ព័ត៌មានជាតិ

តើមន្ត្រីណាខ្លះជាប់កាតព្វកិច្ចប្រកាសទ្រព្យសម្បត្តិ និងបំណុល តាមរបប ២ឆ្នាំម្ដង?

បានផុស

២ years មុន

នៅ

ថ្ងៃសៅរ៍ ៤ កុម្ភៈ ២០២៣

ដោយ

កាលពីថ្ងៃទី១ ដល់ថ្ងៃទី៣១ ខែមករា ឆ្នាំ២០២៣ អង្គភាពប្រឆាំងអំពើពុករលួយបានបើកទ្វារទទួលយកឯកសារប្រកាសទ្រព្យសម្បត្តិ និងបំណុល អនុវត្តតាមរបប ២ឆ្នាំម្ដង សម្រាប់ឆ្នាំ២០២៣។

នាយកដ្ឋានប្រកាសទ្រព្យសម្បត្តិ និងបំណុល បានឲ្យដឹង រយៈពេល៣១ថ្ងៃកន្លងទៅនេះ មន្ត្រីដែលបានប្រកាសទ្រព្យសម្បត្តិ និងបំណុល មានចំនួន២២ ៦៤៥ច្បាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមប្រភពដដែល បានបញ្ជាក់ថា មន្ត្រីនៃក្រសួង-ស្ថាប័នចំនួន៣៥ និងរដ្ឋបាលរាជធានី-ខេត្តទាំង២៥ របស់កម្ពុជាបានមកប្រកាសទ្រព្យសម្បត្តិ និងបំណុល ទាន់ពេលវេលាប្រកបដោយភាពជោគជ័យ និងមិនមានមន្ត្រីណាគេចវេសពីកាតព្វកិច្ចនេះឡើយ។

មាត្រា១៧ នៃច្បាប់ស្ដីពីការប្រឆាំងអំពើពុករលួយ បានកំណត់ថា សមាសភាពបុគ្គលដែលជាប់កាតព្វកិច្ចប្រកាសទ្រព្យសម្បត្តិ និងបំណុល រួមមាន៖ សមាជិកព្រឹទ្ធសភា រដ្ឋសភា រាជរដ្ឋាភិបាល មន្រ្តីសាធារណៈដែលមានអាណត្តិជ្រើសតាំង សមាជិកក្រុមប្រឹក្សាជាតិប្រឆាំងអំពើពុករលួយ ប្រធាន អនុប្រធាន និងមន្រ្តីទាំងអស់នៃអង្គភាពប្រឆាំងអំពើពុករលួយ។

បន្ថែមពីនេះ មានមន្រ្តីរាជការស៊ីវិល មន្ត្រីយោធា នគរបាលជាតិ មន្ត្រីរាជការសាធារណៈដែលតែងតាំងដោយព្រះរាជក្រឹត្យ ឬអនុក្រឹត្យ និងមន្រ្តីផ្សេងទៀតដែលតែងតាំងដោយប្រកាសហើយត្រូវបានកំណត់ឲ្យប្រកាសទ្រព្យសម្បត្តិ និងបំណុលតាមបញ្ជីរៀបចំឡើងដោយអង្គភាពប្រឆាំងអំពើពុករលួយបន្ទាប់ពីបានពិគ្រោះយោបល់ជាមួយក្រុមប្រឹក្សាជាតិប្រឆាំងអំពើពុករលួយ។ ដោយឡែក ថ្នាក់ដឹកនាំសង្គមស៊ីវិល រួមទាំងមន្ត្រីតុលាការ ជាអាទិ៍ ចៅក្រម អយ្យការ សាការី ក្រឡាបញ្ជី និងអាជ្ញាសាលា ជាដើម ក៏ជាប់កាតព្វកិច្ចប្រកាសប្រកាសទ្រព្យសម្បត្តិ និងបំណុលនេះដែរ។

នៅពេលចូលកាន់មុខតំណែង និងនៅពេលចេញពីមុខតំណែងបុគ្គលខាងលើទាំងនេះត្រូវតែប្រកាសទ្រព្យសម្បត្តិរបស់ខ្លួនជាលាយលក្ខណ៍អក្សរ ឬជាទម្រង់អេឡិចត្រូនិច បើទោះបីជាទ្រព្យសម្បត្តិនោះនៅក្រៅប្រទេសក្តី ឬក្នុងប្រទេសក្តី រួមទាំងបំណុលផង ដោយដាក់ជូនអង្គភាពប្រឆាំងអំពើពុករលួយដោយសាមីខ្លួនផ្ទាល់។

ពាក់ព័ន្ធនឹងកាតព្វកិច្ចនៃការប្រកាសទ្រព្យសម្បត្តិ និងបំណុលនេះដែរ ចំពោះករណីបុគ្គលផ្សេងទៀតដែលមិនមានឈ្មោះត្រូវប្រកាសទ្រព្យសម្បត្តិ និងបំណុល ប៉ុន្តែបុគ្គលនោះសង្ស័យថាមានជាប់ពាក់ព័ន្ធអំពើពុករលួយ ក៏តម្រូវឲ្យប្រកាសទ្រព្យសម្បត្តិ និងបំណុលរបស់ខ្លួនផងដែរ បន្ទាប់ពីមានការស៊ើបអង្កេត និងទទួលសេចក្ដីសម្រេចរបស់អង្គភាពប្រឆាំងអំពើពុករលួយ។

ដោយឡែកការរក្សាទុកសំណុំឯកសារនៃអ្នកបានប្រកាសទ្រព្យសម្បត្តិ និងបំណុល គឺអង្គភាពប្រឆាំងអំពើពុករលួយត្រូវទុកជាការសម្ងាត់ខ្ពស់បំផុត និងធ្វើជាទម្រង់អេឡិចត្រូនិកដោយមានលេខសម្ងាត់ ឬធ្វើជាលិខិតដាក់ក្នុងស្រោមសំបុត្រដែលកំណត់ដោយអង្គភាពប្រឆាំងអំពើពុករលួយ។ នៅលើមាត់ស្រោមសំបុត្រដែលបិទជិតត្រូវប្រថាប់ត្រា និងមានចុះហត្ថលេខាដោយប្រធានអង្គភាពប្រឆាំងអំពើពុករលួយ ឬតំណាង ព្រមទាំងមានផ្ដិតម្រាមដៃសាមីខ្លួន។

ក្នុងករណីចាំបាច់នៃការស៊ើបអង្កេតពាក់ព័ន្ធនឹងភាពមិនប្រក្រតី ប្រធានអង្គភាពប្រឆាំងអំពើពុករលួយអាចធ្វើការសម្រេចបើកស្រោមសំបុត្រ ឬបើកមើលឯកសារអេឡិចត្រូនិកនៃការប្រកាសទ្រព្យសម្បត្តិ និងបំណុលបាន។ នីតិវិធីក្នុងការបើកស្រោមសំបុត្រ ឬបើកមើលឯកសារអេឡិចត្រូនិកប្រកាសទ្រព្យសម្បត្តិ និងបំណុល ត្រូវកំណត់ដោយសេចក្ដីសម្រេចរបស់អង្គភាពប្រឆាំងអំពើពុករលួយ៕

ដោយ៖ ធឿន វ៉ាន់សុង