លោក ឌិត ទីណា នឹងធ្វើការជិតស្និទ្ធជាមួយរដ្ឋមន្ត្រីពាណិជ្ជកម្ម ដើម្បីស្វែងរកទីផ្សារបន្ថែមសម្រាប់ផលិតផលកសិកម្ម

លោក ឌិត ទីណា រដ្ឋមន្ត្រីវ័យក្មេង នៃក្រសួងកសិកម្ម រុក្ខាប្រមាញ់ និងនេសាទ អះអាងថា លោក នឹងធ្វើការយ៉ាងជិតស្និទ្ធ ជាមួយរដ្ឋមន្ត្រីក្រសួងពាណិជ្ជកម្ម ដើម្បីជំរុញបន្ថែមទៅលើការផ្សព្វផ្សាយ និងការស្វែងរកទីផ្សារសម្រាប់ផលិតផលកសិកម្ម របស់ប្រជាកសិករកម្ពុជា។

លោក ឌិត ទីណា បានថ្លែងក្នុងសន្និសីទសារព័ត៌មាន ស្ដីពី «ទស្សនទាន ក្នុងវិស័យកសិកម្មនៅកម្ពុជា» នាព្រឹកថ្ងៃទី ៥ ខែមករា ឆ្នាំ ២០២៣នេះថា សម្រាប់នាពេលខាងមុខនេះ ក្រសួងកសិកម្ម រុក្ខាប្រមាញ់ និងនេសាទ នឹងដើរតួជាអ្នកសម្របសម្រួលនូវគ្រប់តួអង្គទាំងអស់ នៅក្នុងខ្សែសង្វាក់ផលិតកម្ម និងតួអង្គនានា ក្នុងជួររាជរដ្ឋាភិបាលផងដែរ។

ពាក់ព័ន្ធនឹងបញ្ហាទីផ្សារផលិតផលកសិកម្មវិញ លោករដ្ឋមន្ត្រីក្រសួងកសិកម្ម នឹងធ្វើការយ៉ាងជិតស្និទ្ធជាមួយរដ្ឋមន្ត្រីក្រសួងពាណិជ្ជកម្ម។ លោកថា «ចឹងបានជា ការងារដែលពាក់ព័ន្ធជាមួយនឹងទីផ្សារ ខ្ញុំនឹងធ្វើការងារជិតស្និត ជាមួយនឹងឯកឧត្ដមរដ្ឋមន្ត្រីក្រសួងពាណិជ្ជកម្ម ដើម្បីរុញបន្ថែមទៀត នូវលទ្ធភាពក្នុងការផ្សព្វផ្សាយ និងបើកទីផ្សារ តាមរយៈយន្ដការផ្សេងៗ រួមទាំងយន្ដការបើកទីផ្សារសេរីផងដែរ»៕