មកដឹងចំនួនម៉ោងធ្វើការក្នុង១ថ្ងៃ របស់សម្ដេចតេជោ កំឡុងកិច្ចប្រជុំកំពូលអាស៊ាន

កម្ពុជាទើបបានបញ្ចប់កិច្ចការជាម្ចាស់ផ្ទះរៀបចំ កិច្ចប្រជុំកំពូលអាស៊ានលើកទី ៤០-៤១ និងកិច្ចប្រជុំកំពូលពាក់ព័ន្ធ ពីថ្ងៃទី១០ ដល់ទី១៣ ខែវិច្ឆិកា ឆ្នាំ២០២២នេះ។ ក្នុងនាម សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងជាប្រធានអាស៊ានឆ្នាំ ២០២២នោះ មហាជនពិតជាចង់ដឹងថា កំឡុងពេលដ៏មានសារសំខាន់ និងមមាញឹកនេះ តើសម្ដេចតេជោ បំពេញភារកិច្ច និងអាចសម្រាក ប៉ុន្មានម៉ោងក្នុង១ថ្ងៃ?

ថ្លែងនៅក្នុងសន្និសីទសារព័ត៌មាន នៅវិមានសន្តិភាព បង្ហាញលទ្ធផលសំខាន់ៗ នៃកិច្ចប្រជុំកំពូលអាស៊ាន លើកទី៤០ និង៤១ និងកិច្ចប្រជុំកំពូលពាក់ព័ន្ធ នៅល្ងាចថ្ងៃទី១៣ ខែវិច្ឆិកានេះ សម្តេចតេជោ ហ៊ុន សែន បានឱ្យដឹងថា សម្ដេចសឹងតែបំពេញការងាររយៈពេលជាង ១៩ម៉ោង ក្នុងមួយថ្ងៃ ពោលគឺចាប់ពីម៉ោង ៦ព្រឹកតទៅ។

សម្ដេចតេជោ ហ៊ុន សែន មានប្រសាសន៍ថា៖ “ខ្ញុំធ្វើការក្នុងពេលហ្នឹង (កំឡុងពេលកម្ពុជាជាម្ចាស់ផ្ទះរៀបចំកិច្ចប្រជុំកំពូលអាស៊ាន) ចាប់ពីម៉ោង ៦ព្រឹកភ្ញាក់ រហូតដល់ម៉ោង ១យប់។ ហើយថ្ងៃនេះ ខ្ញុំក្រោកពីម៉ោង៦ព្រឹក មកដែរ ធ្វើការរហូត”។

ទោះជាយ៉ាងណា សម្ដេចបានបញ្ជាក់ថា សុខភាពសម្ដេចនៅរឹងមាំមិនបានទ្រុឌទ្រោមឡើយ ដោយបានក្រើនរំលឹកអ្នកសារព័ត៌មានវ័យក្មេងជាង ប្រយ័ត្ន ធ្វើការមិនទាន់សម្ដេច។

គួរបញ្ជាក់ថា កិច្ចប្រជុំកំពូលអាស៊ាន ដែលកម្ពុជាធ្វើជាម្ចាស់ផ្ទះ ធ្វើឡើងចាប់ផ្តើមពីថ្ងៃទី១០ ដល់ទី១៣ ខែវិច្ឆិកា ឆ្នាំ២០២២ នៅរាជធានីភ្នំពេញ។ ព្រឹត្តិការណ៍មានដូចជា៖ កិច្ចប្រជុំកំពូលអាស៊ានលើកទី៤០ និងលើកទី៤១, កិច្ចប្រជុំកំពូលអាស៊ាន-ចិន លើកទី២៥, កិច្ចប្រជុំកំពូលអាស៊ាន-ជប៉ុន លើកទី២៥, កិច្ចប្រជុំកំពូលអាស៊ាន-សាធារណរដ្ឋកូរ៉េ លើកទី២៣, កិច្ចប្រជុំកំពូលអាស៊ានបូកបី លើកទី២៥, កិច្ចប្រជុំកំពូលរំលឹកខួប៣០ឆ្នាំ នៃទំនាក់ទំនងដៃគូសន្ទនាអាស៊ាន-ឥណ្ឌា, កិច្ចប្រជុំកំពូលអាស៊ាន-សហរដ្ឋអាមេរិក លើកទី១០, កិច្ចប្រជុំកំពូលអាស៊ាន-អូស្ត្រាលី លើកទី២, កិច្ចប្រជុំកំពូលរំព្ញកខួបនៃទំនាក់ទំនងអាស៊ាន-កាណាដា, កិច្ចប្រជុំកំពូលអាស៊ាន-អង្គការសហប្រជាជាតិ និងកិច្ចប្រជុំកំពូលអាស៉ីបូព៌ា លើកទី១៧៕

អត្ថបទ៖ ច័ន្ទ វីរៈ