រដ្ឋមន្ត្រីអប់រំ៖ ពេលនេះសិស្សបានផ្លាស់ប្តូរឥរិយា​បថ​ពីការបើកចម្លងមកប្រឡងដោយចំណេះដឹងខ្លួនឯង

លោកបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា មានប្រសាសន៍ថា ពេលនេះសិស្សានុ​សិស្សបានផ្លាស់ប្តូរឥរិយាបថដែលពីមុនមកប្រឡងបើកចម្លងមកប្រឡងដោយឈរលើមូដ្ឋានចំណេះដឹងខ្លួនឯងក្រោយពីក្រសួងអប់រំបានធ្វើកំណែទម្រង់ការប្រឡងបាក់ឌុបចាប់ពីឆ្នាំ២០១៤មក។

ថ្លែងក្រោយអញ្ជើញបើកប្រធានវិញ្ញាសាជានិមិត្តរូប នៅមណ្ឌលវិទ្យាល័យព្រះស៊ីសុវត្ថិ នៅព្រឹកថ្ងៃទី៥ធ្នូនេះ លោក
រដ្ឋ​មន្ត្រីបានមានប្រសាសន៍បន្តថា «អ្វីធ្វើឱ្យសប្បាយចិត្តយើងឃើញថាសិស្សានុសិស្សរបស់យើងបានខិតខំប្រឹងប្រែងសិក្សារៀនសូត្រ គាត់បានផ្លាស់ប្តូរពីហៅថាការមកប្រឡង គឺបើកចម្លងប្រែមកប្រឡងឈរទៅលើមូលដ្ឋាននៃចំណេះដឹងរបស់គាត់»។ លោករដ្ឋមន្ត្រីបានបន្តថា ចំណែកលោកគ្រូអ្នកគ្រូក៏ជួយគាំទ្រ។ ប៉ុន្តែគន្លឹះដ៏សំខាន់មួយទៀត គឺសម្ដេចនាយ​ក​រដ្ឋមន្ត្រីជួបសិស្សនិទ្ទេសAដែលជាកក្តាមួយជំរុញឱ្យសិស្សខិតខំរៀនសូត្រដើម្បីជួបសម្តេចដោយមិនត្រឹមតែទទួបាន​អាយផេកប៉ុណ្ណោះទេ គឺជួបជាកិត្តិយសសម្រាប់ខ្លួនគាត់ គ្រួសារគាត់ និងសាលាហើយនាយកសាលាណាដែលមានសិស្សទទួលបាននិទ្ទេសAច្រើនចំនួន៥នាក់ ក៏ទទួលបានពានជានាយកសាលាល្អពីសម្តេចនាយករដ្ឋមន្ត្រីផងដែរ។

គួរបញ្ចាក់ថា សម្រាប់ការប្រឡងសញ្ញាបត្រមធ្យមសិក្សាទុតិយភូមិ ៥ធ្នូ ២០២២នេះ មានបេក្ខជនចុះឈ្មោះប្រឡងទូទាំង​​ប្រទេសសរុប ១២៨.១៣៤នាក់ ស្រី៦៩.៧៧១នាក់ មានមណ្ឌលសំណេរសរុប២២១ បន្ទប់ប្រឡងសរុប៥១៧៤​ក្នុងនោះមានថ្នាក់វិទ្យាសាស្ត្រ ៧៦មណ្ឌល ត្រូវជា១៧៤៣បន្ទប់ថ្នាក់វិទ្យាសាស្ត្រសង្គម ១៥៤មណ្ឌល ត្រូវជា៣៤៣១បន្ទប់។
ចំនួនបេក្ខជនចុះឈ្មោះប្រឡងនៅឆ្នាំនេះបើធៀបទៅនឹងការប្រឡងឆ្នាំ២០២១កន្លងទៅឃើញថា មានការកើនឡើង ខណៈឆ្នាំមុនមានបេក្ខជនចូលរួមប្រឡងចំនួន១១៤១៨៧នាក់ស្រី៥៧១២៣នាក់ចែកជា ២០៤មណ្ឌលត្រូវជា ៤៦១៥ បន្ទប់ ។

ក្រសួងនឹងប្រកាសលទ្ធផលប្រឡងនៅថ្ងៃទី២៧ធ្នូ សម្រាប់នៅមណ្ឌលនៅរាជធានីភ្នំពេញ និងខេត្តកណ្តាលនិងថ្ងៃទី២៨​ធ្នូប្រកាសនៅមណ្ឌលប្រឡងផ្សេងៗទៀតនៅទូទាំងប្រទេស៕

អត្ថបទ៖ សំអឿន