លោក នេត សាវឿន បញ្ជាឱ្យស៊ើបអង្កេតបន្ទាន់ករណីមន្ដ្រីនគរបាលចរាចរណ៍ផាកពិន័យ​ជនជាតិចិន​ នៅខេត្តតាកែវ

នាយឧត្តមសេនីយ៍ នេត សាវឿន អគ្គស្នងការនគរបាលជាតិ បានបញ្ជាឲ្យស្នងការនគរបាលខេត្តតាកែវ បើកការស្រាវជ្រាវ និងស៊ើបអង្កេតជាបន្ទាន់ ករណីមន្ដ្រីនគរបាលចរាចរណ៍ លើកំណាត់ផ្លូវជាតិលេខ៣ ស្ថិតក្នុងស្រុកត្រាំកក់ ខេត្តតាកែវ ដែលផាកពិន័យជនជាតិចិន ហើយផ្ទុះការរិះគន់ពេញបណ្ដាញសង្គម។

លោក នេត សាវឿន បានអះអាងថា បទបញ្ជានៃការស្រាវជ្រាវនេះ គឺត្រូវធ្វើឡើងព្រមគ្នាតែម្ដង ទាំងមន្ដ្រីកា​រិយាល័យនគរបាលចរាចរណ៍ នៃស្នងការដ្ឋាននគរបាលខេត្តតាកែវ និងសាមីខ្លួនជនជាតិចិន ដែលបាន​បង្ហោះខ្លឹមសារនៅលើបណ្ដាញសង្គម ដើម្បីធ្វើឲ្យមានតម្លាភាព និងស្មើភាពគ្នារវាងភាគីទាំងពីរ។

អគ្គស្នងការនគរបាលជាតិ លោក នេត សាវឿន បានថ្លែងយ៉ាងដូច្នេះថា «ករណីជនជាតិចិនបង្ហោះ​សារលើបណ្ដាញ​សង្គម ខ្ញុំបានបញ្ជាបន្ទាន់ដល់ស្នងការនគរបាលខេត្តតាកែវ ដើម្បីបើកការស្រាវជ្រាវស៊ើបអង្កេត ក្រោយផ្ទុះព័ត៌មាន និងបាតុភាពតាមបណ្ដាញសង្គម»។

បើតាមនាយឧត្តមសេនីយ៍ នេត សាវឿន ការស្រាវជ្រាវនេះ ត្រូវធ្វើឡើងពីរព្រមគ្នាពោលគឺ ទី១៖ ការអនុវត្តតួនាទីភារកិច្ច អាប្បកិរិយា ពាក្យសម្ដីរបស់មន្ដ្រីនគរបាលចរាចរណ៍ ហើយបើឃើញមានកំហុស នឹងដាក់ពិន័យរដ្ឋបាល វិន័យកងកម្លាំង​នគរបាលជាតិ និងទី២៖ បុគ្គលជនជាតិចិន ដែលបង្ហោះសារតាមបណ្ដាញសង្គម ក្រោយមានការលើកឡើងថា បានប្រើ​ប្រាស់​ពាក្យសម្ដី កាយវិការច្រងេងច្រងាក និងបើកបរលើសល្បឿនកំណត់រហូតដល់ជាង១០០គីឡូម៉ែត្រក្នុងមួយម៉ោង។

សូមបញ្ជាក់ថា កម្លាំងការិយាល័យនគរបាលចរាចរណ៍ នៃស្នងការដ្ឋាននគរបាលខេត្តតាកែវ គោលដៅផ្លូវជាតិលេខ៣ ស្ថិតក្នុងស្រុកត្រាំកក់ ត្រូវបានដកបញ្ឈរជើងទាំងអស់ ដើម្បីធ្វើការស្រាវជ្រាវស៊ើបអង្កេត បន្ទាប់ពីរងការរិះគន់​ពាក់ព័ន្ធការ​ចាប់អ្នកធ្វើដំណើរ ជាជនជាតិបរទេសផាកពិន័យលើសច្បាប់កំណត់ និងឈានដល់ការប្រើប្រាស់អំពើហិង្សា រហូតត្រូវបានគេចែកចាយពេញបណ្ដាញសង្គម។

ករណីនេះ គឺផ្ដើមចេញពីជនជាតិចិនម្នាក់ទំនងជាអ្នករកស៊ីវិនិយោគនៅក្នុងប្រទេសកម្ពុជា បានបង្ហោះសាររិះគន់​យ៉ាងចាស់ដៃលើមន្ដ្រីនគរបាលចរាចរណ៍ នៅផ្លូវជាតិលេខ៣ គីឡូម៉ែត្រលេខ៦៨ ស្ថិតក្នុងស្រុកត្រាំកក់ ខេត្តតាកែវ (គីឡូម៉ែត្រលេខ៦៨) ដែលមុនដំបូងផាកពិន័យរហូតដល់១០០ដុល្លារ ដោយចោទប្រកាន់ថា បើករលើសល្បឿនកំណត់ ទាំងដែលរូបគេអះអាងថាមិនបានបើកបរខុសច្បាប់ និងឈានដល់ការប្រើប្រាស់អំពើហិង្សាបណ្ដាល ឲ្យបុរសចិនរូប​នេះមានរបួសស្នាមថែមទៀតផង។

វិនិយោគិនចិនរូបនេះ បានបង្ហាញនូវក្ដីឈឺចាប់តាមរយៈសំណេរដែលបង្ហោះនៅលើ Facebook របស់ខ្លួនឈ្មោះ 崔健 (CUI JIAN) ថា កាលពីថ្ងៃទី១ ខែមករា ឆ្នាំ២០២៣ រូបគេបានធ្វើដំណើរតាមផ្លូវជាតិលេខ៣ រហូតដល់គីឡូម៉ែត្រលេខ​៦៨ ក៏ត្រូវនគរបាលចរាចរណ៍ នៃស្នងការដ្ឋាននគរបាលខេត្តតាកែវ ចាប់ឃាត់ផាកពិន័យ ដោយអះអាងថា រូបគេបើក​បរលើសល្បឿនកំណត់ ៣០ភាគរយ និងតម្រូវឲ្យបង់ប្រាក់ផាកពិន័យ១០០ដុល្លារ។

តាមរយៈសំណេរដដែលនោះ ជនរងគ្រោះបានបន្ដទៀតថា ការចោទប្រកាន់ថារូបគេបើកបរលើសល្បឿនកំណត់នេះ​មិនសមហេតុផលឡើយ ព្រោះរូបគេបើកបររថយន្ដធុនធំ ហើយក៏មិនអាចបើកលឿនពេកនោះដែរ។ ជនជាតិចិនរូបនេះ គិតថា ការផាកពិន័យនេះ ទំនងដោយសារឃើញរូបគេជាជនជាតិបរទេស (ចិន) ហើយគ្រាន់តែផាក​ដើម្បីយកលុយដាក់​ហោប៉ៅខ្លួនឯងប៉ុណ្ណោះ។

ម្ចាស់គណនី Facebook 崔健 (CUI JIAN) បានបន្ថែមថា ក្នុងហេតុការណ៍នោះ ក៏មានការប្រកែកតវ៉ា និងឈាន​ដល់ការប្រើប្រាស់អំពើហិង្សា ដោយមានមន្ដ្រីនគរបាល៥នាក់ ឆក់យកទូរស័ព្ទរបស់ខ្លួន និងវាយដំលើរូបខ្លួន បណ្ដាល​ឲ្យរងរបួសជាច្រើនកន្លែង (រូបភាពមានបង្ហាញ)។ បន្ទាប់ពីឆក់យកទូរស័ព្ទរបស់ជនជាតិចិនហើយនោះ មន្ដ្រីនគរបាល​ទាំងអស់នោះ បានលុបរូបភាពទាំងអស់នោះចេញ ដើម្បីបំបាត់ភ័ស្ដុតាង។ ក្រោយមកមន្ដ្រី នគរបាលចរាចរណ៍ទាំងនោះ បានបង្ខំរូបគេបង់ប្រាក់ផាកពិន័យ៥០ដុល្លារ ដោយមិនចេញវិក្កិយបត្រឡើយ៕