ព័ត៌មានជាតិ

ទឹកជំនន់ក្នុងអូរព្រំដែនថៃ កំពុងជន់លិចស្ពាន និងដំណាំនៅស្រុកកំរៀង

បានផុស

៣ years មុន

នៅ

ថ្ងៃសុក្រ ៩ កញ្ញា ២០២២

ដោយ

ស្ពានមួយខ្សែ ត្រូវបានអាជ្ញាធរបញ្ជាឲ្យផ្អាកការធ្វើចរាចរជាបណ្តោះអាសន្ន បន្ទាប់ពីមានទឹកជំនន់មកពីប្រទេសថៃ ជន់ហូរកាត់ពីលើស្ពានរួចមក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គួរបញ្ជាក់ថា ស្ពាននេះគឺសម្រាប់ឆ្លងអូរក្នុងភូមិលំផាត់ ក្នុងឃុំអូរដារ ស្រុកកំរៀង ខេត្តបាត់ដំបង ហើយក៏ជាស្ពានមួយសម្រាប់ឲ្យបងប្អូនប្រជាកសិករ ដឹកនាំផលដំណាំចេញពីភូមិសំរោង ភូមិតាំងយូរ និងភូមិលំផាត់ ឡើងទៅលើផ្លូវជាតិផងដែរ ដើម្បីនាំទៅកាន់ទីផ្សារ។ ដោយកាលពីប៉ុន្មានឆ្នាំកន្លងទៅ ក្បាលស្ពាននេះត្រូវបានទឹកជំនន់វាយបំផ្លាញច្រោះបាក់ម្ខាង ដែលតម្រូវឲ្យអាជ្ញាធរចាក់ដីបំពេញ និងជួសជុលឡើងវិញ ដើម្បីឲ្យប្រជាពលរដ្ឋនៅក្នុងតំបន់នេះបានធ្វើដំណើរឡើងវិញ។

លុះចាប់ពីថ្ងៃទី ៨ ខែកញ្ញា ម្សិលមិញនេះ ទឹកជំនន់ពីប្រទេសថៃ បានហូរចូលក្នុងអូរព្រំដែនកម្ពុជា-ថៃ និងបង្កឲ្យទឹកហូរធ្លាក់ចូលទៅក្នុងអូរដារ ទើបហូរបែកវាលទៅលើផលដំណាំរបស់ប្រជាកសិករមួយចំនួននៅក្នុងតំបន់នេះ ថែមទាំងលិចលើស្ពានលំផាត់តែម្តង។

បើតាមប្រភពអ្នកនៅតំបន់នោះបានបញ្ជាក់ថា រហូតមកទល់នឹងព្រឹកថ្ងៃទី ៩ នេះ សន្ទុះទឹកទើបតែស្រកចុះបន្តិចតែប៉ុណ្ណោះដែលមិនទាន់មានសញ្ញាណាមួយអាចកំណត់បានថា ទឹកនឹងអាចស្រកវិញ ឬក៏ឡើងបន្តទៀតនោះឡើយ ដោយគ្រាន់តែអាជ្ញាធរក្រើនរំលឹកដល់ពលរដ្ឋឲ្យមានការប្រុងប្រយ័ត្នតែប៉ុណ្ណោះ៕

អត្ថបទ៖ សោ និយមរ័ត្ន