ក្រសួង នឹងលុបចោលកិច្ចសន្យាផ្តល់សិទ្ធិផ្តាច់មុខលើសេវាទូរស័ព្ទ និងសេវាអ៊ីនធឺណេតនៅក្នុងបុរី

លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានអះអាងថា អនុវត្តតាមបទបញ្ជារបស់សម្តេចតេ ជោ ហ៊ុន សែន នាយករដ្ឋមន្ត្រីនៃកម្ពុជា គឺក្រសួងនឹងលុបចោលកិច្ចសន្យាផ្តល់សិទ្ធិផ្តាច់មុខលើសេវាទូរស័ព្ទ និងសេវាអ៊ីនធឺណេតនៅក្នុងបុរី។ លោករដ្ឋមន្ត្រី អះអាងបែបនេះ ក្នុងសន្និសីទសារព័ត៌មាន នៅទីស្តីការគណៈរដ្ឋមន្ត្រី នាព្រឹកថ្ងៃទី ៤ ខែសីហានេះ។

លោក ជា វ៉ាន់ដេត ថ្លែងដូច្នេះថា «សម្តេចតេជោ បានបញ្ជាខ្ញុំថា រាល់កន្លែងទាំងអស់ដែលមានសិទ្ធិផ្តាច់មុខ អ៊ីនធឺណេតក្នុងបុរី គឺលុបចោលទាំងអស់ អត់ឲ្យមានទៀតទេ»។

ក្រោយទទួលបានបទបញ្ជានេះ លោករដ្ឋមន្ត្រី ក៏បានណែនាំឲ្យនិយ័តករទូរគមនាគមន៍កម្ពុជា អនុវត្តតាមបទបញ្ជារបស់ប្រមុខរាជរដ្ឋាភិបាល ឲ្យមានប្រសិទ្ធភាពខ្ពស់ ដោយមិនអនុញ្ញាតឲ្យមានការផ្ដល់សិទ្ធិផ្ដាច់ មុខលើសេវាទូរស័ព្ទចល័ត និងសេវាអ៊ីនធឺណេត ចាប់ពីថ្ងៃស្អែកនេះតទៅ។  

លោករដ្ឋមន្ត្រី បញ្ជាក់ដែរថា ការសម្រេចលុបចោលកិច្ចសន្យាផ្ដល់សិទ្ធិផ្ដាច់មុខនេះ គឺដោយសារការអនុញ្ញាតឲ្យមានក្រុមហ៊ុនប្រតិបត្តិករតែមួយ សម្រាប់ការផ្គត់ផ្គង់សេវាទូរគមនាគមន៍នៅក្នុងបុរី បានបង្កផលប៉ះពាល់ដល់ពលរដ្ឋក្នុងការប្រើប្រាស់ ដែលនាំឲ្យសេវាទូរស័ព្ទ និងសេវាអ៊ីនធឺណេត មាន ភាពរអាក់រអួល ជាដើម៕

អត្ថបទ៖ ធឿន វ៉ាន់សុង