ព័ត៌មានជាតិ

ខេត្តស្វាយរៀងនាំបន្លែសុវត្ថិភាព ទៅលក់នៅរាជធានីភ្នំពេញមួយឆ្នាំជាង ២៥០ តោន

បានផុស

៣ years មុន

នៅ

ថ្ងៃអង្គារ ២ ឧសភា ២០២៣

ដោយ

ពាក់ព័ន្ធនឹងដំណាំកសិកម្ម ខេត្តស្វាយរៀងបានផ្គត់ផ្គង់ទីផ្សារបន្លែសុវត្ថិភាពមកកាន់រាជធានីភ្នំពេញប្រមាណ ២៥០តោន ក្នុងមួយឆ្នាំៗ។ នេះបើតាមការអះអាងរបស់លោក ម៉ែន វិបុល អភិបាលខេត្តស្វាយរៀង នៅក្នុងសន្និសីទសារព័ត៌មាននៅទីស្ដីការគណៈរដ្ឋមន្ត្រី កាលពីថ្ងៃទី២៧ ខែមេសា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ម៉ែន វិបុល បានលើកឡើងថា នៅក្នុងខេត្តស្វាយរៀងក្រៅពីផលិតកម្មដំណាំស្រូវ ខេត្តក៏មានសក្ដានុពលលើដាំដុះដំណាំកសិ-ឧស្សាហកម្មមួយចំនួនដូចជាដំណាំអំពៅ ស្ករ ដំឡូងមី រួមទាំងបន្លែសុវត្ថិភាពសម្រាប់ផ្គត់ផ្គង់តម្រូវការក្នុងស្រុក។

ជាក់ស្ដែង អ្វីដែលជាការកត់សម្គាល់ ប្រជាកសិករ ចំនួន ៥១១ គ្រួសារនៅតាមតំបន់មួយចំនួនក្នុងខេត្តស្វាយរៀង បានងាកមកដាំដុះបន្លែសុវត្ថិភាពលើផ្ទៃដីប្រមាណជា ២១០ហិកតា សម្រាប់នាំចេញនិងផ្គត់ផ្គង់ទីផ្សារក្នុងស្រុក ជាពិសេសនៅតាមផ្សារទំនើបក្នុងរាជធានីភ្នំពេញប្រមាណជាង ២៥០ តោន ក្នុងមួយឆ្នាំ។

បើតាមលោក សុខ សុទ្ធាវុទ ប្រធានមន្ទីរកសិកម្ម រុក្ខាប្រមាញ់ និងនេសាទ បច្ចុប្បន្នមានផ្សារទំនើបចំនួន ១៥ នៅរាជធានីភ្នំពេញ ដែលនាំបន្លែសុវត្ថិភាពដាំដុះដោយកសិករនៅខេត្តស្វាយរៀងមកលក់ដូចជា៖ ផ្សារអ៊ីអន ផ្សារជីបម៉ុង, សួនធម្មជាតិ ផ្សារអាស៊ី, ផ្សារបៃតង ព្រមទាំងផ្សារទំនើបមួយចំនួនទៀត។

បន្ថែមពីនេះលោកប្រធានមន្ទីរកសិកម្មខេត្តស្វាយរៀងអះអាងថា ចំពោះបន្លែកណ្តៀងដែលជាគ្រឿងម្ហូបដ៏ពេញនិយមរបស់អ្នកខេត្តស្វាយរៀង ក៏បាននាំចូលមកលក់នៅរាជធានីភ្នំពេញមួយថ្ងៃពី ៤០ ទៅ ៥០គីឡូក្រាម ហើយបើគិតក្នុងមួយខែ អាចដល់ ៤ ពាន់ ទៅ ៥ពាន់គីឡូក្រាមឬខែខ្លះអាចឈានដល់ ៩ ពាន់គីឡូក្រាម៕