រដ្ឋមន្ត្រីក្រសួងព័ត៌មាន ស្នើអ្នកសារព័ត៌មាន MMO  ឈប់បង្ហោះវីដេអូជនដៃដល់ស្រី ស៊ីណា បាញ់ជនរងគ្រោះ

តាមរយៈទំព័រហ្វេសប៊ុក រដ្ឋមន្ត្រីក្រសួងព័ត៌មាន​ លោក នេត្រ ភក្ត្រា ស្នើអ្នកសារព័ត៌មាន អ្នកប្រើប្រាស់បណ្តាញទំនាក់ទំនងសង្គម អ្នកផលិតមាតិកា និង MMO បញ្ឈប់ការផ្សាយវីដេអូដែលជនត្រូវចោទ ស្រី ស៊ីណា បាញ់ស្រោចលើជនរងគ្រោះកាលពីថ្ងៃទី១៧ ខែមិថុនា កន្លងទៅ ព្រោះរូបភាពនេះ ជារូបភាពដ៏ឃោរឃៅ និងប៉ះពាល់ដល់ផ្លូវចិត្តក្រុមគ្រួសារនៃសព។

លោក នេត្រ ភក្ត្រា ស្នើដូច្នេះ បន្ទាប់មានការលេចធ្លាយនូវឃ្លីបវីដេអូនៃហេតុការណ៍អតីតឧកញ៉ា ស្រី ស៊ីណា បាញ់ជនរងគ្រោះ និងត្រូវបានចែករំលែកនៅលើបណ្តាញសង្គម ព្រមទាំងឃើញអង្គភាពសារព័តមានខ្លះបានផ្សព្វផ្សាយបន្ត។

តាមសំណេរនៅរាត្រីថ្ងៃទី២២ ខែមិថុនា លោក រដ្ឋមន្ត្រីសរសេរដូច្នេះ ៖«ខ្ញុំសូមបងប្អូនអ្នកសារព័ត៌មានបញ្ឈប់ការចែកចាយផ្សព្វផ្សាយបន្ត និងស្នើដល់បងប្អូនអ្នកប្រើប្រាស់បណ្តាញសង្គមទាំងអស់កុំចែករំលែកបន្តនូវរូបភាពដ៏សាហាវឃោរឃៅនេះ ខណៈក្រុមគ្រួសារសាច់ញាតិនៃប្អូនស្រីប្អូនប្រុសដែលបានស្លាប់ កំពុងកាន់មរណទុក្ខយ៉ាងក្រៀមក្រំចំពោះការបាត់បង់កូនក្មួយជាទីស្រឡាញ់របស់ខ្លួន»។

ជាមួយគ្នានេះ អគ្គនាយកដ្ឋានព័ត៌មាន និងសោតទស្សន៍ ក៏ស្នើអ្នកសារព័ត៌មានឱ្យបញ្ឈប់ការផ្សព្វផ្សាយវីដេអូ ដែលបង្ហាញពីសកម្មភាព អតីត ឧកញ៉ា ចូលទៅបាញ់ជនរងគ្រោះ។

តាមលោក នេត្រ ភក្រ្តា ដែលអតីតអ្នកសារព័ត៌មាន ការផ្សព្វផ្សាយពីវីដេអូជនត្រូវចោទ​ ស្រី ស៊ីណា បាញ់ស្រោចជាច្រើនគ្រាប់លើជនរងគ្រោះ ជាការកាន់តែធ្វើឱ្យប៉ះពាល់ដល់ផ្លូវចិត្តរបស់គ្រួសារជនរងគ្រោះ និងប៉ះពាល់ដល់សេចក្តីថ្លៃថ្នូរនៃជនរងគ្រោះ។

តាមលោករដ្ឋមន្ត្រីក្រសួងព័ត៌មាន  ការផ្សព្វផ្សាយឃ្លីបវីដេអូនេះពីសំណាក់ប្រព័ន្ធផ្សព្វផ្សាយ គឺប៉ះពាល់ដល់ក្រមសីលធម៌វិជ្ជាជីវៈសារព័ត៌មាន។ ហេតុដូច្នេះ លោករដ្ឋមន្ត្រី អំពាវនាវឱ្យបញ្ឈប់ការផ្សព្វផ្សាយ និងការចែកចាយបន្តនូវវីដេអូឃ្លីបទាំងអស់នោះ។

មិនខុសពីការលើកឡើងរបស់លោក នេត្រ ភក្ត្រា ឡើយ អគ្គនាយកដ្ឋានព័ត៌មាន និងសោតទស្សន៍ ក៏ចាត់ទុកសកម្មភាពផ្សព្វផ្សាយពីវីដេអូជនត្រូវចោទ​ ស្រី ស៊ីណា បាញ់ស្រោចជាច្រើនគ្រាប់លើជនរងគ្រោះ គឺកាន់តែធ្វើឱ្យប៉ះពាល់ដល់ផ្លូវចិត្តរបស់គ្រួសារជនរងគ្រោះ ហើយការផ្សព្វផ្សាយវីដេអូនេះគឺប៉ះពាល់ដល់ក្រមសីលធម៌វិជ្ជាជីវៈសារព័ត៌មាន។

គួរឱ្យដឹងថា​ នៅរសៀលថ្ងៃទី២២ ខែមិថុនា នេះ តំណាងអយ្យការអមសាលាដំបូងរាជធានីភ្នំពេញ បានចោទប្រកាន់ លើជនដៃដល់ ស្រី ស៊ីណា ពីបទ ឃាតកម្ម និងបទប្រើប្រាស់អាវុធដោយគ្មានការអនុញ្ញាត តាមមាត្រា ១៩៩ នៃក្រមព្រហ្មទណ្ឌ និងមាត្រា ២០ នៃច្បាប់ស្តីពីការគ្រប់គ្រងអាវុធ គ្រឿងផ្ទុះ និងគ្រាប់រំសេវ៕