រដ្ឋបាលរាជធានីភ្នំពេញ បានដាក់ឲ្យអនុវត្តសាកល្បងនៃគម្រោងចំណតរង់ចាំឆ្លាត (Smart Bus Shelter) ដែលជាផ្នែកមួយនៃកិច្ចសហប្រតិបត្តិការទីក្រុងឆ្លាតអាស៊ាន-ជប៉ុន។ នេះបើតាមលោក នួន ផារ័ត្ន អភិបាលរងរាជធានីភ្នំពេញ។

លោក នួន ផារ័ត្ន ដែលកាលពីថ្ងៃទី ២០ ខែមករា ឆ្នាំ ២០២៣ បានទៅពិនិត្យជាមួយអ្នកជំនាញការជប៉ុន លើការអនុវត្តសាកល្បងនៃគម្រោងចំណតរង់ចាំឆ្លាត (Smart Bus Shelter)។ លោកថា ការអនុវត្តសាកល្បងនៃចំណតរង់ចាំឆ្លាតនេះ មានចំនួន ២ ទីតាំង៖ នៅខាងមុខមន្ទីរពេទ្យព្រះអង្គដួង និងនៅខាងមុខវិទ្យាល័យព្រះស៊ីសុវត្ថិ តាមដងមហាវិថីព្រះនរោត្តម។

បើតាមអភិបាលរងរាជធានីភ្នំពេញរូបនេះ គម្រោងនេះនឹងចូលរួមបង្កភាពងាយស្រួល និងផ្តល់ទំនុកចិត្តបន្ថែមទៀតជូនដល់ប្រជាពលរដ្ឋ ទៅលើសេវាដឹកជញ្ជូនសាធារណៈរថយន្តក្រុង តាមរយៈការបំពាក់សម្ភារបរិក្ខារឆ្លាតមួយចំនួន រួមមាន៖ ការបំពាក់កាមេរ៉ាសុវត្ថិភាព, អំពូលភ្លើងប្រើប្រាស់ថាមពលព្រះអាទិត្យ, ផ្ទាំង LED ដែលមានបញ្ជាក់ពីទីតាំងជាក់ស្តែងរបស់រថយន្ត និងថេរវេលាដែលរថយន្តនឹងមកដល់ចំណតរង់ចាំ។

លោក នួន ផារ័ត្ន បានឲ្យឹដឹងទៀតថា គម្រោងនេះជាផ្នែកមួយនៃកិច្ចសហប្រតិបត្តិការទីក្រុងឆ្លាតអាស៊ាន-ជប៉ុន៕