ប្រធានសភាកម្ពុជា ឡាវ និងវៀតណាម CLV បានចុះហត្ថលេខាលើសេចក្តីថ្លែងការណ៍រួម ស្តីពីកិច្ចប្រជុំកំពូល​សភានៃប្រទេសទាំងបី នៅរាជធានីភ្នំពេញ នាល្ងាចថ្ងៃទី ២០ ខែវិច្ឆិកា។

នាឱកាសនៃមហាសន្និបាតអន្តរជាតិសភាអាស៊ាន( AIPA) លើកទី ៤៣ ចាប់ពីថ្ងៃទី ២០-២៥ វិច្ឆិកា នៅរាជធានីភ្នំពេញ ប្រធានរដ្ឋសភាកម្ពុជា ឡាវ និងវៀតណាម បានជួបពិភាក្សាអំពីកិច្ចសហប្រតិបត្តិការ​រវាងសភានៃប្រទេសទាំងបី ដើម្បីពង្រឹងបន្ថែមទៀតនៃទំនាក់ទំនងមិត្តភាព ជាប្រពៃណី អ្នកជិតខាងល្អ កិច្ចសហប្រតិបត្តិការលើគ្រប់វិស័យ និងយូរអង្វែងនៃប្រទេសទាំងបី។

នៅក្នុងសេចក្តីថ្លែងការណ៍ ប្រធានសភាទាំងបី បានប្តេជ្ញាចិត្តយ៉ាងមុតមាំក្នុងការពង្រីក និងធ្វើឱ្យកាន់តែស៊ី​ជម្រៅបន្ថែមទៀត នូវកិច្ចសហប្រតិបត្តិការ និងភាពជាដៃគូរបស់សភា ដើម្បីថែរក្សា ការពារ​កិច្ច​សហប្រតិបត្តិការជិតស្និទ្ធ និងផ្តល់ផលប្រយោជន៍ទៅវិញទៅមករវាងរដ្ឋសភា នៃប្រទេសទាំងបី ដោយជំរុញ​កិច្ចសហប្រតិបត្តិការនយោបាយ វប្បធម៌ សេដ្ឋកិច្ច និងសន្តិសុខ សម្រាប់ការអភិវឌ្ឍសេដ្ឋកិច្ចសង្គម នៃប្រទេសទាំងបី។

ជាមួយគ្នានេះ ប្រធានសភានៃប្រទេសទាំងបី បានយល់ស្របលើយន្តការដែលមានស្រាប់ នៃកិច្ចប្រជុំគណៈ​កម្មាធិការ/គណៈកម្មាធិការកិច្ចការបរទេស CLV ទៅជា«កិច្ចប្រជុំកំពូលសភា CLV»។ កិច្ចប្រជុំកំពូលនេះ​មានគោលបំណង ធ្វើឱ្យស៊ីជម្រៅបន្ថែមទៀត នូវទំនាក់ទំនងមិត្តភាព សាមគ្គីភាព និងកិច្ចសហប្រតិបត្តិការ​លើគ្រប់វិស័យក្នុងចំណោមប្រទេសទាំងបី។ ជំរុញការផ្លាស់ប្តូរ និងផ្សព្វផ្សាយព័ត៌មាន បទពិសោធន៍ និងការអនុវត្តឱ្យបានល្អលើមុខងារ និងភារកិច្ចរបស់សភាជាតិ CLV។ កៀរគធនធានហិរញ្ញវត្ថុ ដើម្បីអនុវត្តកម្មវិធី និងគម្រោងក្រោមក្របខណ្ឌ នៃតំបន់ត្រីកោណអភិវឌ្ឍ CLV (CLV-DTA)។​ កិច្ចប្រជុំកំពូលលើកទី១ នឹងធ្វើជាម្ចាស់ផ្ទះដោយរដ្ឋសភា នៃប្រទេសឡាវ នៅឆ្នាំ ២០២៣៕