អ្នកជំនាញថា ការដំឡើងពន្ធមានប្រសិទ្ធភាព​កាត់បន្ថយការប្រើប្រាស់ថ្នាំជក់

ជារៀងរាល់ឆ្នាំការប្រើប្រាស់ថ្នាំជក់បានសម្លាប់មនុស្សប្រមាណ ៨ លាននាក់ដែលជាមូល​ហេតុចម្បងនៃការស្លាប់ដែលអាចការពារបានទូទាំងពិភពលោក។ ភស្តុតាងបង្ហាញថា ការដំឡើងពន្ធថ្នាំជក់គឺជាវិធានការមាន​ប្រសិទ្ធភាពបំផុត​សម្រាប់ការប្រើប្រាស់ថ្នាំជក់។​

ប្រសិនបើប្រទេសកម្ពុជាដំឡើងពន្ធរហូតដល់ ៧៥% នៃតម្លៃលក់រាយឱ្យស្របតាមអនុសាសន៍របស់អង្គការសុខភាពពិភពលោក និងធនាគារពិភពលោកកម្ពុជា និងទទួលពន្ធចំណូលបន្ថែម ២៣៥ លានភាគរយ សហរដ្ឌ អាមេរិក ក្នុងរយៈពេល ១៥ ឆ្នាំខាងមុខ។

លោក មុំ គង់ វិជ្ជបណ្ឌិតនាយកប្រតិបត្តិអង្គការចលនាដើម្បីសុខភាពកម្ពុជា មានប្រសាសន៍ថា​ ទោះបីមានការថយចុះបរិមាណចំនួនអ្នកប្រើប្រាស់ថ្នាំជក់ក្តី ប៉ុន្តែនៅពេលដំឡើងពន្ធដល់កម្រិត នោះចំណូលពន្ធដែលទទួលបាននៅតែកើនឡើងដដែល។

លោកបណ្ឌិតបញ្ជាក់បន្តថា បានជា​វិធានការដំឡើងពន្ធថ្នាំជក់មានប្រសិទ្ធភាព ព្រោះកាលណាមាន ការដំឡើងពន្ធ ឱ្យតម្លៃលក់រាយ ១០ ភាគរយ និងកាត់បន្ថយអ្នកប្រើប្រាស់បាន ៨ ភាគរយ នៃអ្នកជក់បារីនៅកម្ពុជា។

លោកបញ្ជាក់បន្ថែមទៀតថា ដើម្បីជួយប្រជាជនមិនឲ្យរងផលប៉ះពាល់ដល់អាយុជីវិត និងសុខភាព ដោយការប្រើប្រាស់ផលិតផលថ្នាំជក់ គឺទី ១ ត្រូវដំឡើងពន្ធថ្នាំជក់ឲ្យបាន ៧៥%។ ទី ២ ត្រូវពង្រឹង​ការអនុវត្តច្បាប់ហាមជក់បារីនៅកន្លែង សាធារណៈ និងកន្លែងធ្វើការ និងមានសារព្រមានពីសុខភាព​លើកញ្ចប់បារី។​

តាមការស្រាវជ្រាវបញ្ជាក់ថា ប្រជាជនកម្ពុជាដែលនិយមជក់បារីភាគច្រើនគាត់ជក់បារីអស់ ១២ ដើម ក្នុង១ថ្ងៃ ហើយតម្លៃបារីក្នុង១កញ្ចប់ និងតម្លៃបារី ដែលទិញចុងក្រោយ​មានតម្លៃ​ ៣៩០០ រៀលក្នុង១កញ្ចប់។​

​ទោះយ៉ាងណាប្រជាជនកម្ពុជា ៩៥% គាំទ្រឲ្យមានការដំឡើងពន្ធថ្នាំជក់បច្ចុប្បន្ននេះបើយើងតាមការស្រាវជ្រាវនៃសាកលវិទ្យាល័យជាតិមានជ័យនៅក្នុងឆ្នាំ ២០២១៕

អត្ថបទ៖ រុងរឿង