អភិបាលខេត្តស្វាយរៀង ជំរុញអាជ្ញាធរទាំងអស់ពង្រឹង​ការត្រួតពិនិត្យច្រកព្រំដែនជៀសវាង​ការជួញដូរគ្រឿងញៀន

លោក ម៉ែន វិបុល អភិបាលខេត្តស្វាយរៀង និងជាគណៈកម្មាធិការត្រួតពិនិត្យគ្រឿងញៀនខេត្ត  បានជំរុញដល់អាជ្ញាធរ​គ្រប់លំដាប់ថា្នក់ ជាពិសេសនៅតំបន់ព្រំដែន ត្រូវពង្រឹងយន្តការត្រួតពិនិត្យនៅតាមច្រកទ្វារព្រំដែន​នានាក្នុង​ខេត្តឱ្យបាន​តឹងរ៉ឹងបំផុត ទប់ស្កាត់ឱ្យបានការនាំចូលនូវសារធាតុគីមីផ្សំគ្រឿងញៀនគ្រប់ប្រភេទ។

លោកលើកឡើងបែបនេះ ពិធីអបអរសាទរទិវាអន្តរជាតិ ប្រយុទ្ធប្រឆាំងគ្រឿងញៀន  ក្រោមប្រធានបទ”អ្វីៗ​ដើម្បីប្រ​ជាជន​ជាចម្បង  បញ្ឈប់ការរើងអើង  និងមាក់ងាយអ្នកញៀនគ្រឿងញៀន  ពង្រឹងការអប់រំបង្ការ”  និងពិធីដុតបំផ្លាញ​វត្ថុតាង​គ្រឿងញៀនតាមអំណាចសាលក្រម  សាលដីកា  និងសេចក្តីសម្រេចរបស់សាលាដំបូង ខេត្តស្វាយរៀង  នៅព្រឹកថ្ងៃទី ០៣ សីហា ឆ្នាំ ២០២៣។

លើសពីនេះទៀត គណៈកម្មាធិការត្រួតពិនិត្យគ្រឿងញៀនខេត្តស្វាយរៀង បានគូសបញ្ជាក់ថា អាជ្ញាធរ ត្រូវបន្តផ្ដោតការ​យកចិត្តទុកដាក់ ចាត់តាំងអនុវត្តឲ្យបានកាន់តែខ្លាំងក្លាថែមទៀត នូវបទបញ្ជារបស់រាជរដ្ឋាភិបាល ស្ដីពីការពង្រឹងវិធាន​ការប្រយុទ្ធប្រឆាំងគ្រឿងញៀន គោលនយោបាយភូមិ ឃុំមានសុវត្ថិភាព គោលនយោបាយភូមិ ឃុំ សង្កាត់ “ស” គ្មានគ្រឿង​ញៀនពិសេសការចាត់តាំងអនុវត្តវិធានការទាំង៥ នៃយុទ្ធនាការ ប្រយុទ្ធប្រឆាំង គ្រឿងញៀនខុសច្បាប់ ។

ជាមួយគ្នានេះ កម្លាំងមានសមត្ថកិច្ច និងអាជ្ញាធរដែនដីគ្រប់លំដាប់ថ្នាក់ ត្រូវបង្កើនពង្រឹង និងយកចិត្តទុកដាក់ជំរុញការ​អនុវត្តវិធានការរដ្ឋបាល និងការអនុវត្តវិធានការច្បាប់ឲ្យបានម៉ឺងម៉ាត់ ចំពោះគោលដៅ ដែល ងាយ ឬកើតមាន​បទល្មើសគ្រឿងញៀន ជាពិសេសនៅតាមកាស៊ីណូ សណ្ឋាគារ ផ្ទះសំណាក់ ផ្ទះជួល ក្លឹបរាត្រី ខារ៉ាអូខេ និងតំបន់​ដែលមាន​លក្ខណៈស្មុគស្មាញ។អាជ្ញាធរមានសមត្ថកិច្ចទាំងអស់ ត្រូវបំផុសដល់ប្រជាពលរដ្ឋឲ្យចូលរួមកាន់តែ សកម្មថែម​ទៀត ក្នុងការផ្ដល់ព័ត៌មានពីក្រុមឧក្រិដ្ឋជន ដែលមានបំណងប៉ុនប៉ងលួចលាក់ ផលិត កែច្នៃ និងចរាចរគ្រឿងញៀន​ក្នុងខេត្ត ។

ដោយឡែក​ មេបញ្ជាការកងកម្លាំងប្រដាប់អាវុធគ្រប់ប្រភេទ ត្រូវបង្កើនការយកចិត្តទុកដាក់អប់រំ ណែនាំ និងពង្រឹងការគ្រប់​គ្រង​កម្លាំងក្រោមឱវាទរបស់ ខ្លួន ឲ្យបានតឹងរ៉ឹងបំផុត ចៀសវាងកុំឲ្យពាក់ព័ន្ធក្នុងករណី​បទល្មើសគ្រឿងញៀន និងជាមួយ​ឧក្រិដ្ឋជនគ្រឿងញៀន។

លោកអភិបាលខេត្ត ក៏បានអំពាវនាវដល់អាណាព្យាបាល មាតាបិតាសិស្ស ទាំងអស់ សូម បង្កើនការពិនិត្យ និងតាម​ដាន​ចំពោះការសិក្សារបស់កូនៗឲ្យបានទៀងទាត់ និងសហកា រ ឲ្យបានជិតស្និទ្ធជាមួយលោកគ្រូ អ្នកគ្រូទទួល​បន្ទុកថ្នាក់រៀននីមួយៗ ដើម្បីជាយន្តការមួយដាស់តឿន ក្រើនរំលឹកដល់កូនៗរបស់ខ្លួន ឲ្យពួកគេគេច​ផុតពីការប្រឈម​មុខខ្លាំងដោយបញ្ហាគ្រឿងញៀន។

ទន្ទឹមនឹងនេះ គណៈកម្មាធិការត្រួតពិនិត្យគ្រឿងញៀនខេត្ត  ក៏បានដុតបំផ្លាញវត្ថុតាងគ្រឿងញៀន ដែលរឹបអូសបានមាន​ទម្ងន់សរុប ២០.៥៤៤,២៧ក្រាម  នៅទីតាំងប្រារព្ធពិធីនេះ ផងដែរ៕ ដោយ: អ៊ីង ភក្ដី