ជីវិតកម្សាន្ដ

ធ្លាប់មានប្រវត្តិគ្រួសារបែកបាក់ បវរកញ្ញាវៀតណាម Thuy Tien ព្រលយថា លែងចង់រៀបការ

បានផុស

២ years មុន

នៅ

ថ្ងៃសុក្រ ២១ មិថុនា ២០២៤

ដោយ

អតីតម្ចាស់មកុដ Miss Grand International (MGI) ឆ្នាំ ២០២១ Nguyễn Thúc Thùy Tiên បានព្រលយប្រយោគមួយឃ្លាថា នាងហាក់មិនចង់រៀបការកសាងគ្រួសារនឹងគេឡើយ ដោយសារខ្លួនធ្លាប់មានប្រវត្តិឪពុកម្ដាយលែងលះគ្នាកាលនាងនៅតូច។

ការបញ្ចេញមតិរបស់បវរកញ្ញាវ័យ ២៥ឆ្នាំរូបនេះបានកើតឡើងកាលពីថ្ងៃទី២០ ខែមិថុនា ក្នុងពេលដែលនាងបានចូលរួមកម្មវិធីមួយក្នុងប្រទេសកំណើតខ្លួន។ Thùy Tiên បាននិយាយថា “ប្រសិនបើខ្ញុំបានជួបមនុស្សដែលស័ក្តិសម ហើយពេញចិត្តផ្ដល់ក្ដីស្រលាញ់ឲ្យគេ នោះជារឿងសាមញ្ញបំផុត។ ប៉ុន្តែការនិយាយពីអាពាហ៍ពិពាហ៍នឹងពិបាកសម្រាប់ ខ្ញុំសូម្បីតែគិតដល់វា។ ការលែងលះរបស់ឪពុកម្តាយបានប៉ះពាល់ដល់ការជ្រើសរើសបុរសម្នាក់សម្រាប់មកជាគូជីវិតខ្ញុំនាពេលនេះ។ កាលពីមុនខ្ញុំធ្លាប់លឺមនុស្សជុំវិញខ្លួននិយាយថា កូននឹងធំឡើងដូចឪពុកម្តាយរបស់នាង ពេលរៀបការរួចក៏លែងលះគ្នា ឬអ្នកខ្លះបានបញ្ចេញមតិទៀតថា ខ្ញុំមិនសក្តិសមជាមួយបុរសណាទេ ព្រោះស្ថានភាពគ្រួសាររបស់ខ្ញុំមិនល្អឥតខ្ចោះ”។

មែនទែនទៅ Thùy Tiên មិនចង់ឲ្យរឿងនេះកើតឡើងទេ រឹតតែមិនចង់ឲ្យអ្វីដែលពួកគេនិយាយអំពីនាង ក្លាយជាការពិតទេ។ ចាប់ពីពេលនោះមក Tien បានគិតអំពីការជ្រើសរើសដោយប្រុងប្រយ័ត្ន ឬមិនរៀបការ។ ការចាកចេញរបស់ឪពុកម្តាយតាំងពីនាងអាយុ ៤ ឆ្នាំមក វាបានធ្វើឲ្យនាងកាន់តែឈឺចាប់ខ្លាំងឡើង។ នាងខ្លាចអាពាហ៍ពិពាហ៍បែកបាក់ ខ្លាចថាខ្លួនឯងនឹងមានវាសនាដូចពួកគាត់ ទើបតែងតែគិតថា មិនចង់រៀបការមានគ្រួសារដូចគេឯងឡើយ។

ទោះបីជាយ៉ាងណា ក្រឡេកទៅមើលជីវិតស្នេហាអតីតកាលរបស់នាង តាមពិតបវរកញ្ញារូបនេះធ្លាប់មានស្នេហាដល់ទៅ៣ដងរួចមកហើយ។ ក្នុងពេលមានស្នេហា Thuy Tien បាននិយាយថា នាងជាមនុស្សដែលមានចិត្តស្រលាញ់ខ្លាំង។ ស្នេហាដំបូងរបស់នាងបានកើតឡើងនៅពេលបញ្ចប់វិទ្យាល័យ ក្រោយមកទើបចំណងស្នេហាបានប្រេះឆា បន្ទាប់ពីខាងប្រុសសម្រេចចិត្តទៅរៀននៅបរទេស។ លើកទី២ដែលនាងធ្លាក់ក្នុងអន្លង់ស្នេហ៍ ក៏ជាក្ដីស្រលាញ់ឈឺចាប់ ពេលខ្លួននាងនិយាយលាទៅកាន់គេ។ ចំណែកឯស្នេហាទីបី ក៏ត្រូវបញ្ចប់យ៉ាងឆាប់រហ័ស ព្រោះអ្នកទាំងពីរបានជួបគ្នា ខុសពេលវេលា។

ទោះបីជាមានជីវិតស្នេហាមិនសមប្រកក៏ពិតមែន តែបច្ចុប្បន្ននេះ Thuy Tien ក៏កំពុងស្វែងរកដៃគូដែលទទួលខុសត្រូវចំពោះគ្រួសារ និងផ្តល់ក្តីសុខដល់នាង។ ការចែករំលែកអំពីដៃគូដ៏ល្អរបស់នាង មនុស្សត្រូវមានធាតុផ្សំទាំងអស់ដូចជា ជំនាញ ភាពវៃឆ្លាត និងភាពអត់ធ្មត់។

បវរកញ្ញាវៀតណាម បានសារភាពថា ដ្បិតថាពេលនេះមិនទាន់ចង់រៀបការ ប៉ុន្តែបុរសដែលនាងចង់បានជាគូអនាគត ត្រូវតែជាមនុស្សដែលនាំមកនូវសុវត្ថិភាព។ ដូចគ្នាសម្រាប់អាពាហ៍ពិពាហ៍ នាងចង់មានអាពាហ៍ពិពាហ៍ប្រកបដោយសុវត្ថិភាព។ ផ្នែកខាងក្រោយដ៏រឹងមាំ នឹងផ្តល់ឲ្យនូវអារម្មណ៍សុវត្ថិភាព និងសន្តិភាពក្នុងការចេញទៅធ្វើការជារៀងរាល់ថ្ងៃ ហើយនាងគិតថា នេះគឺជារឿងសំខាន់បំផុត។

គួរបញ្ចាក់ដែរថា បន្ទាប់ពីបានគ្រងមកុដ MGI អស់រយៈពេលជាង៤ ឆ្នាំមក ពេលនេះអាជីពរបស់ Thuy Tien ហាក់មានសន្ទុះ កាក់កប រីកចម្រើនទៅមុខឥតឈប់ឈរ។ សម្រស់របស់វៀតណាមរូបនេះ ត្រូវបានគេស្គាល់ថាជារាជិនីសម្រស់ ដែលមានភាពលេចធ្លោជាងគេក្នុងប្រវត្តិសាស្ត្រកម្មវិធីប្រកួត ជាពិសេស នៅពេលដែលនាងបានធ្វើដំណើរទៅកាន់ប្រទេសជុំវិញពិភពលោក រួមទាំងប្រទេសកម្ពុជា ហើយថែមទាំងបានធ្វើកិច្ចសន្យាផ្សាយពាណិជ្ជកម្មតូចធំជាច្រើនផងដែរ៕