ពាក់កណ្ដាលឆ្នាំនេះ សភាកម្ពុជានឹងធ្វើជាម្ចាស់ផ្ទះរៀបចំកិច្ចប្រជុំប្រចាំឆ្នាំរបស់ក្រុមអ្នកនយោបាយអាយប៉ា

នៅពាក់កណ្ដាលឆ្នាំ២០២៥នេះ សភាកម្ពុជានឹងធ្វើជាម្ចាស់ផ្ទះរៀបចំកិច្ចប្រជុំប្រចាំឆ្នាំរបស់ក្រុមអ្នកនយោបាយអាយប៉ា (AIPA) លើកទី១៦។ បើតាមគម្រោង កិច្ចប្រជុំក្រុមអ្នកនយោបាយអាយប៉ា គ្រោងរៀបចំចាប់ពីថ្ងៃទី១៤ ដល់ថ្ងៃទី១៧ ខែកក្កដា ឆ្នាំ២០២៥ ខាងមុខ នៅរាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ជាម យៀប អនុប្រធានទី១ រដ្ឋសភា និងជាប្រធានក្រុមអាយប៉ាជាតិកម្ពុជា កាលពីព្រឹកថ្ងៃទី៤ ខែកុម្ភៈ ឆ្នាំ២០២៥ បានអញ្ជើញដឹកនាំកិច្ចប្រជុំផ្សព្វផ្សាយអំពីប្រតិទិនការងារអាយប៉ា និងកិច្ចប្រជុំត្រៀមរៀបចំកិច្ចប្រជុំប្រចាំឆ្នាំរបស់ក្រុមអ្នកនយោបាយអាយប៉ា (AIPA) លើកទី១៦ (The 16th Meeting of AIPA CAUCUS) ដែលសភានៃកម្ពុជា ធ្វើជាម្ចាស់ផ្ទះ។

សភាកម្ពុជាធ្លាប់ទទួលធ្វើជាម្ចាស់ផ្ទះរៀបចំមហាសន្និបាតអាយប៉ាចំនួន ៣លើកកន្លងមកហើយ ក៏ដូចជាធ្វើជាម្ចាស់ផ្ទះរៀបចំកិច្ចប្រជុំផ្សេងៗមួយចំនួនទៀត។ សម្រាប់ប្រតិទិនការងាររបស់អាយប៉ាឆ្នាំ២០២៥នេះ ត្រូវបានលោក ជាម យៀប បញ្ជាក់ឱ្យដឹងថា មានកិច្ចប្រជុំចំនួន៥ មុននឹងដល់មហាសន្និបាតអាយប៉ា លើកទី៤៦ ក្នុងអំឡុងខែកញ្ញា ឆ្នាំ២០២៥ខាងមុខ មានដូចជាកិច្ចប្រជុំសមាជិកសភាស្ត្រីអាយប៉ា កិច្ចប្រជុំទល់មុខរវាងប្រមុខដឹកនាំអាស៊ាន និងប្រមុខអាយប៉ា កិច្ចប្រជុំសមាជិកសភាវ័យក្មេងអាយប៉ា កិច្ចប្រជុំអាយប៉ាស្ដីពីគ្រឿងញៀន នឹងប្រព្រឹត្តទៅនៅប្រទេសម៉ាឡេស៊ី ដែលជាប្រធានអាស៊ានឆ្នាំ២០២១៥។

ចំណែកកិច្ចប្រជុំនៃអ្នកនយោបាយអាយប៉ា AIPA Caucus គឺនឹងរៀបចំឡើងនៅប្រទេសកម្ពុជា ដែលសភាកម្ពុជាធ្វើជាម្ចាស់ផ្ទះគ្រោងរៀបចំនៅរាជធានីភ្នំពេញ ចាប់ពីថ្ងៃទី១៤ ដល់ថ្ងៃទី១៧ ខែកក្កដា ឆ្នាំ២០២៥ ខាងមុខ។ ដូច្នេះ លោកអនុប្រធានទី១ រដ្ឋសភា បានស្នើឱ្យមានការបង្កើតគណៈកម្មការរៀបចំកិច្ចប្រជុំ និងចាត់តាំងគណៈប្រតិភូសភាកម្ពុជាសម្រាប់ចូលរួមកិច្ចប្រជុំ។

លោក ជាម យៀប ក៏បានណែនាំឱ្យអគ្គលេខាធិការរដ្ឋសភា ទំនាក់ទំនងជាមួយអគ្គលេខាធិការដ្ឋានព្រឹទ្ធសភា និងអគ្គលេខាធិការដ្ឋានអាយប៉ានៅហ្សាការតា អំពីដំណើរការផ្សេងៗសម្រាប់ឈានទៅកាន់ការរៀបចំកិច្ចប្រជុំ និងម្យ៉ាងទៀត ត្រូវធ្វើការពិនិត្យសិក្សាវាយតម្លៃអំពីទីតាំងនៃការៀបចំកិច្ចប្រជុំ ទាំងផលចំណេញ បញ្ហាប្រឈម និងភាពងាយស្រួលរវាងការរៀបចំកិច្ចប្រជុំនៅក្នុងវិមានរដ្ឋសភា និងការរៀបចំកិច្ចប្រជុំនៅសណ្ឋាគារណាមួយក្នុងរាជធានីភ្នំពេញ៕