ព័ត៌មានជាតិ

ខេត្តកំពង់ស្ពឺមានទីសក្ការ ២ កន្លែង ល្បីដល់មន្ត្រីថ្នាក់ដឹកនាំទៅបន់ស្រន់

បានផុស

៤ years មុន

នៅ

ថ្ងៃព្រហស្បតិ៍ ១៥ កញ្ញា ២០២២

ដោយ

ខេត្តកំពង់ស្ពឺមានទីសក្ការពីរកន្លែង ដែលពលរដ្ឋមូលដ្ឋានមានជំនឿល្បីស័ក្កសិទ្ធិ ហើយមានថ្នាក់ដឹកនាំមកធ្វើពិធីបួងសួងជាហូរហែ។

លោក ស៊ុន មានជ័យ ប្រធានមន្ទីរវប្បធម៌ខេត្តកំពង់ស្ពឺបានឲ្យកម្ពុជាថ្មីដឹងថា ភ្នំព្រះនិងភ្នំចាស់ជាទីសក្ការដ៏ល្បីនៅខេត្តកំពង់ស្ពឺ ហើយជាទីឋានដែលពលរដ្ឋមានជំនឿមកធ្វើពិធីបន់ស្រន់ផ្សេងៗ។

ភ្នំចាស់គឺជាភ្នំធម្មជាតិមួយ ដែលមានអាយុកាលរាប់ពាន់ឆ្នាំមកហើយ និងជាទីតាំងប្រវត្តិសាស្ត្រតាំងពីសម័យបុរេប្រវត្តិ។ ភ្នំចាស់នេះមានបារមីខ្លាំងពូកែ ហើយមានប្រវត្តិដិតដាមរឿងអបិយជំនឿជាច្រើន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកថា កាលពីដើមនៅតំបន់ភ្នំចាស់នេះមានជនជាតិសួយរស់នៅ និងមានមេកន្ទ្រាញគ្រប់គ្រងដ៏ខ្លាំងពូកែម្នាក់។ រហូតមកដល់សព្វថ្ងៃនេះ ភ្នំចាស់នៅតែល្បីខាងជំនឿអរូបី ហើយប្រជាពលរដ្ឋដែលមានជំនឿលើបារមីភ្នំ តែងតែរៀបចំពិធីឡើងភ្នំជារៀងរាល់ឆ្នាំនៅពេលចូលឆ្នាំខ្មែរ។

ក្រៅពីភ្នំចាស់ ខេត្តកំពង់ស្ពឺមានទីសក្ការមួយទៀតដែលពលរដ្ឋល្បីតគ្នាមានបារមីខ្លាំងពូកែ។

លោក ស៊ុន មានជ័យ បានឲ្យដឹងថា ភ្នំព្រះជាទីសក្ការដ៏ល្បីមួយទៀតនៅខេត្តកំពង់ស្ពឺ។ អ្នកស្រុកជិតឆ្ងាយបាននាំគ្នាទៅគោរពបូជា ដោយម្នាក់ៗមានជំនឿថាគឺជាភ្នំដែលមានបារមីពូកែស័ក្តសិទ្ធិ ហើយជឿមានអ្នកស្នងរូប។

ដោយសម្បូរដោយថ្មធំៗគរបន្តុបលើគ្នា នៅក្នុងរូងភ្នំព្រះមានតម្កល់រូបព្រះពុទ្ធបដិមាចាប់ពី ៣ អង្គទៅ ៥ អង្គ ហើយអ្នកមានជំនឿភាគច្រើនចូលចិត្តទៅធ្វើបុណ្យនៅរូងព្រះ ៥ អង្គ។

បើតាមលោក ស៊ុន មានជ័យ កន្លងទៅថ្នាក់ដឹកនាំជាន់ខ្ពស់ក្នុងជួររដ្ឋាភិបាល បាននាំគ្នាទៅធ្វើពិធីបួងសួងផ្សេងៗដោយសារជឿជាក់លើបារមីនៅទីសក្ការភ្នំព្រះ។ ជាមួយគ្នានេះ ពលរដ្ឋក្នុងមូលដ្ឋាននិងតាមបណ្តាខេត្តនានាក៏តែងតែមកជួបជុំនៅទីសក្ការភ្នំព្រះ ដោយរៀបចំពិធីសែនព្រេនតាមប្រពៃណីមិនដែលខកខានឡើយ៕