គ្រឿងញៀន១៤៥គីឡូក្រាមត្រូវបានបង្ក្រាប និងឃាត់ខ្លួនឧក្រិដ្ឋជន៥នាក់

កម្លាំងនគរបាលនៃស្នងការដ្ឋាននគរបាលរាជធានីភ្នំពេញបានស្រាវជ្រាវរហូតឈានដល់ការបង្ក្រាបក្រុមឧក្រិដ្ឋជនគ្រឿងញៀនចំនួន៥នាក់ រឹបអូសគ្រឿងញៀនចំនួន១៤៥គីឡូក្រាម និងវត្ថុតាងមួយចំនួន។

លោកឧត្ដមសេនីយ៍ឯក ជួន ណារិន្ទ អគ្គស្នងការរង និងជាស្នងការនៃស្នងការដ្ឋាននគរបាលរាជធានីភ្នំពេញ បានមានប្រសាសន៍ឲ្យដឹងនៅក្នុងសន្និសីទសារព័ត៌មាននារសៀលថ្ងៃទី២១មិថុនានេះថា ប្រតិបត្តិការបង្ក្រាបគ្រឿងចំនួន១៤៥​គីឡូក្រាមនេះ បានធ្វើឡើងចាប់ពីថ្ងៃទីយប់ថ្ងៃទី១៦ និងថ្ងៃទី១៧មិថុនា នៅក្នុងភូមិសាស្ត្ររាជធានីភ្នំពេញ លើ៣ទីតាំង។

លោកបន្ថែមថា ក្រុមឧក្រិដ្ឋជនទាំងនេះ គឺជាឈ្មួញកណ្ដាល និងជាក្រុមចែកចាយដ៏ធំនៅក្នុងភូមិសាស្ត្ររាជធានីភ្នំពេញ និងតាមបណ្ដាលខេត្តមួយចំនួន។ លោកបន្ថែមថា បើតាមចម្លើយសារភាពរបស់ក្រុមជនសង្ស័យទាំងនេះ​ រយៈពេលមួយខែមកនេះ គឺពួកគេទទួលបានគ្រឿងញៀនពីឈ្មួញបន្តច្រើនលើកមកហើយ ហើយក្នុងមួយលើកៗ ចាប់ពី១០០ ទៅ១៥០គីឡូ និងយកមកវិចខ្ចប់បំបែកកែឆ្នៃត្រា ចែកចាយម្ដងចាប់ពី ២ ទៅ៣គីឡូជាប្រចាំ ដោយក្នុងមួយថ្ងៃ គឺអាចចែកចំនួន១០ដង។ បើទោះបីជាមុខសញ្ញាគ្រឿងញៀននៅមិនទាន់បង្ក្រាបអស់ដាច់ដានត្រឹមនេះក្ដី លោក ជួន ណារិន្ទ ក៏បានប្ដេជ្ញាថា នឹងខិតស្រាវជ្រាវតាមជំនាញបច្ចេកទេសដើម្បីស្រាវជ្រាវបន្ថែម។

លោកឧត្ដមសេនីយ៍ឯកស្នងការរាជធានីភ្នំពេញបញ្ជាក់បន្ថែមថា ករណីនេះ គឺមិនមែនជាករណីផលិតនៅក្នុងប្រទេសកម្ពុជានោះទេ គឺជាករណីនាំចូលតាមច្រកព្រុំដែនពីប្រទេសជិតខាងយកមកស្តុកទុកក្នុងរាជធានីភ្នំពេញដើម្បីចែកចាយបន្ត៕