆ្នាំ២០២១ ខណៈប្រទេសក្នុងតំបន់ និងប្រទេសប្រកួតប្រជែងជាមួយកម្ពុជា បានពន្យារពេល ឬមិនបានផ្តល់ឱកាសឱ្យមានការជជែកចរចាប្រាក់ឈ្នួលអប្បបរមានោះឡើយនៅក្នុងអំឡុងពេលរីករាលដាលនៃជំងឺកូវីដ-១៩។ ក្នុងនោះរាជរដ្ឋាភិបាលកម្ពុជាបានសម្រេចតម្លើងប្រាក់ឈ្នួលអប្បបរមាសម្រាប់កម្មករនិយោជិតផ្នែកវាយនភណ្ឌ កាត់ដេរ ផលិតស្បែកជើង និងផលិតផលធ្វើដំណើរ និងកាបូប ជាបន្តបន្ទាប់ដោយឆ្នាំ២០២១បានតម្លើងដល់ចំនួន ១៩២ ដុល្លារ និងសម្រាប់ឆ្នាំ២០២២ កើនឡើងដល់ចំនួន ១៩៤ ដុល្លារអាមេរិកក្នុង១ខែ ដោយមិនគិតពីអត្ថប្រយោជន៍ផ្សេងៗទៀតនៅឡើយ។
លោក អាត់ ធន់ បានបន្តថា ការណ៍ដែលប្រាក់ឈ្មួកម្មករត្រូវបានតម្លើងបន្ថែមទៀតនេះ ដោយសារតែវិស័យវាយនភណ្ឌ កាត់ដេរផលិតស្បែកជើង និងផលិតផលធ្វើដំណើរ និងកាបូប មានការរីកចម្រើនយ៉ាងខ្លាំង ចាប់តាំងពីចុងឆ្នាំ២០២១ រហូតមកដល់ឆ្នាំ២០២២នេះ បន្ទាប់ពីរងផលប៉ះពាល់ដោយសារការរាតត្បាតជំងឺកូវីដ-១៩ រួចមក។
លោក អាត់ ធន់ លើកឡើងថា៖ “បច្ចុប្បន្ននេះ វិស័យនេះមានការរីកលូតលាស់ខ្លាំងណាស់ មានក្រុមហ៊ុនខ្លះបានបញ្ជាទិញច្រើនដោយបានចុះកុងត្រា១ទៅ២ឆ្នាំក៏មានដែរ ហើយចំណែកការនាំចេញទៅក្រៅប្រទេស ពិសេសអាមេរិកមានទំហំទឹកប្រាក់រហូតដល់ជិត ៨ ពាន់លានដុល្លារ ក្នុងនោះផ្នែកកាត់ដេរសម្លៀកបំពាក់មានប្រមាណជាង ៤ ពាន់លានដុល្លារនៅដើមឆ្នាំ២០២២នេះ”។
យ៉ាងណាក៏ដោយលោកក៏មិនដឹងថាឆ្នាំ២០២៣ ប្រាក់ឈ្មួលកម្មករនឹងត្រូវតម្លើងប៉ុន្មាននោះទេ ដោយបច្ចុប្បន្ននេះក្រុមការងារសហជីពកំពុងធ្វើការស្រាវជ្រាវអំពីតម្រូវការរស់នៅរបស់កម្មករនិយោជិតបន្ថែមទៀត ដើម្បីបានទិន្នន័យថ្មីៗសម្រាប់ដាក់សំណើប្រាក់ឈ្មួលថ្មី ខណៈក្រុមការងារសហជីពនឹងជួបប្រជុំគ្នាក្នុងពេលឆាប់ៗនេះដើម្បីពិភាក្សាគ្នាឱ្យបានលម្អិតជាមុនសិនមុន នឹងដាក់សំណើទៅរដ្ឋាភិបាល។
បើតាមលោកបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងនៅក្នុងសេចក្តីជូនដំណឹងចុះកាលពីយប់ថ្ងៃទី២៣ ខែមិថុនាថា ចំពោះកាលវិភាគនៃការចរចាប្រាក់ឈ្នួលអប្បបរមា សម្រាប់ឆ្នាំ២០២៣ ខាងមុខនេះគឺ នៅខែកក្កដា ឆ្នាំ២០២២ ជាការចាប់ផ្តើមពិភាក្សា ជាលក្ខណៈផ្ទៃក្នុងរបស់ភាគីនីមួយៗ។ ខែសីហា ឆ្នាំ២០២២ ជាការចាប់ផ្តើមពិភាក្សា ជាលក្ខណៈទ្វេភាគី និងត្រីភាគី។ ខែកញ្ញា ឆ្នាំ២០២២ បើកកិច្ចប្រជុំក្រុមប្រឹក្សាជាតិប្រាក់ឈ្នួលអប្បបរមា ដើម្បីសម្រេចប្រាក់ឈ្នួលអប្បបរមាផ្នែកវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរ និងកាបូប សម្រាប់ឆ្នាំ២០២៣ និងថ្ងៃទី១ ខែមករា ឆ្នាំ២០២៣ ជាកាលបរិច្ឆេទចូលជាធរមានប្រាក់ឈ្នួលអប្បបរមា។
លោករដ្ឋមន្ត្រីបានបានណែនាំឱ្យគ្រប់ភាគីទាំងអស់ ត្រូវប្រើប្រាស់ទិន្នន័យផ្លូវការស្របច្បាប់ និងការស្រាវជ្រាវបែបវិទ្យាសាស្រ្ត ដោយយោងលើលក្ខណវិនិច្ឆ័យបែបសង្គម (ស្ថានភាពគ្រួសារ អាត្រាអតិផរណា និងការចំណាយក្នុងការរស់នៅ) និងលក្ខណវិនិច្ឆ័យបែបសេដ្ឋកិច្ច (ផលិតភាព ភាពប្រកួតប្រជែងរបស់ប្រទេស ស្ថានភាពទីផ្សារការងារ និងកម្រិតចំណេញរបស់វិស័យ) ដូចមានកំណត់ក្នុងមាត្រា៥ នៃច្បាប់ស្តីពីប្រាក់ឈ្នួលអប្បបរមា ដើម្បីធ្វើជាមូលដ្ឋានក្នុងការពិភាក្សា សម្របសម្រួលផ្ទៃក្នុង និងទទួលបានគោលជំហររួមមួយ៕
អត្ថបទ៖ សំអឿន
-
ព័ត៌មានជាតិ២ ថ្ងៃ ago
អ្នកឧកញ៉ា គួច ម៉េងលី÷ បើមិននាំខ្លួនមេខ្លោងក្រុមហ៊ុន CIC Plc មកផ្ដន្ទាទោសទេ ពលរដ្ឋនឹងលែងជឿប្រព័ន្ធយុត្តិធម៌កម្ពុជា
-
ព័ត៌មានអន្ដរជាតិ៥ ថ្ងៃ ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
កីឡា៥ ថ្ងៃ ago
ជើងឯកម៉ុងហ្គោលី Erdene អរគុណបុរសធ្លាប់ដឹកដៃ ឈឿង ល្វៃ ធ្វើឲ្យក្តីស្រមៃក្លាយជាការពិត
-
ជីវិតកម្សាន្ដ៤ ថ្ងៃ ago
ខេមរៈ សិរីមន្ត ៖ «ទោះខ្ញុំមិនមែនជាអ្នកធំ តែសុំធ្វើកិច្ចការធំខ្លះជូនជាតិតាមវិជ្ជាជីវៈសិល្បៈ បង្ហាញទៅពិភពលោក»
-
ព័ត៌មានជាតិ១ សប្តាហ៍ ago
សម្តេច ហ៊ុន សែន ៖ ហេតុអ្វីបានជាមកដល់ពេលនេះហើយមានមន្ត្រីយើងប្រព្រឹត្តបែបនេះ ដោយពាក់ស្បែកជើងចូលក្នុងព្រះវិហារ?
-
សន្តិសុខសង្គម២២ ម៉ោង ago
សមត្ថកិច្ចស្រុកស្វាយលើ ឃាត់ខ្លួនប្តីប្រពន្ធ ១គូសង្ស័យរួមគំនិតសម្លាប់កូនខ្លួនឯង អាយុទើបតែ ២២ខែ
-
សន្តិសុខសង្គម៧ ថ្ងៃ ago
បឋម៖ អគ្គិភ័យកំពុងឆេះរោងចក្រជិតផ្សារបែកចាន (មានវីដេអូ)
-
ជីវិតកម្សាន្ដ៧ ថ្ងៃ ago
រូបថតលិខិតឆ្លងដែនរបស់ Janie ត្រូវគេសរសើរព្រោងព្រាត ទោះមិនមានការតុបតែងមុខ