អភិបាលខេត្តស្វាយរៀង ប្រកាសសុពលភាព​សមាជិកក្រុមប្រឹក្សាសង្កាត់ អាណត្តិទី៥

(ខេត្តស្វាយរៀង): លោក ម៉ែន វិបុល អភិបាលខេត្តស្វាយរៀង បានប្រកាសសុពលភាពសមាជិកក្រុមប្រឹក្សាសង្កាត់​ស្វាយរៀង អាណត្តិទី៥ ឆ្នាំ២០២២ នៅព្រឹកថ្ងៃទី៥ ខែកក្កដា ឆ្នាំ២០២២ ស្ថិតនៅសាលប្រជុំសាលាក្រុងស្វាយរៀង។

នៅក្នុងឱកាសនោះ លោកអភិបាលខេត្ត បានស្នើឲ្យក្រុមប្រឹក្សាសង្កាត់អាណត្តិទី៥ នេះ ក៏ដូចជាគណបក្ស​នយោបាយនានា  និងប្រជាពលរដ្ឋទាំងអស់ ត្រូវខិតខំរួមគ្នាលើកកម្ពស់វប្បធម៌នៃលទ្ធិប្រជាធិបតេយ្យសេរីពហុបក្ស  ដើម្បីរស់នៅ  និងបំពេញការងារប្រកបដោយភាពសុខដុមរមនាក្នុងសង្គមសម្រាប់​ជាមូលដ្ឋានក្នុងការធានាចីរភាព​ដំណើរការលទ្ធិប្រធាធិបតេយ្យសេរីពហុបក្ស ការបោះឆ្នោតនិងការអភិវឌ្ឍសង្គមឲ្យកាន់តែមាន​ការអភិវឌ្ឍរីកចម្រើន​បន្តទៀត។

លោកបានជំរុញដល់មន្រ្តីទាំងអស់ បន្តឆន្ទៈបម្រើប្រជាជនក្នុងមូលដ្ឋានឲ្យបានខ្លាំងក្លា អស់ពីសមត្ថភាព ប្រាជ្ញា ស្មារតី កម្លាំងកាយ កម្លាំងចិត្ត ដើម្បីបម្រើផលប្រយោជន៍របស់ប្រជាពលរដ្ឋក្នុងសង្កាត់របស់ខ្លួន។

លោកអភិបាលខេត្តសង្កត់ធ្ងន់ថា មន្រ្តីទាំងអស់ មេត្តាយកចិត្តទុកដាក់អនុវត្តឲ្យបានត្រឹមត្រូវតាមគោលនយោបាយច្បាប់ និងលិខិតបទដ្ឋានគតិយុត្តនានារបស់រាជរដ្ឋាភិបាលបំពេញការងារចំពោះមុខមួយចំនួនឲ្យបានម៉ត់ចត់រួមទាំងការធានាបាននូវសាមគ្គីភាពផ្ទៃក្នុង និងការយោគយល់គ្នានៅក្នុងការបំពេញការងាររបស់ខ្លួន។

ជាមួយនឹងភាពជោគជ័យនេះ លោក ម៉ែន វិបុល បានថ្លែងនូវការអរគុណចំពោះក្រុមប្រឹក្សាអាណត្តិចាស់​ពិតជាមានឆន្ទៈប្រកប​ដោយភាពសប្បាយរីករាយក្នុងការផ្ទេរតំណែងជូនក្រុមប្រឹក្សាសង្កាត់អាណត្តិទី៥ តាមរយៈការប្រគល់ ទទួលត្រា បញ្ជី សម្ភារៈ ប្រាក់កាស និងឯកសារនានានូវក្នុងឱកាសនេះ ៕ ដោយ:ភក្ដី