ក្រុមអូទ្រីសចាត់ទុក Lewandowski ជាឧបសគ្គធំក្នុងការប្រកួតយប់នេះ

ក្រុមជម្រើសជាតិអូទ្រីសត្រូវជួបជាមួយក្រុមជម្រើសជាតិប៉ូឡូញ វេលាម៉ោង១១យប់ ថ្ងៃទី២១ ខែមិថុនា ក្នុងការប្រកូតវគ្គសន្សំពិន្ទុក្នុងពូល D លើក​ទី​២ ពាន​រង្វាន់​អឺរ៉ូ ឆ្នាំ​២០២៤។

គ្រូ​បង្វឹក​អូទ្រីស លោក Ralf Rangnick ​បាន​លើក​ឡើង​ថា ក្រុមរបស់លោកបានត្រៀមខ្លួនរួចជាស្រេចដើម្បីជួប​ប៉ូឡូញ។ តារាឆ្នើមប៉ូឡូញកីឡាករ Robert Lewandowski នឹងវិលត្រឡប់ចូលទីលានវិញ បន្ទាប់ពីខកខានការប្រកួតកាលពីសប្តាហ៍មុនដោយសារបញ្ហារបួស។

លោក Ralf Rangnick បាននិយាយថា ៖«Lewandowski គឺជាកម្លាំងសំខាន់​របស់ប៉ូឡូញ។ ច្បាស់ណាស់គាត់​នឹងបង្កភាពលំបាកដល់ក្រុមយើង​ ប៉ុន្តែ​យើង​នឹង​សម្លឹង​រក​ទម្រង់​មួយល្អដូច​គ្នា​។ ទោះជាគាត់​បានចូលលេង ឬអត់ក៏ដោយ យើង​ត្រូវ​តែ​លេងដើម្បីឈ្នះ ពីព្រោះនេះជាឱកាសដ៏ល្អបំផុតរបស់យើង»។

ចំពោះកីឡាករ Sabitzer ធ្លាប់ជាលេងជាមួយកីឡាករ Lewandowski បានដឹងយ៉ាងច្បាស់ពីសមត្ថភាពរបស់ខ្សែប្រយុទ្ធប៉ូឡូញមួយនេះ។ ជាពិសេសជំនាញ​បញ្ចប់​ទី​ក្នុង​តំបន់គ្រោះថ្នាក់​ពិ​ត​ជា​មាន​ប្រសិទ្ធភាព។ ចំពោះក្រុមអូទ្រីសទាំងមូលនឹងត្រូវប្រុងប្រយ័ត្នខ្លាំង ប្រសិនបើ Lewandowski អាចចូលលេងបានក្នុងការប្រកួតយប់នេះ។

កីឡាករ Sabitzer បាននិយាយថា ៖«​ខ្ញុំធ្លាប់លេងជាមួយគាត់កាលនៅក្រុម Bayern Munich។ គាត់ពិតជាពូកែណាស់។ គាត់​អាច​រក​គ្រាប់​បាល់​បាន​ពី​គ្រប់​ទី​កន្លែងទាំង​ក្នុងឬ​ក្រៅ​ប្រអប់។ យើង​ត្រូវ​តែ​ប្រុង​ប្រយ័ត្នហើយត្រូវដឹងពីរបៀប​ទប់ស្កាត់គាត់​»។

ក្រុមអូទ្រីស និងក្រុមប៉ូឡូញ សុទ្ធតែបាត់បង់៣ពិន្ទុដូចគ្នាក្នុងការប្រកួតទី១ ដូច្នេះកាប្រកួតយប់នេះក្រុមទាំង២ត្រូវ​ការ​ពិន្ទុ​ចាំ​បាច់​ ដើម្បី​រក​ផ្លូវ​ឡើងទៅវគ្គ១៦ក្រុមចុងក្រោយ​មិន​ថា​លេខ​២​ក្នុង​ពូល ឬ​ក្រុម​លេខ​៣​ល្អ​បំផុត​នោះ​ទេ៕

ប្រភព៖ Insideworldfootball
ប្រែសម្រួល៖ ផា រតនា