ខេត្តកែប​រៀបចំ​កម្មវិធី​​កម្សាន្ត​ឆ្លងឆ្នាំបី​ថ្ងៃ ទទួល​ភ្ញៀវទេសចរ​ទៅ​កម្សាន្ត

អាជ្ញាធរ​​ខេត្តកែប នឹង​រៀបចំ​កម្មវិធីអបអរសាទរបុណ្យឆ្លងឆ្នាំសកលចំនួន ៣ ថ្ងៃ ចាប់ពីថ្ងៃទី ៣០-៣១ ខែធ្នូឆ្នាំ២០២២ រហូត​ដល់ថ្ងៃទី១ខែមករាឆ្នាំ២០២៣។

នៅក្នុងពិធីឆ្លងឆ្នាំសកល អាជ្ញាធរ​ខេត្ត​កែប​នឹង​​​រៀបចំ​កម្មវិធី​កម្សាន្ត​ជាច្រើនទៀតដូចជា ​​ការប្រគុំតន្ត្រី ៣ ថ្ងៃ កម្មវិធី​បង្ហើរខ្លែងខ្មែរ កម្មវិធីប្រណាំងទូក​ផ្កាចារសមុទ្រ ការដុតកំាជ្រួចនិងបង្ហោះគោមជាដើម។

កម្មវិធីបុណ្យឆ្លងឆ្នាំសកល អាជ្ញាធរ​ខេត្តកែបបានធ្វើការអំពាវនាវដល់ពលរដ្ឋទៅកម្សាន្តលេងនៅខេត្តកែបឱ្យបានច្រើន​កុះករ ដើម្បីអបអរពិធីបុណ្យឆ្លងឆ្នាំសកលឆ្នាំ២០២២និងឈានចូលឆ្នាំ២០២៣ខាងមុខនេះ។

ខេត្តកែប​មាន​ការអភិវឌ្ឍ និងមានតំបន់ទេសចរណ៍ទាក់ទាញជាច្រើន។ តំបន់ទេសចរណ៍ដែលមានភ្ញៀវ​ទេសចរណ៍ជាតិនិងអន្តរជាតិចាប់​អារម្មណ៍និងទៅកម្សាន្តច្រើនមានដូចជា កោះទន្សាយ តំបន់​តំបន់ភ្នំឧទ្យានជាតិកែប។ នៅលើភ្នំឧទ្យានជាតិកែប ជាតំបន់ទេសចរណ៍ដ៏សម្បូរបែបនិងមើលឃើញសមុទ្រឈើ មានអាកាស​ធាតុត្រជាក់ និងខ្យល់អាកាសបរិសុទ្ធ សម្រាប់អ្នកទេសចរជាតិនិងអន្តរជាតិអាចទៅលេងដើម្បីបំបាត់រាល់ការស្មុគស្មាញទាំងឡាយ រួមទាំង​​តំបន់ទំនប់ចំការបីភ្នំវល្លិ៍។

ក្រៅពីនោះ ខេត្ត​កែប​នៅមានតំបន់ទេសចរជាច្រើនទៀត ក្នុងនោះមានសហគមន៍កសិដ្ឋានចិញ្ចឹមគោពូជនិងទីលានកន្លែងប្រណាំងសេះផងដែរ៕

អត្ថបទ៖ សឹង រ៉ាត់